Tuhan Jesus Do Hangoluan

 

 

Nats	Johannes 6: 51-58
Topik	Tuhan Jesus Do Hangoluan

I. Patujolo

Barita Na Uli (Injil) Johannes nampuna ciri khas ima mangutip pandohan ni Tuhan Jesus na mamangke goar ni angka barang na adong di humaliang nasida songon kiasan laho pasahathon pangajarion taringot tu Ibana dohot Debata Ama tarsongon sagusagu (roti), aek, torang, parmahan, hau anggur, dna. Di bagasan barita nauli Johannes laho pataridahon Tuhan Jesus ima Hata ni Debata na gabe jolma; alai laos Ibana do na marhuaso laho paluahon jolma jala na marhuaso manontuhon upa ni jolma di ari na parpudi jala patandahon Tuhan Jesus lobi tangkas marhite ha-Ahu-on ni Ibana di buku Johannes jala dibagasan na patandahon i dipaboa do godang taringot tu hahomion ni Tuhan Jesus.

 

II. Hatorangan

Ay. 51-53: Turpuk on marmula do sian na nilehon ni Tuhan Jesus mangan 5.000 halak marhite 5 roti dohot 2 dengke jala lobi 12 haranjang. Dung i diihuthon nasida ma Tuhan Jesus laho dapotan sipanganon so pola mangula, alai diboto Tuhan Jesus do rohanasida i. Laos marhite na masa, dipasahat Tuhan Jesus ma pangajarionNa ia Ibana ima roti na mangolu na tuat sian banua ginjang. Manang ise na mangan roti i, mangolu salelenglelengna. Roti na nimaksud ima dagingNa sandiri. Pandohan ‘daging’ gabe mambahen angka Jahudi marsual ala dipingkiri nasida marhite pamatang bahen didok “beha ma bahenon ni halak on mangalehon dagingNa i panganonta?”. Dipaboa Tuhan Jesus do sada rahasia na balga ima holan marhite Ibana do dalan haluaon i marhite na manganhon dagingNa i dohot minum mudarNa i.

            Ay. 54-56: Na mangihut laos dipabagas Tuhan Jesus do hatorangan taringot tu diriNa na gabe roti hangoluan i ima na paboahon hasurungan ni na manganhon roti i: 1) dapotan hangoluan salelenglelengna, 2) na manginum mudarNa paheheonNa sahat ro di ari parpudi 3) na mian di bagasan ibana ido paluaonNa. Sian i laho mangondolhon taruli haulion ma ganup angka na porsea di Ibana jala haulion na pinasahat ni Debata andul ummarga sian na ni lehon ni portibi on.

            Ay. 57-58: Di bagasan ayat 57-58 dipaandar do muse hadirion ni Tuhan Jesus Anak ni Debata Ama jala Debata Ama nunga patar marhite Tuhan Jesus Kristus. Adong angka pangondolhonon na khusus sian Injil Johannes taringot tu hasurungan ni Tuhan Jesus dohot rahasia ia partalian hubungan tu Debata Ama ima holan marhite Tuhan Jesus. Bangso Israel hea taruli roti uju di parhorsikan ima manna, alai Tuhan Jesus ima sipanganon hangoluan na saleleng ni lelengna.

 

III. Sipahusorhusoron

1)                  Tuhan Jesus do sipangonon hangoluan. Tung pe dipangke istilah roti manang sipanganon manang daging manang mudar, ndada dilapati secara harafiah, alai dipasahat Tuhan Jesus pe songoni asa boi sahat jala tangkup tu angka na umbegesa ala borhat sian hangoluan dohot haporluan siganup ari. Molo taharingkothon angka benda na adong di portibi on songon kebutuhan isarana sipanganon dohot siinumon di portibi on alai adong na rumingkot ima sipanganon daging ni Tuhan Jesus dohot siinumon mudar ni Tuhan Jesus.

2)                  Mangondolhon haporseaon tu Tuhan Jesus. Didok Tuhan Jesus taringot tu ha-Ahu-on Na (Ego Eimi) ima laho paboahon na sasintongna Ibana marharoroan sian banua ginjang manang Debata Ama dohot paboahon hasurungon songon upa ni angka na porsea. Marhite haporseaon tu Tuhan Jesus dapot hian haluaon jala asa manongtong haporseaonta di bagasan Ibana. Holan marhite Tuhan Jesus do boi hita taruli di upa na sumurung di ari parpudi na so boi tarlehon ni portibi on.

3)                  Sada di Bagasan Debata. Didok Tuhan Jesus diturpuk on asa manganhon dagingNa dohot mudarNa laho mamodahon asa mangolu hita di bagasan Tuhan Jesus, Jala Tondi ni Debata mian di bagasan hita. Molo tapaandar tu na tinonahon ni Tuhan Jesus ima marulaon na badia; tapanganon do daging ni Tuhan Jesus, dagingNa na dilehon tu hamatean humophop hita dohot mudarNa na diusehon bahen hasesaan ni dosa. Laos ido mangaramoti jala pahothon roha manghaporseai Ibana, asa dapotan hangoluan na so ra suda. Molo porsea jala mangolu hita di bagasan Ibana, ndang magopo haporseaonta i.