PSALMEN 119: 1-8 TOPIK: “MANGARADOTI ANGKA ATURAN NI DEBATA”

 

NATS: PSALMEN 119: 1-8

TOPIK: “MANGARADOTI ANGKA ATURAN NI DEBATA”

1.      Kebahagiaan Sejati (Ayat 1-2)

Sude jolma do tutu mandiori kebahagiaan, alani i molo disungkun ganup jolma marasing be do pandapotna tentang kebahagiaan. Di halak Batak tarbarita do Pangidoan 3 H: Hamoraon, Hagabeon, Hasangapon bahkan di ende ni Victor Hutabarat didok do Anakkonhi do hamoraon di au. Pasupasu ni Debata do tongtong I, na so pola ni parsoadahonon alai ingkon halashonon ni rohanta. Basabasa ni Debata do I na boi pangkeonta tu angka na denggan laho pasangaphon Tuhan dohot mangurupi dongan jolma. 

Ringkot do tahe sude, porlu do tong pangidoan ni angka rohanta asa saut. Alai tutu ndang jaminan I di kebahagiaan ni Jolma. Tarlumobi ma diprinsip hajolmaon na boi bahagia molo dung godang angka arta. Molo dung dapot sada sininta ni roha, sai hurang do torus pangidoan i. Isarana na jotjot taida masa di negaranta: tarbarita do angka pemimpin naung mamora jala marjabatan na timbo, ni bereng roha ndang adong be nian na hurang, hape tong do terlibat angka korupsi. Sian I tutu taida, sasintongna pangidoan ni roha ni jolma ndang I gabe panduan mandapothon kebahagiaan. Nunga dapot sada alai sai torus do jolma I hahurangan.

Parpsalmen mandok: Debata do mula ni pasupasu, kebahagiaan, kejayaan, dohot angka si las ni roha na asing. Las ni roha na sasintongna ima hubungan na denggan dohot Debata, habiaran tu Jahowa laos I do gombaran na denggan tu dongan jolma. Tuhan I do mual ni angka pasupasu jala tu Tuhan I do hita mangido huhut mengabdi tongtong do tu Tuhan Debata i.

Martua ma halak angka na daulat marpangalaho, angka na marpangalahohon patik ni Jahowa. Martua ma halak na mabiar mida Jahowa jala mangulahon lomo ni rohaNa. Hatuaon na sasintongna ima sian Tuhan Debata, jadi Patik I ndang na gabe sada boban ni ngolu alai dalan ni hatuaon do I, asa diarahon ngolu ni jolma tu hadengganon. Martua ma halak angka na mangaradoti angka dalan na pinatupa ni Tuhan Jahowa, angka na mangalului Ibana sian nasa roha. Jadi halak na martua na sasintongna ima halak na mabiar mida Debata jala mangulahon patikNa, laos dihalomohon Debata ma ibana.

2.      Mangaradoti angka Aturan ni Debata (Ayat 3-5)

Sada parpunguan ni masyarakat, sai adong do angka aturan na martujuan laho mangatur angka pangisina. Halak na porsea pe dilehon do Patik songon ‘kompas’ ni ngolu ni jolma, asa diboto tudia ibana mardalan. Dipatuduhon ParPsalmen do dison contoh gaya hidup ni halak na porsea. Mamarangehon Hata ni Debata lapatanna parngoluonna hombar tu lomo ni roha ni Tuhan I, di las ni roha dohot arsak ni roha. Cara hidup ni halak na porsea ima na marojahan tu Tuhan I, marhite na tangi di pangajarion, poda, dohot paminsangon ni Tuhan i.

Songon I ma Parjumpangan ni jolma dohot Debata patubuhon hamubaon dibagasan diri, dimulai mai sian rasa biar dunghon I gabe las ni roha. Parjumpangan ni jolma dohot Debata ndang laho manirang jolma sian Debata, alai diparbisuhi do jolma laho mangantusi Patik dohot sangkapNa.

Di partingkian sisaonnari on, boi do rap mamereng hita di angka hajahaton na lam meningkat: peredaran narkoba na mambahayahon, gerakan terorisme na mamangke goar ni Debata laho mamunu jolma, bahkan mansai godang ajaran-ajaran na mambahen lilu haporseaon ni angka na naung marugamo. Sada hal na mambahen ima, nunga moru biar ni jolma tu Tuhan Jahowa. Alani I do turpuk on, mangorahon hita asa masihol muse tu Tuhan na manompa hita jala marparange songon jolma na sintong. Mangolu di bagasan Tuhan marlapatan mangulahon lomo ni rohana jala pasidinghon angka hajahaton.

3.      Pasupasu ni Debata na gabe Komitmen

Parsitutuon mangihuthon Debata, mampangkorhon pasupasu. Molo nunga dapotan pasupasu, aha nama udutna? Dihatindanghon par Psalmen do: Dung i ndang tagamon tarurak ahu, molo sai huparateatehon sude angka tonami. Pos ni rohana tu Debata, mambahen togu haporseaonna.

Porsea tu Debata ndang na mandok ndang adong be parungkilon dohot angka hamaolon, alai sada hal na pasti ima Jaminan manang pandonganion ni Debata. Huaso dohot Hahomion ni Debata ndang holan hata sambing, alai mampangkorhon do I, ima pasupasu manang torutoru, hatuaon manang uhuman. Sada hal na sai jotjot tapangido di bagasan tangiangta ima pasupasu: ima na marmula sian hata Ibrani ‘brkh’ na marlapatan marsinggang, manang mambahen gabe marsinggang. Berarti hape pasupasu na tapangido sian Tuhan I asa olo do hita pataridahon sikap haunduhon, haserepon ni roha jala somba di adopan ni Jahowa.

Adong pengaruh timbal balik ni pangoloion tu Tuhan dohot pasupasuNa. Sian haunduhon dohot habiaran tu Jahowa I ma marparbuehon pasupasu. Jala sabalikna halak na mangantusi jala manghalashon pasupasuNa gabe pangoloi na marsitutu di bagasan ngoluna, adong komitmen di ibana, laho mangaradoti aturan ni Debata, mandok mauliate tu Debata, naeng tioponna gomos angka poda na sian Debata. Jadi pasupasu ima parbue ni pangoloion tu Debata asa lam porsea hita tu Ibana. AMEN