MARSIHOHOT MA DI PATIK DOHOT ATURAN NI DEBATA (5 MUSA 30: 9 – 14)

 

MARSIHOHOT MA DI PATIK DOHOT ATURAN NI DEBATA  (5 MUSA 30: 9 – 14)

Amang dohot inang nahinaholongan di bagasan Tuhan Jesus Kristus !

            Buku 5 Musa na sinurathon ni Kaum Deuteronomis. Lobi tangkas muse antusan sian hata ‘Ulangan’ di bagasan Bahasa Indonesia. Goar ni buku 5 Musa manang Ulangan on laos ido manggombarhon isi ni Buku on. Marhite buku on dipatorang do muse angka pidato ni si Musa di jolo ni Bangso Israel di tingki maradi nasida di Moab ala nunga tolhas nasida sian tano halonganan jala naeng masuk ma nasida tu tano Kanaan. Jala buku 5 Musa ma na gabe parpudi sian Kitab Pentateukh ima sian hata Deuteronomion na marlapatan pasahathon uhum na paduahon; mangulangi manaringoti patik dohot angka pardalanan ni Bangso Israel na tarsurat di Kitab na asing. Laos diulangi si Musa do muse pasahathon angka sipaingot manang aturan-aturan tu Bangso Israel asa lam marsihohot nasida di Patik dohot aturan ni Debata.

Hatorangan ni Turpuk:

            Ayat 9 – 10: Mangaradoti PatikNa mampangkhorhon pasupasu. Molo porsea tu Debata ido sada mambahen las ni roha jala mampangkorhon hadengganon tu ngolu ni angka siulahon Patik ni Debata. Adong dampak positif ni namangoloi patik ni Debata ima pasupasu sian Debata Jahowa tu saluhut rumang ni hangoluan. Pasupasuon ni Jahowa ma na niula ni tangannasida, torop jala denggan marpinompar, sinur ni pinahan dohot gabe na niula, sandok marlobilobi ma angka pasupasu ni Jahowa tu nasida. Alani i si Musa mangalehon pangantusion tu Bangso i asa mardalan di bagasan na mangaradoti Patik dohot aturan nasian Debata. Molo olo nasida mangoloi patik ni Debata, pasupasu do jambarnasida, songon angka ompunasida na mangulahon Patik ni Debata, na hot haporseaonna tu Debata manjalo hasonangan sian Tuhan Jahowa. Ima paboahon balga ni holong ni roha ni Jahowa tu saluhut jolma tarlumobi ma i di angka siulahon Patik dohot lomo ni rohaNa jala na marsitutu mangulahon hata ni Debata. Jolma na mardalan di dalan na pinatuduhon ni Debata, ido pasupasuon ni Debata.

            Ayat 11 – 14: Donok do Patik ni Debata jala na gabe ojahan ni ngolu halak na mangihuthon Debata. Dilehon Tuhan Debata do Patik marhitehite si Musa, asa gabe lam denggan jala taratur ngolu ni jolma i. Diulahi si Musa manaringoti Patik ni Debata jala mangidohon Bangso Israel asa hot marhaporseaon holan tu Debata sambing. Patik ni Debata dang gabe boban ni jolma, alai ingkon las do rohana mangulahon. Alani i alus tu angka na marsihol ni roha jala na mangalului Patik ni Debata; donok do Hata I, di bagasan pamangan dohot roha ni jolma do. Patik ni Debata i do na gabe ojahan manang tujuan ni ngolu ni halak na mangihuthon Debata. Sian patik i ma jolma mangalangka manimbangi angka na pantas siulahononhon dohot na so boi diulahon, na denggan dohot na sala. Sabutulna, tung godang do tutu angka na denggan alani patik i, alani i ndang marisuang dilehon Debata patikNa tu jolma. Dilehon pangantusion taringot tu Patik, ia patik i ndang na gabe pamaolhu laho luluon ni jolma, ndang na padaohu sian jolma, ndang na gabe dang boi jangkauan ni jolma. Di ayat 40 mandok Ai mansai donok do hata i di ho, di bagasan pamanganmu tahe dohot di bagasan roham, asa ulahononmu i.

 

Refleksi:

            Huria ni Tuhanta ! Sada hal na denggan do na niula ni si Musa. Dipatupa Ibana do pengulangan pangajarion tu angka sundut na umposo (generasi muda) asa unang lupa nasida di patik ni Debata. Sada bentuk reformasi do na pinatuduhon ni si Musa dinalaho membentuk pangalaho ni bangso Israel. Manang didia pe porlu do aturan dinalaho menata ngolu ni jolma.

Dihalak Batak adong do hata ora (larangan) na so boi diula jolma. ahama I amang dohot inang? Adong na umboto:

1)      Hata unang dipasahat ma tu dakdanak: ala sifatna pangajarion dope. Contohna: pangajarion ni orang tua tu dakdanak: Unang laho tusi ! Jangan makan itu !, dohot angka na asing.

2)      Hata Tokka dipasahat ma tu sundut na umposo. Ala dihaposoon tung mansai porlu manjaga moralitas asa unang madabu tu na so hinalomohon ni Debata. Misalna: Tokka do mardongan-dongan dina holom !

3)      Hata Ndang Jadi dipasahat tu angka na tuatua. On ma hata ora natumimbo ala sifatna manjaga hatomanon ni natuatua i, alani i natuatua ringkot manjaga hasangaponna, mambuat keputusan, dang sembarangan, dna.

Alani I tujuan ni hukum, aturan, adat sasudena i dina laho padengganhon jolma do i. Hukum naeng ma padengganhon jolma. Patik I pe songon I, molo taat do hita tu aturan ni Debata tontu gabe pasupasu do I tu hita, ngolunta, dohot keluarganta, alai uhumna tumimbo sian sude uhum ima hukum kasih, na so mamborathon, alai paluahon jolma songon napinatupa ni Tuhanta Tuhan Jesus Kristus.

Dalan haluaon na nilehon ni Debata tu jolma i tutu situtu do adong, ndang na gabe sada benda na so ada (abstrak). Di bagasan ni jolma sandiri do patik ni Debata i, ima na gabe sada alat manang panjaga parjolo tu jolma i asa unang madabu tu bagasan dosa, asa taratur ngolu ni jolma, asa mampangkorhon pasupasu tu angka na mangulahonsa. Molo nunga diantusi jolma, ia patik i adong di bagasan pamangan dohot ateatena, tontu ndang sembarangan be ibana mangulahon angka siulaonna dohot parangena. Gabe manat ma ibana marparange asa unang madabu tu bagasan dosa.

            Patik ni Debata ndang gabe parsoadaon, alai nunga dipasingkop Tuhan Jesus Kristus be patik i. Adong pe patik asa lobi disiplin do halak na porsea jala mananda di dosana huhut asa olo paturehon pangalahona. Pangantusion taringot tu Patik dohot Uhum di Padan na robi ndang gabe maralo tu ajaran holong na sian Tuhan Jesus dohot si Paulus, alai na padimposhon patik ima holong. Maksud dohot tujuan ni Patik ima holong napinasingkop ni Tuhan Jesus (Mat. 5: 17). Jadi patik dohot aturan di Debata mangarahon bangsona asa marsitutu di bagasan haporseaon tu Tuhan Debata, jala mangolu di bagasan dalan naung nilehon ni Tuhan i. Tontu dang tarsirang patik dohot aturan ni Debata sian holongNa sandiri. Di balik ni patik dohot uhum nabegeon songon na koras jala maol ulaon hape adong do holong na lambok na naung diparade Tuhanta tu angka na mangulahonsa, ala saluhutna i mampangkhorhon pasupasu jala haluaon do i tu jolma. Nunga taida hadengganon ni na mangulahon Patik ni Debata, antong marsihohot ma hita di patik dohot aturan ni Debata. Amen