PASEREPHON ROHA PODA 25: 6 -7

 

Topik: “PASEREPHON ROHA” PODA 25: 6 -7

Amang / inang na hinaholongan di bagasan Tuhan Jesus Kristus ! Manang ise na naeng marbisuk, marsiajar ma ibana sian Poda ni Raja Salomo. Buku Poda na gok taringot tu angka poda, habisuhon, pangajarion huhut parture ni marparange na uli. Buku on mangajari Pangalaho na marhapantunon di hata dohot parange na hinalomohon ni Debata. Tung mansai menarik do anggo poda ala dipasahat di bagasan bahasa na tabo jala menyangkut tu ngolu siganup ari.

Di parngoluan siganup ari, godang do hal na metmet na so taparrohahon alai mampangkorhon do i di bagasan ngolu ni jolma. Tarlumobi ma poda on mardomu tu hapantunon , ia halak na bisuk, na pantun dao do I sian na mangalului sangap tu dirina sandiri, suang songon I halak na paburnang dirina.

Jamita di borngin on, ima ajaran taringot tu manjaga martabat diri. Na parjolo ima asa unang pasangap diri, apalagi ma I dang pas dalanna. Di parngoluon ni jolma na sai mangalului sangap, na mangulahon sude cara asa dapot na di bagasan rohana, ujungna mambahen angka na roa pe diulahon asal ma saut pangidoanna. Ndang lomo roha ni Debata di angka na mangalului sangap tarlumobi ma sian cara na hurang denggan. Adong na pasangap-sangap dirina di jolo ni raja, hape na sabutulna ndang na songoni nian.

Ringkot do nian jabatan, hasangapon, dohot angka na asing na I, alai ndang I na gabe utama. Alani marlomba-lomba sangap, ujungna gabe ndang sangap be. Alani I dipodahon tu hita, asa unang patongamtongam dirim dijolo ni Raja, ai Raja I do hatongamon dohot huaso. Patongamtongam diri hape gabe hailaon do na ro, gabe reherehe di jolma na asing.

Alani I porlu do jolma maniop prinsip: ‘Jadilah diri sendiri’. Jujurma taringot tu keadaan diri. Molo dibagasan ngolu siganup ari ni halak kita mandok “Boto Lungun”. Asa mamboto diri, intap nidia do hagogoonta jala na pantas taulahon. Jujur tu keadaan ni dirinta tontu lobi denggan do I sian na berpura-pura. Berpura-pura kaya hape pogos, alani I unang paksa diri tu na so tolap gogonta. Isarana na manuhor barang, olo do sada tingki hita laho tu Pasar, tabereng ma disi barang na uli jala mewah hape argana tung mansai timbo. Ndang pola paksahonon ingkon tatuhor I, ba boi ma muse molo nunga tapapungu hepengta dung godang baru ma dibuat muse. Menguasai diri tung mansai ringkot do asa unang gabe haurahon tu dirinta.

Napaduahon: Unang lului hundulan na sumangap. Poda hapantunon do on na mardomu tu hasangapon ni jolma molo tau diri. Alai molo ndang diboto ila, sai dilului do hasangapon nang pe so tuk gogona jala ndang pas posisina. Dicarita dipaboa adong na pintor mangalului hundulan naung sangap na I, alai sada kiasan jala poda do I tu jolma asa mamboto diri. Unang lului hundulan na sumangap, alai loas ma parjabu patamahon hamu, manuru hamu hundul di inganan naumsangap na I daripada hita mandior kursi naumsangap hape disuru muse hita tu pudi, ujungna gabe maila sandiri mahita molo songon i. Hea do I gabe perumpamaan ni Tuhan Jesus.

Di halak Batak pe diatur do parhundul ni angka tamu hombar tu posisi. Somalna di siamun ima angka Tulang dohot Hulahula di hambirang ima boru, bere, dohot ibe bere. Inganan na umsangap ima halangulu, inganan na soma ima talaga. Jadi parhundulna I pe diaturhon ma I hombar tu tuturna. Jadi molo bisuk, pantun, jala serep marroha pasti hundulanna do hombar tu ingananna.

Amang inang na hinaholongan di bagasan Tuhan Jesus Kristus, aha do na naeng dohonon  ni turpuk on tu hita? Ima asa olo hita marserep ni roha. Merendahkan hati adalah sikap yang terpuji dan berkenan di hadapan Allah. Molo serep roha ndang gabe haurahon di hita i. ala tumagon do DIPARSANGAPI HALAK NA TOROP daripada PASANGAPHON DIRI. Taingot ma na nidok ni Lukas 14: 11: Ai nasa na patimbohon dirina, sipaoruon do; jala na paoru dirina, i do sipatimboon!. Pas do I, ise na serep marroha I do sipatamaon daripada halak na sombong marroha.

Mardomu tu si hea do dibahen Pdt. Salomo Panjaitan sada ilustrasi taringot tu si: ima adong do halak na pogos na pogos, pogos di bagasan haadongon alai tong pogos di bagasan partondion. Na olo I dope didok ‘agia pogos partahanhon ginjang ni roha’, molo songon on ndang sitiruon on. Adong muse halak na pogos na mamora, dibagasan haadongon manang materi pogos do nian, alai parrohaonna, haburjuonna mamora do ibana. Anggo on halak na patut siharga on do on. Adong muse halak na mamora alai pogos, mamora do ibana di bagasan arta alai pogos do ibana dina marholong ni roha manang mangulahon angka hadengganon. Na mangihut muse adong halak na mamora jala mamora, anggo songon on on ma tutu na gabe sininta di jolma. Halak na manjalo pasupasu ingkon do tutu gabe pasupasu. Tontu marasing do rendah hati sian rendah diri. Antong manang pogos manang mamora tong ma paserephon roha. Molo pogos pe unang gabe minder, alai molo mamora pe unang gabe sombong.

Antong alani I amang dohot inang, lului ma parhundulan na pas, jala na gok haserepon ni roha. Unang lului hasangapon di jolo ni raja, alai loas ma raja I mangalehon hasangapon I, asa disuru hamu tu jolo, kursi na terhormat. Alani I porlu do di jolma kejujuran tu dirina asa unang mangota, margabus, takabur, pantang so hebat hape gok kepalsuan do dirina. Alani I marhite jamita on tapaserep ma rohanta !. AMEN