HABAKUK 3: 1-6 DEBATA NA SANGAP MANGUHUMI SALUHUT BANGSO

 

HABAKUK 3: 1-6

DEBATA NA SANGAP MANGUHUMI SALUHUT BANGSO

1.      Di Ari Minggu 24 November 2019 sahat ma hita tu ujung taon parhuriaon dohot parningotan ni angka na monding. Di bagasan turpuk on, naeng tabereng ma Panurirang Habakuk marsomba dohot martangiang tu Debata Jahowa siala saluhut na masa ni adopanna. Tongtong diingot huaso  hagoon dohot asi ni roha ni Debata tu bangsoNa uju dipalua ibana nasida sian ragam ni hamaolon, hasusaan dohot parhatobanon jala laos songon angka na masa I ma hita nuaeng marhaporseaon na hot jala togu tu Jahowa Siparmonang, na so dung hea muba i.

2.      Biar Mida Jahowa (Ay. 1-2) Tandi do tangiang ni Panurirang Habakuk on sian barita naung pinatolhasNa di bindu 1-2. Tangiangna I marrumanghon ende; sian panulingkiton ni na bisuk. Habakuk 3 on somal do diendehon di bagas joro di Jerusalem. Marpungu do di joro I raja rap dohot sude bangso I laho pasangaphon huaso dohot sahala ni Debata sitompa sa
luhut portibi on huhut mangido pangaramotionNa na gok haluaon i. di bagasan endena laho patuduhon parsaoran na rosu tu Debata huhut dipangido  asa hot pambahenanNa mian di tongatonga nasida manipat taon. Dipaboa do biar ni rohana dung tangkas dibege barita na binahenNa di ari na salpu tu bangso i.

Panandaon na tangkas di pambahenan ni Debata, ima rimas dohot asi ni roha, ido na mambahen panurirang I mabiar. Alai ringkot do antusanta hata mabiar dison, ndada ala na marsala ibana, alai hata mabiar songon na jotjot dipangke buku habisuhon na marlapatan parange na unduk, huhut pasangaphon Jahowa. Dung I, marlapatan ma I martudutudu tu habuluson ni roha dohot haburjuon mangoloi Debata ni onjar ni haporseaon na polin. Asa parange na mabiar mida Jahowa do ojahan ni haporseaon tu Jahowa. Haporseaon I do nang na boi gabe hapataran mangulahon lomo ni roha ni Debata.

3.      Huaso ni Tuhan Debata. Dilehon Debata na marhuaso I do asi niroha tu angka na mangulahon patik dohot uhumna, alai tu angka na mangalo lomo ni rohana dapotan uhum. Dihatindanghon tangiang ni panurirang Habakuk do huaso dohot habalgaon ni Jahowa. Nunga tarida I marhite haluaon ndang holan di sada partingkian dohot di sada inganan, alai di sandok tano on. Asa ndang holan manudu inganan haroroan na paluahon Israel sian Misir alai dohot do nang saluhut siihuthon Jesus Kristus. Haluaon parjolo ima sian parhatobanon ni bangso na gogo i. jala haluaon na paduahon ima sian parhatobanon ni dosa na jorbut i.

4.      Sipahusorhuson:

Tangiang ni Panurirang Habakuk na parduli tu bangsona laos disi do dihantindanghon ibana habalgaon ni Tuhan Jahowa, mangarahon hita asa tongtong martangiang dibagasan haporseaon na gomos asa mangolu mangulahon lomo ni roha ni Debata. Tongtong mangido asi ni roha ni Debata, ala torus do jolma mardosa, unang ma mansohot hita mangido asi ni roha ni Tuhan i. ndang sae hape mangandalhon hagogon hajolmaon sandiri, alai di bagasan Tuhan gabe boi tarpatupa sude dohot denggan. Amen

Amos 5: 18-27 TINGTING ASA MARSIHOHOT TU DEBATA

 

Nats	Amos 5: 18-27
Topik	TINGTING ASA MARSIHOHOT TU DEBATA

 

I. Patujolo

Amos ima sahalak panurirang sian Tekoa, sada huta sian Israel Utara. Panurirang Amos mangula di tingki harajaon ni si Usia; raja sian Juda (Selatan) dohot di masa ni si raja Jerobeam anak ni si Joas. Si Amos mangulahon ulaon panurirangionna marhite pasahathon Hata ni Debata tu jolma (tu raja dohot bangso i) laho paingothon dohot pasahathon angka lumbalumba ni uhum tu bangso ni Debata naung gok dosa i. Dijou Tuhan Debata si Amos sian ulaonna siganup ari songon parmahan gabe panurirang ala hinaringkot ni tingting paubahon roha jala marsihohot tu Debata. Ndang lomo roha ni Debata di hamamate ni jolma di bagasan dosa, alai sai dipatupa Debata do dalan laho paluahon manisia i.

 

II. Hatorangan

Ay. 18-20: Dipasahat panurirang Amos do saotik taringot tu ari paruhuman na sian Debata. Di Bibel dipangke do judulna lumbalumba taringot tu ari uhum na jonok alai di Alkitab (LAI) dipakengke do judulna hari TUHAN. Marhite hapanurirangonna, dipaboa si Amos do gombaran manang songon pangungkaponna molo ro panguhuman ni Debata. Molo masa panguhumion ni Debata songoni ma posi ni angka sitaonon ni jolma i. Ndang lemba manang marneang ni roha, umbahen na dipingkiri na deba holan angka na panghilalaan na tabo ma masa disi. Adong pamingkiron na masa hatiha i jala sai adong do i sahat tu nuaeng, na mangarajumi ia partingkian haroro ni Debata ima holan hasonangan, lupa nasida ia haroro ni Debata ima mamboan upah dohot uhum. Sialani i do umbahen didok panurirang Amos ari ni Jahowa i haholomon. Molo dung jumpang i, ndang sanga be marhobas, manang istilah ‘paima jolo’ alai panguhuman nama na masa disi.

Ay. 21-24: Denggan situtu do mamuji Tuhan Debata marhite angka parsombaon tu Debata (ibadah) jala ndang boi leas roha tu parsombaon tu Debata. Alai sipata gabe dihasogohon Debata do parsombaon i molo ndang tingkos songon na masa di turpuk on dihagigihon Jahowa angka na pinatupa ni bangso i, biasan roha Na mida ari raya, ndang dihalomohon rohaNa angka parpunguan, sogo rohaNa mida angka pelean, agia pelean situtungon manang sipanganon pe, huhut ndang dihalomohon Ibana be angka puji-pujian. Boasa gabe balik roha ni Debata di angka na pinatupa ni jolma i? Alusna ala dihirim Debata ndada holan parsombaon na marrumang acara (ibadah), alai naeng do jolma i tongtong manomba Ibana marhite hangoluan na sintong. Marhite Panurirang Amos paingothon na pinangido ni Tuhan Debata ima uhum na margilinggiling (keadilan) dohot hatigoran songon sunge na so olo marsik.

Ay. 25-27: Dilumbahon Tuhan Debata do bangsoNa i taringot tu hadadabu nasida tarbuang dao sian Damaskus. Panogunoguon ni Debata marhite na paingothon bangso i andorang so madabu tu uhum, alai molo ndang ditangihon gabe saut ma nasida tarbuang.

 

III. Sipahusorhusoron

1) Tangi Di Soara Ni Debata. Secara khusus di halak Batak adong umpasa na mandok “Tinallik bulung sihupi pinarsaong bulung siala, sotung somolsol di pudi, ndada sipaingot na soada”. Lumbalumba na sian Debata ima sada rumang holong ni roha ni Debata, ndang dihalomohon Tuhan Debata hita madabu tu bagasan dosa, sialani i dilehon Ibana do panogunoguon marhite HataNa, marhite angka Pangajari. Denggan do jumolo patupahon pencegahan na so pinangido ni roha daripada dungkon masa hasesega. Dihirim do asa lam tangi hita tu soara ni Debata, ala tahaporseai do sude sangkap ni Debata ima sangkap haluaon.

2) Mamelehon Ngolu. Songon na diondolhon di ayat 24 ima patujolohon uhum na denggan dohot hatigoran. Dihalohomohon Debata do ia parsombaon tu Ibana, alai naeng do parsombaon i saurdot dohot ngolu ni jolma na mangolu di bagasan HataNa. Pasahathon pelean tu Debata, ndada holan di tingki momen pasahat pelean di bagasan ibadah, alai ngolu i sandiri ima na sa na nilehon ni Debata, tondi, pamatang, hosa, gogo, arta, tingki. Naeng ma ngolunta taarahon songon pelean tu Debata marhite na mangulahon Hata ni Debata. Gabe singkop ma ibadah i molo diuduti dohot holong ni roha tu dongan jolma.

3) Paima ro Ari ni Tuhan. Dilehon Debata tingki parasian tu hita nuaeng asa tapangke nian dohot denggan. Diloas do hita dohot mandai (menikmati) angka na adong di portibi on, alai tongtong do dipaingot hita asa unang lalap. Partingkian na adong di hita, ndada holan nampunanta sandiri, alai partingkian i ima nampuna ni Debata. Sialani i, ndang adong na boi tapangasahon di adopan ni Debata. Tudos tu halak na manabur, ia aha na sinaburna ido sihirimonna laho putihonna. Suang songoni ma molo tapangke tingki laho mangula Hata ni Debata, gabe parsidohot ma hita manghirim di jambar na sian Tuhan Debata.