Hasintongan Na Sian Tuhan Jesus

 

Nats	Mateus 15: 1-9
Topik	Hasintongan Na Sian Tuhan Jesus

 

I. Patujolo

Di bagasan Barita Nauli na sian si Mateus; turpuk on Mateus 15: 1-9, ro ma angka sibotosurat dohot angka parise sian huta Jerusalem laho mandapothon Jesus. Haroronasida laho manungkun dohot mangalului hasalaan ni Tuhan Jesus, tarlumobi ma i di na lam tarbarita panghobasion ni Tuhan Jesus jala lam godang na mangihuthon Ibana. Tarbereng ni angka sibotosurat dohot angka parise ma angka sisean ni Tuhan Jesus na mangan hape ndang jumolo mamuri tangan (bdk. Markus 7: 1-23, Lukas 11: 38). Persoalan na so mamuri tangan andorang mangan ima dalan ni angka sibotosurat dohot parise laho manihai Tuhan Jesus na dipadomu dohot alasan ‘adat na sian angka natuatua’. Laos marudut muse alus ni Tuhan Jesus laho paboahon hasintongan dohot pangajarion.

 

II. Hatorangan

Ay. 1-2 ima kondisi ni turpuk na gabe sibonsiri ni panghataion ni angka sibotosurat dohot parise laho manohanoha Tuhan Jesus nang pe borhat sian hasomalan ni halak Jahudi. Dipabangkit halak Jahudi do angka aturanna dohot hasomalan na mengikat tu masyarakat sahat tu angka hal na metmet isarana taringot tu parmanganon songon sipanganon na boi dohot na so jadi panganon dohot na marburi tangan andorang mangan nunga masuk tu ruhut parugamoon dohot simbol habadiaon. Hape Tuhan Jesus mamereng dohot mamastihon ia sipanganon songon na ni maksud ni halak Jahudi i ima horong ni sipanganon na mardomu tu pamatang do jala ndada marhadomuan tu haporseaon (Bdk. Mat. 15: 10-20).

Ay. 3-6: Tardok do halak Jahudi na gogo di bagasan angka ruhut ni uhum dohot adat, alai molo sega dasor dohot pangantusion ni uhum dohot adat i na boi do na gabe mangaliluhon torop jolma songon pangantusion dohot pangulaonnasida taringot tu patik ni Debata na dilipehon nasida. Tangkas do Tuhan Jesus mengkritisi marhite sungkun-sungkun: “… boasa loasanmuna patik ni Debata paingotingot adatmuna i?” dohot na mandok “pinelehon ma tagonan na patut hian pangurupingku di ho, ndang pola be halak i pasangaphon amana manang inana disi.” Gabe disegai halak i do patik ni Debata.

Ay. 7-9: Marudut ma muse Tuhan Jesus laho mangkritisi karakter nasida ima na marpangansi (munafik): na so dos panghataionna dohot pangalahona. Didok muse songon pandohan ni panurirang Jesaya na mandok dipasangap bangso i do Debata marhite pamanganna alai dao do anggo rohanasida jala magopo do nasida na pasangaphon Debata ai poda ni jolma do dipodahon nasida.

 

III. Sipahusorhusoron

1) Hasintongan Na Sian Tuhan Jesus. Sumber parjolo dohot na utama pangajarion ni haporseaon ima Hata ni Debata. Dung lam hembang angka zaman dohot kemajuan ni angka huria lam martamba do pangajarion na borhat sian Hata ni Debata isarana haputusan ni angka bapa-bapa Gereja, jamita dohot angka na sarupa tusi alai diajari Tondi Parbadia do hita laho mamboto angka ajaran na sintong jala hombar tu lomo ni roha ni Debata. Na boi do masa angka pangaliluon mulai sian na jolo sahat tu haduan, alai ringkot do halak na porsea i laho mamboto dohot maniop hasintongan na sian Tuhan Jesus. Disuru asa radot tu Hata ni Debata alai ndang boi laho mangalipehon songon tarsurat di 5 Musa 4: 2 “Ndang jadi ambaanmuna tu hata naung hutonahon i tu hamu, jala ndang jadi oruanmuna sian i, ingkon radotanmuna do tona ni Jahowa Debatamuna i, naung hutonahon i tu hamu”.

2) Na So Boi Palipehon Hata ni Debata. Somal do di bagasan sada diskusi manang pardebatan adong angka perbedaan pendapat ala borhat sian alasanna be (argumen) songon na pinatupa ni halak sibotosurat dohot parise tu Tuhan Jesus, alai di na saluhut angka argumen i ingkon taruji tu hasintongan na sian Debata. Borhat do halak Jahudi i laho mardebat dohot Tuhan Jesus sian hasomalan dohot pangantusionnasida naung sala alai laos dipatingkos Tuhan Jesus. Ndada holan hasomalan (adat manang tradisi) manang angka poda ni natuatua na boi maralo tu Hata ni Debata alai dohot do sipata pingkiran ni hajolmaon, ilmu pengetahuan, teknologi, perkembangan zaman, pengajaran para tokoh na boi sala jala mangaliluhon angka jolma sialani i ingkon pangkeonta ma habisuhon na sian Debata laho mangadopi sisongoni. Tung manang aha pe rupa ni angka pangajarion i, alai na so boi palipehon Hata ni Debata.

3) Pangkeonta ma Sinjata na sian Debata. Saleleng mangolu manisia, saleleng i ma tongtong adopanna angka tantangan jala saleleng i ma ingkon radotanna haporseaon na tu Debata. Sialani i, ingkon pangkeonta ma sinjata na sian Debata laho mangadopi angka dosa nang hajahataon. Dilehon di hita TondiNa laho mangajariajari, dilehon HataNa laho manogunogu hita, dilehon hagogoon maralohon na sa na jat. Holan marhite na nilehon ni Debata i do hita boi tuk manaluhon angka tantangan ni haporseaon ndada na borhat sian portibi on.