Poda 4: 20-27 Benget Mangulahon Lomo ni roha ni Debata

 

Nats	Poda 4: 20-27
Topik	Benget Mangulahon Lomo ni roha ni Debata

 

I. Patujolo

Buku Poda taringot tu ajaran cara hidup na denggan na dipasahat di bagasan sastra na marrumanghon angka poda, umpama, habisuhon. Manang ise naeng lam bisuk ingkon jumolo do ibana mabiar mida Jahowa di bagasan hasangaponNa (Poda 1: 7). Jala i do sada na mambahen halak Israel gabe pistarpistar ala jotjot do nasida manjaha Buku Poda. Marhite poda ni raja Salomo laho mangondolhon asa ganup jolma mangalului bisuk, ai arga do bisuk i. Di bagasan turpukta on dipatuduhon do angka dampak ni habisuhon i tu angka na olo marsiajar, tumangihon dohot mangulahon angka pangajarion.

 

II. Hatorangan

Ay. 20-21: Sada hasurungan ni bangso Israel ima laho mamparrohahon pangajarion. Godang ragam ni pangajarion (Didache) di nasida na mambahen nasida gabe pistar jala bisuk. Alai na utama ima di kecintaanna nasida di pangajarion. Dipangke do saluhut pamatang laho mandapot angka parbinotoan, angka poda asa mamparateatehon Hata ni Debata, mamangke pinggol/ sipareon laho tumangihon Hata ni Debata dohot manangihon angka parbinotoan. Patedekhon sipareon asa tangkas mambege Hata I; manarehon pinggol ndang holan ‘menguping’ alai mambege dohot tangkas. Najumolo ima mambege laos mangalehon roha laho tumangihon Hata ni Debata Parateatehon na marlapatan sahat tu bagasan roha parbagason. Mambege Hata ni Debata dohot tangkas jala sahat tu roha parbasagason. Udutna mamangke mata/ simalolong tu hadengganon, ‘Unang tung sirpang angka i sian matam’. Dilehon Debata simalolong asa boi mamereng asa dipangke ma tu na pantas marnida. Manjaga pamerengan asa unang manimbil sian dalan hasintongan. Mata na gabe pintu masuk ni angka siberengon, rentan gabe godaan masuk tu bagasan dosa, ringkot laho sijamothononton.

Ay. 22-23: Roha na gabe mual hangoluan na dohot manimbangi hasintongan di bagasan diri ni jolma. Roha ma laho manaring angka na masa di bagasan ngolu ni jolma. ‘Ai hangoluan do i di angka na jumpangan disi, jala gabe hahisaron di sandok dagingna.’ Roha termasuk na sentral di bagasan diri ni jolma, roha i do pusat ni hajolmaonta. Roha na gabe dongan ni pikiran manontuhon hasintongan. Mansai arga do roha i, asa dijaga ganup maradophon dirina nang maradophon halak na asing asa unang manegai harohaonna dohot manghansiti roha ni halak. Mamangke roha marhite na boi menguasai emosi. Tangkas tarida parasingan ni na mamangke rohana, songon perumpamaan ni Tuhan Jesus ia halak na marroha na pauli bagasna di atas ni batu, ndada di atas ni rihit (Mat. 7). Na marlapatan tung uli do sude ulaon molo diulahon sian na sa roha. Pangarimangon Hata ni Debata ingkon sahat tu roha ni na umbegesa.

Ay. 24-27: Sian buku Poda tong do dapot etika kehidupan, mamangke pamangan asa unang marpangansi, jala padao bibir sijubajabi. Taringot tu manghatai, ingkon mangarajai pamanganna laho mandok sidohonon. Sian pamangan haruar do hata na denggan dohot na roa, sian pamangan haruar do hata pasupasu dohot bura. Panghataion ni halak na porsea ingkon holang nian sian dosa panghataion: marpangansi, gabus, mamurai, marhata na rorang, dna. Mamangke saluhut bagian ni pamatang dohot sintong, mata laho mamereng tu hatigoran. Mamereng hinaarga ni sude na ruas ni pamatang, ingkon pangkeon ma hombar tu lomo ni roha ni Debata. Disosohon asa gabe halak partigor asa mangajarhon angka poda tu sundut na umposo asa mansomalhon diri manjaga parangena di pamangan dohot pamerengan sahat rodi pangalangka ni pat na ingkon ture. Lapatannna unang manimbil tu dalan na sala, gabe dao ibana sian hasintongan, alai angka na porsea i ingkon marsihohot di bagasan hasintongan.

III. Sipahusorhusoron

1) Mamparateatehon Pangajarion. Tung mansai arga do sikap na olo marsiajar manang mamparaeatehon pangajarion. Sipata gumodang do dapotan halak na manangihon sian halak na manghatai, ala marhite haradeon laho manangihon jumpang ma angka parbinotoan. Songoni do nang maradophon Hata ni Debata, boi tolhas Hata ni Debata ala na tatangihon do. Haoloon laho mambege ido sada dalan ni Hata ni Debata masuk tu bagasan dirinta.

2) Roha: mual hangoluan. Manjaga roha ima sada kualitas ni haporseaon, ala roha dohot do manontuhon parange. Sebagian besar pardalananan ni ngolunta diproses di bagasan roha na diurupi pingkiran dohot simalolong. Didok di ayat 23:” sian saluhut sijagaon i, gumodang ma jaga roham…”. Roha na di bagasan jolma i do dipangke Tuhan Debata laho mansoarahon angka hadengganon di bagasan dirinta.

3) Mangarahon pamatang tu lomo ni roha ni Debata. Pamatang na dibasabasahon Tuhanta naeng ma tapangke laho mangulahon lomo ni roha ni Debata. Songon lagu ni Sikola Minggu na marjudul “hati-hati gunakan (tubuh)mu, karena Bapa di Sorga selalu lihat ke bawah.” Buku Poda on pe manosohon asa manjagahon diri : manjaga panghataion, pamereng, pangalangka, dna. Anggiat nian boi paholang diri sian na maralo tu Debata, gariada ingkon benget mangulahon lomo ni roha ni Debata.