PINASUPASU MA RAJA I, NA RO MARHITEHITE GOAR NI TUHAN I DIBERKATILAH DIA YANG DATANG SEBAGAI RAJA DALAM NAMA TUHAN LUKAS 19 : 28 - 40

 

PINASUPASU MA RAJA I, NA RO MARHITEHITE GOAR NI TUHAN I

DIBERKATILAH DIA YANG DATANG SEBAGAI RAJA DALAM NAMA TUHAN

LUKAS 19 : 28 - 40

            Amang Inang na hinaholongan di bagasan Tuhan Jesus Kristus, Somalna molo ro sahalak tamu tu bagasan jabu, pasti do tasambut, mungkin marhite na paiashon angka jabu, mambahen gaba-gaba, dohot angka na asing na boi mambahen las roha ni na ro i. Songon i ma nang di bagasan turpuk on ima songon sada sambutan tu sahalak Raja, Raja na manobus sude dosa ni jolma.

Amang Inang na hinaholongan di bagasan Jesus Kristus, ia Barita na uli na tarsurat di Lukas, ima na laho patuduhon ia Jesus ima Raja Sipalua tu halak Israel dohot tu sude jolma manisia. Injil Lukas marisihon gok barita nauli tu angka na pogos dohot na marsahit. Turpuk on mardomu ma tu naeng jonok na ma parningotan di panaonon ni Tuhan Jesus Kristus na ingkon marsingkor jala mate ibana di hau pinarsilang laho manobus dosa ni saluhut jolma dohot portibi on. Jala on ma sada proses di pardalanan ni Jesus Kristus na laho tarsilang. Minggu Palmarum, na marlapatan maremare songon sambutan huhut pasangaphon di haroro ni Raja Sipalua i andorang so marsitaonon nama ibana. Palmarum songon sada panjanghonon do on tu Tuhan Jesus Kristus na olo manggantihon hita sian uhum alani dosanta. Nunga diparade Tuhan Jesus diriNa sandiri na laho padamehon jolma dohot Debata AmaNa i.

 

Dibagasan Ayat. 28–29: adong na mansai ringkot huhut menarik di haroro ni Tuhan Jesus ro tu Jerusalem di huta Betpage dohot Betagia, jonok tu dolok Jetun. Haroro ni Tuhan Jesus tu Jerusalem mandapot sambutan na uli do Ibana marhite angka na mambahen maremare; mamemakhon ulosnasida, marlas ni roha huhut mangendehon: Pinasupasu ma Raja I, na ro marhitehite goar ni Tuhan i (Hosanna). Jadi tung marsangap do Tuhan Jesus na ro tu Jerusalem i, songon haroro ni sahalak Raja. Ro ibana tu Jerusalem marasing situtu do sian na somal. Sahali on ro do Ibana songon sahalak Raja na naeng dilantik, alai ndada raja songon na dihirim ni jolma ima raja na gogo marporang manang tokoh politik; ndang mamboan podang jala ndang mangasahon gogo ni portibi on.

Ay. 30-35: Haroro ni Jesus ima Raja na mamboan hadameon. Alani i ndang hoda naditunggangi ibana, alai anak ni halode do. Halode na pinangke ni Tuhan Jesus i halode betina jala poso dope. Hatihai, halode dipangke songon transportasi ni masyarakat biasa do i na marlapatan haroro ni Tuhan Jesus i ndang di bagasan kemewahan, alai di bagasan kesederhanaan. Halode i pe tutu ndang pintor adong disi alai na disuru Tuhan Jesus do muse siseanna dua halak na laho mangalap halode na so hea dihunduli i. Didok songon i asa jumpang do songon na tarsurat i naung nibagabagahon ni angka panurirang jala masa do tutu songon na nidok ni Jesus i. Dikesempatan on dipangido Tuhan Jesus saekor halode marhite angka siseanna dohot hata na paposhon siseanNa i na mandok: “Na ringkot do i di Tuhan i”. Huaso napinangke ni Jesus na laho hasangapon ni Debata do di bagasan serep dohot unduk ni roha. Marhite i Tuhan Jesus naeng paboahon ia haroroNa ndang laho mamboan hakorason alai mamboan dame dohot holong ni roha do. Adong sitiruon sian carita i, ima haserepon ni Tuhan Jesus; Debata na olo patoruhon dirina. Digombarhon do Tuhan Jesus songon raja na merakyat, na turun tu tongatonga ni rakyat manang na torop i, na mamboto haporluon ni rakyat jala na marpambahenan na denggan tu rakyatna. Panghobasion ni Tuhan Jesus na gok panghongkopon, haserepon, dohot hasesaan ni dosa.

Ay. 36-38: Panjangkonon tu Tuhan Jesus, dung sahat Tuhan Jesus di Huta Betpage mandapot panjangkonon / panjaloon do ibana di bagasan las ni roha. Dipasangap do Jesus Kristus jala dipahundul di ginjang ni halode i songon Raja Sipalua nasida, jala torop halak pahembanghon ulos nasida tu dalan songon hataridaan ni las ni roha nasida mida Jesus. Adong ma marende-ende huhut marsurak pinasupasu ma Raja i, na ro marhitehite goar ni Tuhan. Las ni roha dohot roha na marolopolop ido dibahen nasida menyambut Tuhan Jesus.

Ay. 39-40: di ayat on dipataridahon do adong halak Parise na mandok tu Jesus asa diorai angka siseanna i na laho marlas ni roha marolop-olop alani Tuhan Jesus, ala dihabiari roha nasida so tung guntur dohot pamarenta Romawi jala biar ni roha nasida so tung bangkit Jesus gabe Raja. Alus pate na nilehon ni Jesus: “Aut mauhom nasida, joujou ma angka batu!”. Sian i naeng idaonta ndang adong na boi mangambat hasangapon ni Debata.

Marhite turpuktaon adong na ingkon Sipahusorhusoronta ima:

1.      Manghaposi Haluaon Marhitehite Jesus Kristus, porlu patoguhon haporseaon ia turpukta on mandongolhon jala mangarahon asa porsea tu Tuhan Jesus ima Raja Sipalua (Mesias), Debata sandiri na olo patutoruhon dirina holan patuduhon holongNa tu ganup jolma. Raja na sederhana, na manghophop jala manuhuk uhum na so tu Ibana hian. Alani i tutu ima argana panobuson dosa na pinatupa ni Kristus, dang songon halak Parise na sai mangalului celah paoruoruhon sangap ni Jesus ala ndang porsea nasida.

2.      Pasangaphon Tuhan Jesus Kristus, molo di bagasan turpuk dipatuduhon do panjaloon nasida di Tuhan Jesus marhite na marlas ni roha jala marolopolop nasida dung ro Jesus. Tung mansai ringkot do manomunomu Tuhan Jesus Sipalua i na mamboan dame dohot pangurason di dosa. Saluhut jolma ingkon pasangaphon Debata, sedangkan halode dipangke Debata, tarlumobi ma jolma tompaan ni Debata na singkop roha dohot pingkiran ingkon pasangaphon Debata. AMEN