Markus 6: 30-34 Topik Diparmahani Debata do Angka Na Porsea

 

 

Nats	Markus 6: 30-34
Topik	Diparmahani Debata do Angka Na Porsea

 

I. Patujolo

Buku Markus on Injil do na tumua jala jumempek sian opat buku Barita Na Uli (Injil Sinoptik) na disurathon taon 50-60 an. Injil Markus mamaritahon taringot tu ngolu dohot pangajarion ni Tuhan Jesus na dipasahat lobi teratur. Sian mula ni Barita Na Uli on, angka halongangan bolon do dipatuduhon Jesus huhut panogunoguon tu angka siihuthon Jesus Kristus. Injil Markus manang barita las ni roha on godang marisihon taringot tu huaso ni Tuhan Jesus Kristus, Anak ni Debata. Di bagasan injil Markus on godang do dipabotohon pangajarionna marhitehite 18 tanda halongangan dohot 4 parumpamaon. Jala turpuk on ma sada sian barita pangulaon ni Jesus. Dipatorang do Tuhan Jesus na boi pamalumhon angka na marsahit. Barita Nauli do muse disurat dohot tujuan asa lam porsea halak Kristen mulamula na mangae binahen ni Kaisar Nero na mangalelei angka halak Kristen.

 

II. Hatorangan

Ay. 30-31: Andorang turpuk on isarana Markus 6: 7-13, nunga dipatorang pangulaon ni angka sisean ni Tuhan Jesus ima marbarita nauli manang mangajari, pabali angka sibolis dohot mangubati; jala nunga godang panghobasion dipatupa angka sisean i. Di bagasan pangulaon manang panghobasion ni Tuhan Jesus dohot angka siseanna dilului nasida do partingkian laho mangaso jala asa adong pangarimangon manang Evaluasi tu panghobasion. Disi marpungu do angka apostel i laho manghatai, paboahon sude naniula manang na niajarhonnasida. Disuru Tuhan Jesus do nasida asa sumurut tungkan na suhi. Asa sanga jolo pahosahon saotik manang maradi satongkin mangalap hagogoon na imbaru. Alani torop ni halak na ro tu nasida, gari mangan pe dang pola adong tingki. Alai na nidokna ndada holan mangulon disi, alai mangalehon tingki mangalap gogo marhitehite tangiang tu Tuhan Debata asa dipargogoi mangulahon sude ulaon i. (Bdk. Tuhan Jesus pe hea do tu inganan na suhi laho martangiang ima di Getsemane).

            Ay. 32-34: Dung i borhat ma nasida marparau sumurut tu inganan na suhi. Jadi torop do marnida jala mananda nasida na borhat i, gabe sian darat ma marlojong nasida sian saluhut angka huta i pajolohon tusi. Siala halongangan dohot haporseaon nasida sai diihuthon do Tuhan Jesus dohot angka siseanna manang tudia pe laho. Adong hasiholan ni roha nasida laho marnida jala tumangihon Tuhan Jesus. Dibereng Ibana na torop ni punguan i, gabe asi ma rohana mida nasida, ai songon birubiru nasida na so marparmahan. Marhite turpuk i pataridahon adong antusias manang usaha ni halak siihuthon Kristus laho pajonokhon diri tu Debata. Siala ni ima gabe asi roha ni Tuhan Jesus tu angka nasida. Sudena angka ulaon na denggan ala denggan basa jala asi ni roha ni Debata do, alai haporseaon i do manaruhon hita tu Debata.

 

III. Sipahusorhusoron

1) Diparmahani Debata do Angka na Porsea. Jempek do nian turpuk sadarion alai godang do pangkorhonna. Di bagasan turpuk on dipataduhon Tuhan Jesus do panarihononNa di angka sisean naung tarloja siala dohot mangulahon panghobasion laos diuduti do muse di ayat na mangihut (35-44) ditamuei Tuhan Jesus lima ribu halak.

2) Mangalului Tuhan Jesus. Boi tatanda Tuhan Debata siala na dipatandahon do diriNa tu hita, alai di turpuk on dipatuduhon do hagiot ni jolma na torop i laho mangalului Tuhan Jesus. Di nadeba laho mambege jamitaNa, dinadeba laho marubat, jala dinadeba naeng mamboto taringot tu Tuhan Jesus pola do sampe mangalojong sian darat.

3) Gabe Asi ma roha ni Tuhan Jesus. Nunga dipatorang na tarloja do Tuhan Jesus dohot angka sisean i gabe laho maniding satongkin alai di na dibereng angka na torop i songon birubiru na so marparmahan, gabe asi ma rohaNa jala gabe godang ma dipodahon tu nasida.

4) Panghobasion ni Tuhan Jesus. Tung mansai uli do panghobasion ni Tuhan Jesus na gabe sitiruon ni Huria dohot ganup angka na porsea i ima  na patupahon ulaon isarana: Papunguhon Na torop (Koinonia), laho marbarita nauli manang mangajari (Marturia) dohot mangurupi angka na patut siurupon (Diakonia). Gareja (Parhalado dohot sude ruas) na ingkon lam tangkas mamereng angka ulaon panghobasion na boi dope dipatupa dalan laho pasangaphon Debata jala manghobasi dongan jolma.