PSALMEN 69: 30 - 37 LAS NI ROHA DI BAGASAN TUHAN I

 

PSALMEN 69: 30 - 37

LAS NI ROHA DI BAGASAN TUHAN I

1.                  Di bagasan turpuk on, adong pembagian ni syair na marisihon tangiang mangido haluaon (ay. 30 dohot ayat sebelumna). Laos diuduti muse Pujipujian tu Debata (ay. 31-37). Psalmen on gabe ungkapan haporseaon ni parpsalmen ima Raja David na tongon di bagasan situasi angka hamaolon manang parungkilon alani angka musu, alai di bagasan sitaonon na dokdok i tetap do adong hubungan komunikasina tu Tuhan Debata, bahkan pardalanan ni ngoluna na maol i gabe sada inspirasi di ibana laho mamuji angka pambahenan ni Debata. Angka pengalaman ni raja David gabe dibaen dalam bentuk ende dohot tangiang ni na torop di angka parsombaon tu Debata sahat tu na mangarahon bangso I asa ingot tu angka denggan basa ni Jahowa.

2.                  MAMUJI TUHAN DEBATA (AY. 31-32). Ala nunga dipanghilalahon parpsalmen angka huaso dohot asi ni roha ni Tuhan Debata gabe adong ma roha na imbaru laho mamuji goar ni Debata marhitehite ende, laho pasangaphon Debata marhitehite pujipujian. Mamuji Tuhan Debata ala naung sahat do asi ni roha ni Debata jumolo tu hita, gabe pujionta ma Ibana sian roha na marolopolop. Tujuan ni Psalmen ima laho mamuji Tuhan Debata na marrumanghon angka ende, syair, tangiang, dna, ala pamujion tu Debata sada bagian balga doi di peribadatan tu Debata. Pamujion tu Debata na so tarsirang sian na mangalehon pelean, alai ala tingkos do pamujion tu Debata ido gabe halomoan ni Debata asa mida angka pelean situtungon. Sada tujuan ni jolma ima laho mamuji Debata, alai dumenggan do i borhat sian haporseaon, kesadaran, dohot keiklasanna laho mamuji Debata.

3.                  ASI NI ROHA NI DEBATA TU ANGKA NA DANGOL (AY. 30+33-34). Di angka panghilalan ni parpsalmen dison na paboahon taringot tu parsorion ni ngolu na dangol, singkor alai adong di ibana panghirimon patimbulon ni Debata ma ibana di tingkina. Dison psalmen laho mangondolhon asa unang talu halak na porsea ala ni angka sitaonon. Ala didongani Tuhan Debata do ibana di angka hamaolanna; parporangon, musuna, masalah keluargana, dohot angka persoalan na marrongom na ro tu ibana. Pandohan ‘angka na dangol’ di ayat 33 (sian hata anawin di hata Heber) na marlapaton dangol, pogos, pinaburuburu bahkan angka na diasinghon. Alai di angka na manghilalahon sisongoni adong do Tuhan Debata na rade gabe pangalualuan jala pangurupi di hagogotanna. Asa marhite i, halak na manghilalahon sitaonon i gabe marnida tu Tuhan Debata, gabe las ma rohana, gabe hiras ma rohana, ai ditangihon Jahowa do angka na pogos, jala ndang lea rohana mida bangsona na tarbuang i. Sian i do berengon ni angka halak na menderita, ingkon tetap di bagasan pos ni roha tu Debata, adong panghirimon, jala torus marlas ni roha ala disadari ibana; sai na donganan ni Tuhan Debata do ngoluna, jala gabe dapotan hamonangan dohot las ni roha na sian Tuhan i.

4.                  LAS NI ROHA DI BAGASAN TUHAN (AY. 35-37). Gabe dipuji parpsalmen ma Debata ala nunga dilewati hamaolon i rap dohot pandonganion ni Tuhan Debata. Ingot manghamauliatehon pangaramotion ni Debata ala naung monang di angka pergumulan holan ala asi ni roha ni Debata. Diujungna gabe dapot ma haulion naung pinarade ni Tuhan Debata tarsongon na paulihon/ memulihkan huta Juda jala pewaris di angka hadumaon songon na masa di Sion.

Domu tu goar ni Minggu Letare: Marlas ni roha ma hamu. Di halak na porsea, las do rohana alani Debata, jala manongtong do las ni roha i di bagasan dirina. Na marlapatan las ni roha i nunga sada, ‘larut’ tu bagasan diri ni halak na porsea. Las ni roha di bagasan Tuhan ndada be holan angka sipasonang roha (pasupasu na ringkot di parngoluan di portibi on), alai di hahotan (ketetapan) ni roha tu Debata pe nunga sada las ni roha. Boi manahan di angka sitaonon pe termasuk do gabe las ni roha jala panghirimon tu Debata pe termasuk do las ni roha. Antong siala naung sahat tu hita angka pasupasu ni Tuhan Debata, gabe marlas roha ma hita di bagasan ibana, Amen.

 

 

Tag/ Kata Kunci

Jamita, khotbah, bahasa Batak, renungan, Hata ni Debata, Firman Allah, pencerahan, yefta situmeang, yeftalius, evangelium, epistel, HKBP, Protestan, Kristen, Alkitab, Bibel, liturgi, gereja, sermon, Carilah, Tuhan Allah,

 

Psalmen 66: 1-9 Mangulahon Na Denggan tu Saluhut Halak

 

Epistel Minggu	03 Juli 2022
Nats	Psalmen 66: 1-9
Topik/ Tema/ Judul	Mangulahon Na Denggan tu Saluhut Halak

1)      Mamuji Debata. Ia buku Psalmen ima buku na marisi taringot tu pujipujian tu Debata marrumanghon lagu, syair, dna. Psalmen borhat sian angka pengalaman hidup rap dohot Debata na sinurat ni Raja Daud, Salomo, dna. Sudena i mangajak hita asa gabe parsidohot laho mamuji Debata. Mamuji Debata sian ias ni roha di bagasan situasi kehidupanta na marragam tarlumobi las ni roha dohot arsak ni roha na marsorinsorin. Mamuji Debata, nunga gabe kewajibanta siala nunga jumolo pasupasu ni Debata tajalo gabe ingkon tarespon ma i berupa ibadah, marende, mandok mauliate, dna. Mamuji Debata borhat sian las ni roha; tanpa paksaan ala taboto Tuhan Debata do na manompa hita. Mamuji Tuhan borhat sian toru ima haserepon ni roha, ndada sian ginjang manang laho patuduhon hagogoonta manang haadongon secara hajolmaon alai loas ma Debata na diparsangap.

2)      Mangulahon na denggan tu saluhut halak. Di topik minggu disuru do hita asa mangulahon na denggan tu saluhut halak. Ringkot na i tutu laho mangulahon na denggan. Alai porlu taingot di na mangulahon angka hadengganon manang holong ni roha naeng ma marojahan tu holong ni Tuhan Jesus Kristus, so tung ingkon songon prinsip “holong mangalap holong” manang holong sosialis komuni na mangulahon hadengganon alai ndang marroha tondi be nasida. Tahaporseai ndang adong na denggan na boi tarpatupa hita molo so Tondi Parbadia na mangonjar rohanta, alai Tuhan Jesus Kristus do na gabe pandang situjuon gabe tarbahen hita mangulahon holong i. Molo taida dihaholongi Debata do saluhut jolma, hita pe songon sorminan ni Debata ingkon manghaholongi sude jolma.

Pangurupion ni Tuhan Debata. Psalmen on ima Ende sian Si David na sai pasahathon sude parngoluonna tu Tuhan Debata. Na pinatupa ni Raja David ima sai hira anak tu natorasna na pasahathon sude pardalanan ni parngoluonna sian hal na balga sahat tu na metmet, di situasi na genting dohot na somal. Lapatanna hira na so adong batasan ni Raja David laho manghatai dohot Debata. Dibahen ibana pe songoni ala diboto do Debata na tangkas laho paluahon ibana. Songon contoh: dialualuhon Raja David do tu Debata situasi ni ibana na tongon mangadopi ragam ni angka musu (ay. 3 dohot 7). Parngoluan ni Raja David tontu ndang sarupa dohot hita, intap ni na boi pasidingonta do na margoar parmusuon; ai ndang denggan molo adong parmusuon. Alai maksud na disi molo tung adong pe angka hamaolon, asa tapasahat ma tu Debata jala tapangido pangurupion na sian Ibana asa dilehon di hita haluaon, ndada parmusuonna tabereng disi alai tabereng ma haporseaonna na sumurung tu Debata Jahowa. Amen