MIAN DO TONDI NI DEBATA DI AU ROM 8: 6-11

 

TOPIK: MIAN DO TONDI NI DEBATA DI AU ROM 8: 6-11

Dongan na hinaholongan di bagasan Tuhan Jesus Kristus.

Marhite turpuk on Dipatorang si Paulus do ngolu na imbaru ni jolma na porsea tu Tuhan Jesus Kristus, jala ngolu na imbaru i boi tubu ima molo adong hubunganna dohot Debata.      Di hatihai Rom ima sada kota na umbalga di portibi on, ala disi do godang pusat ni angka hariburon: mulai sian kebudayaan, politik dohot perdagangan. Alani I godang do disi angka sahit sosial disi isarana: parsombaon tu dewa, roha diri na timbo, hosom, teal, dna tarlumobi ma hasomalon na buruk ima parmainanon. Jadi tung mansai tandi do ngolu haportibion di halak Rom. Alai di torop ni Penduduk dohot hangoluan nasida I do tong Apostel Paulus manongos surat pangajarion tu Rom nang pe so hea dope ibana tu Rom, ala molo gabe porsea halak Rom, tontu godang do pengaruhna tu angka Bangso na asing. Disurat Apostel Paulus do surat on dalan laho mangaramoti, pajamothon halak Kristen na disi asa unang madabu tu bagasan partondion na hodar. Asa olo nasida pasidinghon angka dosa sian hangoluan nasida.

Sipasahaton:

Ayat 6) Ai hamatean do harohaon ni daging, alai hangoluan jala hadameon do anggo harohaon ni Tondi. Di bagasan ayat adong hal na tung mansai menarik bahasonta ima taringot tu na mendasar di hangoluan ima harohaon ni daging dohot harohaon ni tondi. Lapatan ni harohaon ni daging ima ngolu na marojahan tu daging na maralo tu lomo ni roha ni Debata ima pargadombuson, pangalangkupon, hasipelebeguon, parbadabadaan, pangiburuon, pamatehon jolma, egoisme, hahisapon, dna (Gal. 5: 19-21). Harohaon ni tondi ima angka ulaon lomo ni roha ni Debata, asi ni roha, roha holong dohot pangoluhon, serep ni roha, haporseaon, pangarajaion diri. Alai angka on do parbue ni Tondi: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon (Gal. 5: 22).

Ayat 7) Hamusuon dompak Debata do harohaon ni daging; ndang olo unduk i di patik ni Debata. Sian ayat 6 nangkin, nunga taboto nian aha do na ingkon sipilliton dohot siulahonon ni halak na porsea. Mangihuthon ngolu hadagingon manang partondion? Alai di ayat 7 on, dipaboa do konsekuensina ia harohaon ni daging, hamusuon do I dompak Debata, jala ndang olo unduk I di patik ni Debata, ala harohaon daging tontu padaohon hita sian Debata. Molo marroha daging tontu mangelaela jolma tu bagasan dosa, lam dang peduli be tu ngolu partondion, ndang unduk be di patik ni Debata bahkan olo gabe sialo Tuhan Debata. Alani I dipasingot do tutu asa unang terjebak di bagasan ngolu harohaon pardagingon na so tama.

Ayat 8) Alai ndang tarhalomohon Debata angka parroha daging. Hata ni Debata do tutu na pasingothon asa unang gabe parroha daging, asa lam malo hita manimbangi dia do pangidoan ni daging jala dia do pangidoan ni tondi. Songon contoh tutu: hal dilematis na nialaman ni si Adam dohot si Hawa jolma parjolo i. Aut sugari suara ni partondion diulahon nasida, tontu ingotonna do ia parbue ni hau hangoluan I ndang boi panganonna ala nunga tangkas do I diorai Debata. Alai suara ni hadagingon do na tinangihonna, mansai uli dibereng parbue ni hau I jala tabo berengon laho panganon huhut hasrat di bagasan rohana asa sarupa dohot Tuhan Debata, gabe madabu ma tu bagasan dosa. Parroha daging parohon dosa, parroha tondi parohon haluaon.

Ayat 9) Alai anggo hamu, ndang be di bagasan daging i, di bagasan Tondi do, di Huria na di Rom nunga be halak Kristen nasida, alai tongtong do ingkon pasingoton nasida laho manjagahon asa unang madabu tu harohaon ni daging. Halak Kristen si saonari on pe tutu, porlu do dipasingot muse ima taringot tu identitasna songon siihuthon Kristus dohot praktek ni parngoluonna. Asa tangkas ia halak na tinobus ni Tuhan Jesus Kristus nunga gabe nampuna ni Kristus, alani I dijaga ma dirina jala dipahombar ma pangalahona hombar tu ngolu partondion na denggan. Molo tung tutu Tondi ni Debata maringanan di bagasan roha ni halak na porsea, na marlapatan do I boi mangarajai diri; pasidinghon angka ngolu hadagingon na gok dosa.

Ayat 10-11) Alai molo Kristus di bagasan hamu, mangolu do tondi ala ni hatigoran... Sandok pangoluon ni Ibana, naung manungguli Kristus Jesus i, ma nang pamatangmuna na mate i, hinorhon ni Tondina na mangingani hamu. 2 ayat na parpudi di bagasan turpuk on ima songon simpulan ni pardomuan ni jolma dohot Kristus, ngolu dohot hamatean. Di bagasan Kristus, mangolu do jolma alani hatigoran jala ditingkina paheheon ni Tuhan Jesus do muse angka na mate i. Singkop do di Ibana saluhut huaso ni hangoluan dohot ngolu di ari sogot.

Refleksi:

Mangihuthon turpuk on, molo dibahen do tutu garis besarna naeng berengonta do dua hal na kontras ima  hal-hal duniawi na maralo tu hal-hal surgawi. Hal duniawi ima angka aha ma na mambahen hita sonang di portibi on, ngolu di portibi on na bersifat parsatongkinon, marparange sian hataboan ni portibi on, mauas di angka hasonangan sambing. Harohaon ni daging na parohon hasonangan satongkin alai laos mamboan tu hamagoan dohot panguhuman, hamatean salelenglelengna. Sedangkan Hal surgawi ima angka aha ma na mambahen hita gabe halak sitean harajaon banua ginjang. Tujuan ni haporseaonta ima mandiori ngolu na saleleng ni lelengna, marparange namarojahan tu Debata, mangandalhon haporseaon. Harohaon ni tondi parohon hangoluan dohot hadamean. Godang dope tahe angka hata na sarupa na boi manggombarhon parasingan ni na dua hal I isarana kudus na maralo tu dosa, sakral na maralo tu profan, rohani na maralo sekuler, pajolohon Jasmani manang Rohani?. Songon halak na porsea unang olo hita dilematis, kompromi na mambahen hasesega di bagasan haporseaonta, justru hata ni Debata ima Mateus 6: 33 do paposhon rohanta na mandok: Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!

Pandangan-pandangan humanisme na jotjot keliru taringot tu hadagingon mambahen jolma jotjot mambahen angka sidalian isarana: “Akh, boha bahenon jolma dope hita”, “Akh ndang tarjua, ai di portibi on dope hita”. Godang alasan na dos tusi jotjot mambahen pangoromon diri na di bagasan rohanta gabe sega, ujungna gabe tongtong ma mangulahon dosa. Memang jolma na mangolu di portibi on dope hita, alai nampuna ni Kristus do hita na marojahan tu angka dalan na niajarhon ni Tuhan Debata. Di posisi sifat-sifat kemanusiaan I do tutu naeng gabe tangkas mangulahon hata ni Debata on, ndang gabe sundat Hata ni Debata ala bangkobangko ni hajolmaon. Justru, di bagasan kesempatan ni jolma di tingki ngoluna di portibi on do boi mangulahon hadengganon molo nunga mate ndang adong be tingkina mangulahon angka na denggan.  Mian do tondi, hatigoran, holong di bagasan diri ni halak na porsea tu Kristus, alai ringkot do merawat tondi na adong di bagasan hita, asa hombar tu haporseaonta maradophon lomo ni roha ni Debata. Pamatang dohot tondinta, ngolunta nang hamateanta naeng ma marojahan tu Tuhan Jesus Kristus. AMEN