TERGERAKLAH HATINYA OLEH BELAS KASIHAN (Markus 6: 30-34 + 53-56)

 

GABE ASI MA ROHANA MIDA NASIDA

TERGERAKLAH HATINYA OLEH BELAS KASIHAN

(Markus 6: 30-34 + 53-56)

Patujolo ni Turpuk:

Buku Markus on Injil do na tumua jala jumempek sian opat buku Barita Na Uli (Injil Sinoptik) na disurathon taon 50-60 an. Injil Markus mamaritahon taringot tu ngolu dohot pangajarion ni Tuhan Jesus, alai laos surat ni si Markus on do na manghehei las ni roha. Sian mula ni Barita Na Uli on, angka halongangan bolon do dipatuduhon Jesus huhut panogunoguon tu angka siihuthon Jesus Kristus.

Injil Markus manang barita las ni roha on godang marisihon taringot tu huaso ni Tuhan Jesus Kristus, Anak ni Debata. Di bagasan evanggelium on godang do dipabotohon pangajarionna marhitehite 18 tanda halongangan dohot 4 parumpamaon. Jala turpuk on ma sada sian barita pangulaon ni Jesus. Dipatorang do Tuhan Jesus na boi pamalumhon angka na marsahit dohot tujuan asa lam porsea halak Kristen mulamula na mangae binahen ni Kaisar Nero na mangalelei angka halak Kristen.

 

Hatorangan ni Turpuk:

            Ay. 30-31: Dung i marpungu ma angka apostel i tu jolo ni Jesus, dipaboa ma tu Ibana sasude na niula jala na niajarhonnasida. Gabe didok Ibana ma tu nasida: Sumurut ma hamu, tungkan na suhi an, pahosahon saotik! Ai torop do halak marlaho ro tu nasida; gari mangan, gari so sadihari.

            Porlu Pangarimangon Panghobasion. Di bagasan pangulaon manang panghobasion ni Tuhan Jesus dohot angka siseanna dilului nasida do partingkian asa adong pangarimangon manang Evaluasi tu panghobasion. Disi marpungu do angka apostel i laho manghatai, paboahon sude naniula manang na niajarhonnasida. Di bagasan tingki i ma laho manimbangi boha do ulaon ?, boha do hasilna ?, angka diama panghobasion na nunga diulahon, na pas diulahon, jala na naeng diulahon dope? Marhite sian i asa boi muse mambuat langkah-langkah panghobasion. Disuru Tuhan Jesus do nasida asa sumurut tungkan na suhi. Asa sanga jolo pahosahon saotik manang maradi satongkin mangalap hagogoon na imbaru. Alani torop ni halak na ro tu nasida, gari mangan pe dang pola adong tingki. Alai na nidokna ndada holan mangulon disi, alai mangalehon tingki mangalap gogo marhitehite tangiang tu Tuhan Debata asa dipargogoi mangulahon sude ulaon i. Tuhan Jesus pe hea do tu inganan na suhi laho martangiang ima di Getsemane.

            Ay. 30-32: Gabe asi ma rohana mida nasida (Tergeraklah hatinya oleh belas kasihan). Dung i borhat ma nasida marparau sumurut tu inganan na suhi. Jadi torop do marnida jala mananda nasida na borhat i, gabe sian darat ma marlojong nasida sian saluhut angka huta i pajolohon tusi. Siala haporseaon nasida sai diihuthon do Tuhan Jesus dohot angka siseanna manang tudia pe laho. Adong hasiholan ni roha nasida laho marnida jala tumangihon Tuhan Jesus. Dibereng Ibana na torop ni punguan i, gabe asi ma rohana mida nasida, ai songon birubiru nasida na so marparmahan. Marhite turpuk i pataridahon adong antusias manang usaha ni halak siihuthon Kristus laho pajonokhon diri tu Debata. Siala ni ima gabe asi roha ni Tuhan Jesus tu angka nasida. Sudena angka ulaon na denggan ala denggan basa jala asi ni roha ni Debata do, alai haporseaon i do manaruhon hita tongtong tu Debata.

            Ay. 53-56: Porsea tu Huaso ni Jesus. Dung sahat Tuhan Jesus dohot angka siseanna di Genesaret, pintor ro do halak mangarongomi Ibana, gabe humalaput ma nasida sian sandok luat na humaliang i, diusung ma angka na hansitan di podomanna be tu manang dia Ibana dibege nasida. Dipamboani nasida ma angka na marsahit asa dipamalum Tuhan Jesus. Haporseaon na balga i do na pamalumhon angka sahit. Marhitehite huaso ni Tuhan Jesus, dipeakkon angka na hansitan i di alamanna be, jadi dielehelek nasida do Ibana, asa diloas jamaonnasida nanggo rambu ni ulosna, asa malum sian parsahiton di angka na manjamasa. Boi dibandingkon di Markus 5: 28 ima parompuan na marsahit bulan lelengna sampulu dua taon ala porsea ibana boi malum marhitehite na manjama ulos ni Jesus. Na naeng papataronna disi marhite haroro ni Tuhan Jesus adong pembaharuan ni ngolu baik di pardagingon suang songon i dipartondion.

            Suang songon i do gareja na ingkon mamboan pembebasan tu ruasna, gereja yang berdiakoni tidak untuk dirinya sendiri tetapi untuk orang lain. Jadi konsep pelayanan jadi berimbang ada marturia (kesaksian), ada diakonia (parasirohaon), adong jamita naniihuthon dohot aksi sosial. Huulahi hami sahali nai, marhitehite turpuk on, adong 3 hal na diondolhon ima: 1) Hinaringkot ni pangarimangon tu panghobasion, 2) Panghobasion na mardalan ala nionjar ni asi ni roha ndada paksaan, 3) Haporseaon tu huaso ni Tuhan Jesus Kristus. AMEN