Topik: “ UNANG HO MABIAR AHU DO LOMBULOMBUM” 1 MUSA 15: 1-6

 

Topik: “ UNANG HO MABIAR AHU DO LOMBULOMBUM” 1 MUSA 15: 1-6

Amang dohot inang nahinaholongan di bagasan Tuhan Jesus Kristus !

            Buku 1 Musa manang Kejadian / Genesis ima barita taringot tu panompaon ni portibi dohot isina, asal usul ni jolma na parjolo i, jala paboahon hubungan ni Debata dohot jolma ima angka tokoh na tarbarita di Padan na Robi. Sada sian i ima si Abram; Ompu ni nasa na porsea na dihaposi Debata alani haporseaon dohot pangoloionna tu Tuhan Debata. Balga ni haporseaonna na dos dohot pangoloionna umbahen na dihaholongi Debata ibana jala gok pasupasu dijalo si Abram huhut paimahon padan na naeng pasauton ni Debata dope tu ibana. Di tingki panjouon ni Debata na parjolo tu si Abraham (si Abram dope goarna) dohot parsuruon ni Debata asa borhat sian tano hatubuanna Ur Kasdim tu tano Kanaan didok Tuhan Debata do disi: “Hubahen pe ho gabe bangso na bolon, jala pasupasuonku ma ho, jala pabalgaonku goarmu, asa gabe pasupasu ho. Jala pasupasuonku angka na mamasumasu ho, jala toruanku angka na mamburai ho, jala dapotan pasupasu marhitehite ho saluhut angka bangso ni tano on” (1 Musa 12:2-3). Ima Padan ni Debata na parjolo tu si Abraham.

 

Hatorangan ni Turpuk:

            Ayat 1: Unang ho mabiar, Ahu do lombulombum. Tung mansai balga do pasupasu na naeng jaloon ni si Abraham. Alai mabiar do si Abraham ala dang gira saut janji ni Debata taringot tu pinomparna i. Mabiar si Abram ndang adong be ianakhonna ala pardijabuna si Sarai pe nunga tung matua jala ndang mungkin be marianakhon. Tamba muse biarna molo mate ibana, ise ma na gabe panean di jabuna. Ianggo dipingkir rohana si Elieser sian Damaskus nama panean ni jabuna, alai asing do anggo sangkap ni Debata, ndang adong na so tarpatupa Debata. Dialusi Debata do parsorion ni si Abram marhite parnidaan, jala dipapos do rohana mandok: “Unang ho mabiar Ale Abram. Ahu do lombulombum”. Lombulombu manang perisai ima nadipangke tingki marporang maralohon angka musu. Saonari si Abraham ndang boi mabiar ala Debata do na mangaramoti ibana.

Ayat 2-3: Ahama lehononmu di ahu? si Elieser na sian Damaskus na ma sitean bagashu Borat ni panghilalaan ni si Abram ala ndang adong ianakhonna na laho manean bagasna, hape padan ni Debata nangking laho mambahen si Abram gabe bangso na bolon. Sian hajolmaon wajar do mabiar si Abram alani dipergumulhon jala disungkun si Abram do Aha ma lehonon ni Debata tu ibana, jala maksud ni rohana si Elieser naposona na sian Damaskus nama sitean bagasna. Putus asa si Abram ala didok rohana sai na punu nama ibana. Tantangan naniadopan ni si Abram, boi do i gombaran pergumulan ni angka halak na porsea na asing, na sai tarpaima di angka pasupasu dohot bagabaga ni Debata. Padan ni Debata nunga pasti i masa, alai ringkot do tutu asa marsabar laho paimahon angka na naeng sipasahaton ni Debata dope tu ngolu ni jolma. Asa unang sampe mabiar jala mago haporseaonna tu Debata.

Ayat 4-6: Dilehon Debata do Solusi ni angka Parsoalan. Ndang diloas Debata si Abram torus di bagasan biar, alai dipaimbaru do muse padanna tu si Abram. Na gabe panean ni bagasna ima tubu na sandiri, jala pomparan ni si Abraham ndang holan sada alai songon godang ni bintang di langit ma godangna. Dung padan ni Debata I, ujungna gabe porsea do si Abraham tu Jahowa. Sada respon na denggan di pambahenan ni Jahowa ima haporseaon. Haporseaon napinatuduhon ni si Abraham lobi sian logika ni jolma, ibaratna songon si Sarai na boi dope tubuan anak dungkon matua ibana. Haporseaonna i laos ido dietong Jahowa songon hasintongan.

 

Refleksi:

Amang dohot inang unang hita mabiar. Jotjot do hita lomos di bagasan ngolunta. Tarlumobima olo do hita beranggapan: Tuhan ! Nga huulahon angka na denggan, alai boasa parir dope ngolungku !, Boasa dope ro sitaonon !, boasa songonon ngolungku? Dohot angka na asing. Alai songon si Abraham patuduhon ndang adong na so tarpatupa Debata ! Ia Istrina si Sara nunga matua umurna alai boi do ibana tubuan anak. Ima na gabe panean di si Abraham. Na tubu sian daging nasida sandiri, ndang halak na asing.

Laos dison ma dipatuduhon tu hita! Dilehon Tuhan Debata do di hita solusi di angka masalah ni ngolunta. Baik masalah partondion nang pe di bagasan pardagingon, sian on taida Huaso ni Tuhan Debata mangatasi sude hagogoon na adong di portibi on, ndang adong na boi mangimbangi huaso ni Debata.

Amang dohot inang ! Sude jolma do hea mabiar jala holsoan tarlumobi ma i tu angka halak na naung leleng manghirim jala paimaimahon sesuatu hape ndang margira ro. Hangoluan ni halak Kristen olo do masa songon nanihilala ni Abram. Alai disi do tarida kesabaran dohot hagogoon ni halak na porsea i mangadopi angka persoalan ni ngoluna. Alai turpuk on mangingothon pandonganion ni Debata tu saluhut na tinompana sai torus do mardalan. Hata ‘Unang ho mabiar’ berlaku do i asa unang mabiar jolma di kebutuhan na bersifat pardagingon nang partondion. Debata marhuaso di atas ni saluhut na adong jala na umboto pingkiran dohot panghilalaan ni jolma na umbagas pe.

Padan ni Debata na ingkon saut do i sian sudut huaso dohot lomo ni roha ni Debata, ndang sian pamingkirion ni jolma i sandiri. Nang pe sipata maol do mangantusi sangkap dohot dalan ni Debata mangihuthon logika ni jolma. Alai na gabe sitiopan ni halak na porsea, ia padan ni Debata na mardomu do i tu hadengganon, haluaon ni jolma. Parsuruon ni Debata tu jolma sadalan do i dohot padan haluaon na sian Debata. Ndang mungkin Tuhan Debata mangose padanna sandiri, alani i unang ma mabiar, Debata do mangaramoti ngolunta. Amen