GOMOS MA TATIOP NAUNG TAPARHATOPOT I (Heber 4: 12-16)

 

GOMOS MA TATIOP NAUNG TAPARHATOPOT I (Heber 4: 12-16)

Amang Inang na hinaholongan di bagasan Tuhan Jesus Kristus

            Asa Berengonta ma parjolo aha do namasa di halak Ibrani. Ia Surat tu halak Heber / Ibrani on ditujuhon do tu halak Kristen na torus mangadopi angka sitaonon alani haporseaon nasida, alani i do sipata naeng munggil do haporseaon nasida tu Tuhan Jesus Kristus.  Alai panurat ni surat on marusaha do laho patogutoguhon harposeaon nasida. Sai diboan do nasida tu pangantusion dohot panandaion tu Tuhan Jesus jolma na olo marsiakbagi jala mate humongkop jolma pardosa jala patangkashon haporseaon nasida bahwa Jesus Kristus ima Debata na singkop. Memang godang do angka na manosak ngolu na boi pagalehon manang papeolhon haporseaon nasida. Alai ima maksud dohot tujuan ni panurat Heber asa lam margogo nasida, asa lam togu haporseaonna tu Tuhan Debata marhitehite Tuhan Jesus.

Marhite surat Heber naeng patuduhon ia Tuhan Jesus ima Anak ni Debata na tumimbo sian angka panurirang na adong di Padan na Robi, nang angka surusuruan dohot malim pe. Jala marhite Kristus naeng paluaonna saluhut halak na porsea sian habiaran, hamatean, dohot dosa. Ala naung dilehon panorangion taringot tu Tuhan Jesus, diharophon do nasida asa tongtong marsihohot dihaporseaonna. Asa gomos maniop haporseaon naung diparhatopot i .

 

Hatorangan ni Turpuk

            Ay 12-13: Dasar ojahan / pedoman ni ngolu ni halak Kristen na sintong ima Hata ni Debata, ndang hamoraon, manang hapistaran ni jolma na di portibi on. Hata ni Debata ima hata na tongam na gok huaso sian Tondi Parbadia. Di bagasan ayat on pola do didok Ai na marngolu do hata ni Debata jala marpangkorhon, jala tumajom sian nasa podang siduababa. Marhite hata ni Debata boi do patupahon manang aha na boi manirang hosa dohot tondi, ringring dohot utohutokna, dohot na manimbangi sinangkap dohot na piningkir ni roha. Hata ni Debata i songon sinjata ni ngolu ni halak Kristen laho mandalani ariarina nang laho mangadopi angka sitaonon dohot utiutian ni sibolis. Di na mangihut muse didok Jala ndang adong na tinompa na onding sian jolona, tung saluhut do tedek, so adong na hungkup diida matana. Turpuk on paboahan bahwa Tuhan Debata do di ginjang ni saluhut, parsiboto do Debata tu sude na masa di angka jolma (maha mengetahui=omni science) tarlumobi asa margogo angka halak na gale haporseaonna.

            Ay 14-15: diayat on dipatangkas taringot tu hadirion ni Tuhan Jesus, ima na digoari Sintua ni malim na bolon (Imam Besar Agung), naung manorusi angka banua ginjang i, i ma Jesus, Anak ni Debata. Malim ima sada songon na pinangke ni Debata gabe penghubung na parohon haluaon tu saluhut jolma, na mamboan dame dohot las ni roha, na mamboan apoapo / penghiburan tu angka na marsak gale haporseaonna, na pamalumhon sahit dohot dosa ni jolma, na mambolonghon habiaran nasida. Tuhan Jesus boi do mangulahon i saluhutna. Tangkas do didok muse adong do di hita sintua ni malim na tarbahen dongan mangkilala di angka hagaleonta; tung na tarunjun do Ibana di na saluhut songon hita, alai ndang mardosa. Sude haulion na pinatupa ni Tuhan Jesus diulahon do di bagasan roha na serep dohot roha na empati na mamposisihon dirina songon jolma nang pe so mardosa ibana.

            Ay 16: songon sada sosososo laho patoguhon haporseaon, asa unang mabiar, didok: Antong, marhiras ni roha ma hita mandapothon habangsa parasiasian, asa tajalo talup ni roha, jala asa dapot asi ni roha hita bahen pangurupion, di tingki halehetanna. Sada pangobation do i tu halak Kristen na mangae alani haporseaon tu Tuhan Debata, humongkop dohot manghatindanghon haporseaonna.

Amang Inang nahinaholongan ni Tuhan Jesus Kristus! Antong tahaporseai ma Kristus do malim na bolon, Ibana do Anak ni Debata naung paluahon hita dalan pardameanta dohot Debata, jala marhite asi nirohaNa do hita dipintori. Ndadan Malim na marojahan di portibion anggo huasoNa alai malim na ro sian banua ginjang i do Ibana:

- Dibagasan Hamuliaon do habangsa ni Tuhan i

- Dipalua do hita, marhite hamamate ni Tuhan Jesus dohot haheheonNa

- Ditaon Tuhan Jesus do saluhut angka parungkilon dohot sitaonon na mansai dokdok, alai ndang talu Ibana dibahen pangunjunan i

- Diboto ibana do saluhut rumang ni dosa, alai ndang talu jala tarela ibana mangulahon dosa i, alai gabe dituhuk ibana do dosa i gabe mate Ibana singkat ni dosa i

Marhite Tuhan Jesus gabe dipatau do hita tu Debata, jala marhite Tuhan Jesus gabe dihusor Debata do Uhum na i gabe Asiniroha.

 

            Hamu amanami/inanami porlu antusanta ia Mangihuthon Tuhan Jesus, ndang holan na sonang gabe parsaulihononhon, alai na hansit pe ingkon do sihalashononhon. Songon na ni panghilalahon ni halak Heber na mangadopi godang tekanan, ndang diloas Debata gabe lam gale manang mago haporseaonna. Alai disarihon Debata do angka na marhaporusan tu Ibana. Ditungkoltungkoli ibana do haporseaon na goyah alani angka tantangan. Haporseaon (fide) i pe sibasabasa manang anugerah do i (gratia), alai tutu tong do dipangido ganup halak Kristen asa marsihohot / satia tu haporseaonna gomos maniop tumpal hangoluan sahat ro di rasirasa mate (Pangk. 2: 10). Arga do haluaon naung nilehon ni Debata, alani i ndang muramura maninggalhon haporseaon i. Alani i gomos ma tatiop naung taparhatopot i. AMEN