Jesaya 65: 17-23 HALUAON NA SIAN DEBATA

 

Nats	Jesaya 65: 17-23
Topik	HALUAON NA SIAN DEBATA

 

I. Patujolo

Turpuk Jesaya bindu 65 on masuk ma tu horong trito Jesaya (Proto Jesaya : bindu 1-39, Deutero Jesaya: 40-55, Trito Jesaya: 56-66). Sian i naeng botoonta ia kondisi ni bangso Israel nunga malua sian habuangan Babel jala mulak ma nasida tu Israel jala na gumodang tu luat Jerusalem. Dipangke Debata raja sian bangso sileban ima Persia ima Raja Kores (Cyrus) mamangke huasona laho mangurupi bangso Israel haruar sian Babel. Nunga tung leleng dipaima nasida haruar sian Babel jala mulak tu hutana manghilalahon sada bangso na so ni atur ni bangso na asing. Panghirimon na umbalga ima haluaon nunga sahat tu nasida jala marudut ma muse panghirimonnasida di angka haimbaruon nasian Tuhan Debata asa boi gabe bangso na maduma jala gabe bangso na mardaulat.

 

II. Hatorangan

Ay. 17: secara umum ay. 17 – 23 dipasahat panurirang Jesaya do tona sian Debata marrumang songon pangungkapon, alai ndang termasuk na gabe sada pangungkapon na polin. Dipangke do judulna bagabaga taringot tu langit dohot tano na imbaru, alai langit dohot tano na umbaru i ndada gabe sada harajaon na naeng masa. Lapatanna Pambahenan dohot harajaon ni Debata adong do di sude tingki, mulai sian na robi, saonari dohot haduan ro di saleleng ni lelengna. Pangurupion ni Debata tu bangso i ndada holan di tingki habuangan, alai dung salpu habuangan manongtong do asi ni roha ni Debata. Tung pe pardalanan ni ngolu ingkon mamolus angka hasusaan ro di hamatean alai diujungna sangkap ni Debata gabe singkop jala uli.

Ay. 18-19: Ingkon marlas ni roha di bagasan Debata manang marlas ni roha ala pambahenan ni Debata. Dipasahat panurirang Jesaya do ingkon marlas ni roha bangso I siala nunga malua nasida dibahen Debata jala marudut dope angka las ni roha na naeng jaloonnasida. Diondolhon do taringot tu Debata na manompa; “…Aha ma manompa langit na imbaru dohot tano na imbaru…” dohot “…Ahu manompa Jerusalem…”. Lapatanna Tuhan Debata naeng paboahon balga ni huasoNa asa unang mabiar manang ragu haporseaonnasida. Songon jolma na mamorluhon ‘beking’ (pendukung), somalna gabe lobi pos roha ni sasahalak molo adong bekingna tarlumobi molo bekingna i jolma na hebat. Apalagi ma molo Tuhan Debata na gabe beking di hita, ndang adong be na hurang ala Ibana do na manompa, nampuna dohot na mangaramoti sude nasa na adong. Di ayat 19 i pe didok do “Ahu sandiri pe marolopolop…”. Hasasaut sangkap ni Debata mambahen las ni roha di Ibana dohot di jolma.

Ay. 20-23: Dapotan pasupasu ma angka na niasian ni Debata, marragam pasupasu na naeng lehonon ni Debata ima hahipason dohot ganjang ni umur, maduma ndang hurangan, marpinompari, gabe angka na ni ulana jala gok hasonangan na sian Debata ma nasida.

 

III. Sipahusorhusoron

1) Pos ni Roha tu Debata. Marhite turpuk on disosohon do muse asa porsea manang pos roha tu Debata. Haporseaonta marojahan tu asi ni roha dohot pambahenan ni Debata naung jumolo tajalo isarana haluaon. Songon bangso Israel na malua sian Babel, dohot do bangsonta Indonesia malua sian penjajahan Belanda dohot Jepang. Molo malua (merdeka) sada bangso gabe godang ma peluang nasida laho maju jala marhasonangan, sialani i di sandok portibi pe nunga mangorai penjajahan manang pembuangan ala maralo tu Hak Azasi Manusia (HAM). Marhite naung tangkas pasupasu ni Debata sahat tu hita, hita pe ingkon gabe tangkas marhaporseaon tu Debata. Pos roha tu Debata, ala nunga hea dipatupa angka halongangan; na so hea masa gabe masa laho patuduhon habalgaon ni huasoNa.

2) Marlas ni roha ala ni Debata. Turpukta on manogihon hita asa marlas ni roha siala pasupasu ni Debata naung sahat tu hita. Las ni roha na sian Debata tarida di sude partingkian. Tingki na salpu tapanghilalahon do Debata paluahon hita umbahen gabe marlas ni roha hita, di tingki saonari tapanghilalahon do pangaramotion ni Debata di hita di ngolu siganup ari, panghirimonta muse dilehon Debata hasonangan di tingki na naeng ro gariada ndang holan hasonangan parsatongkinan alai diparade do hasonangan na imbaru ro di saleleng ni lelengna. Sude partingkian boi tapangke laho marhasonangan siala asi ni roha ni Tuhan Debata.

3) Hasurungan ni na niasian ni Debata. Taruli hita parsiajaran sian bangso Israel; Bangso na pinillit ni Debata (A’yim) na boi dipangke songon gombaran ni halak na porsea tu Debata. Mangihuthon sejarah, ndang hea bangso Israel gabe negara adi daya di portibi, alai negara na tung mansai porlu jala berpengaruh do nasida di portibi on. Songon Bangso na pinillit ni Debata boi do nasida madabu tu huaso ni negara na asing alai sai diurupi Debata do nasida laho malua. Suang songoni do angka na niasian ni Debata dapotan hasurungan sian Debata. Molo pe taihuthon Tuhan Debata, ndang gabe ingkon singkop sude hombar tu rohanta, alai donganan ni Tuhan i ma hita, molo pe gabe siihuthon Tuhan Jesus hita, tongtong do adong angka hasusaan na ingkon taadopi, alai nunga dijamin haluaonta.

JESAYA 57: 14 – 21 DEBATA MA MANDONGANI HO

 

JESAYA 57: 14 – 21

DEBATA MA MANDONGANI HO

1.      Di bagasan turpukta on masuk do I tu situasi ni Bangso Israel naung mulak sian Pembuangan jala mulak tu Jerusalem. Halak na baru malua sian angka parsorion ni ngoluna, angka na tarsonggot di partondionna, tongtong do diparrohahon Tuhan Debata. Naeng dipauli Debata ma muse angka padan (janji-janjiNya) tu Bangso I. Tujuan Utama ni Tuhan Debata ma ima laho mangarahut angka na porsea tu Ibana di bagasan holong ni roha, alani I ma marpamuati do roha ni Jahowa, marulak-ulak do holongNa tu angka manisia. Godang ma cara na binahen ni Jahowa laho padengganhon bangsona; diapuli ibana do bangso I asa unang mandate so marpanghirimon.

 

2.      DIPAMALUM TUHAN DEBATA DO NASIDA. Marhite Raja Kores, dipalua Tuhan Debata do Bangso Israel boi mulak nasida tu Jerusalem. Hape dung sahat di Jerusalem godang dope sitaonon na ingkon adoponnasida hampir di sude bidang: Krisis ekonomi ala baru mulak sian Babel, gok hapogoson, ndang marjabu na layak. Diparrohaon pe tong godang hajahaton, penipuan, persekongkolan. Diparugamoon pe tarboanboan dope parsombaon tu dewa Baal, pembangunan bagas joro pe ndang tarpatupa. Alani  I ma godang ma na marsak, maheu pola sahat tu na mandele ala ndang gira sae angka permasalahan ni ngolu. Dison Panurirang Jesaya pataridahon hadirion ni Debata : Debata Na Sun Timbul (Yang Maha Tinggi), Na Sun Marmulia, Na Marhabangsa Salelenglelengna, dohot Pargoar Na Badia laho patuduhon Tuhan Debata i: adong do, eksis, marhuaso, marhagogoon jala sahat tu tongatonga ni Jolma. Dison do na jotjot tarlupa hita, molo ro angka sitaonon gabe kalang kabut, pingkiran ndang tio, hape adong do Tuhan Debata na marhuaso di atas ni saluhutna. Di turpukta on: Sian dolok habadiaonna I, Sai Ro do Tuhan Debata (Omni Present) laho pangoluhon tondi ni halak na serep marroha dohot pangoluhon halak parroha na magopu.

 

3.      ASA MARHAMUBAON NI ROHA. Dapotan hata apulapul do nasida sian Tuhan Debata, asa olo pauba dohot paundukhon rohanasida tu Debata. Balga ni asi niroha ni Debata tarida do I, dina olo Ibana mandungdung panghilalaan ni jolma pola didok: “Atik tung mandate maon tondina sian jolongku dohot roha angka na hujadihon I” (ay. 16). Ndang marisuang Hata ni Debata I, sian angka Hata ni Debata, hata sipasingot, sai adong do na manangihon jala paubahon rohana, gabe sangkan ma asi ni roha ni Debata tu ngoluna. Pangapulion sian Tuhan Debata tetap do nampuna tujuan na positif, naeng dijou do jolma I paubahon rohana songon ni dok ni Hesekiel 33: 11 tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana. Antong sai mulak ma hamu tumadingkon dalanmuna angka na jahat i!. Maksud ni hukum sasintongna ima mambahen panjoraon tu angka na sala. Molo ala ni padokdokhu sitaononna marpanatap do Tuhan Debata Jahowa jala sian pamotoanNa do sude i. Tarida ma disi Tuhan Debata na manogunogu, mangapuli dohot pamalumhon/ memulihkan. Di balga ni asi ni roha ni Debata laho manesa dosa, laos disi do tongtong jongjong hasintongan, keadilan ni Debata. Dung jumpang tingki paruhuman, angka parjahat na so paubahon rohana pe dapotan do hombar tu naniulana. Sialan i halak na dihaholongi Debata gabe marhagogoon na imbaru laho maralohon dosa i.

 

REFLEKSI: DEBATA MA MANDONGANI HO. Ingkon porsea jala marpos ni roha do hita tu Debata na diboto Tuhanta I do saluhut na masa di portibi on. Diangka situasi hamaolon, parungkilon, dna ingkon tongtong do marojahan tu Tuhan Debata sandiri. Halak na porsea sarupa do I dohot halak na mamangke kompas. Manang didia pe posisina, ianggo arah letak mata anginna manang situjuon tetap do I hot. Na marlapatan manang boha pe kondisi ni parngoluanta (suka manang duka), alai ianggo tujuanna tetap do ingkon tu Tuhan Debata. Disi ma naeng tabereng, sitaonon ima torus do masa saleleng mangolu di hasiangan on, alai halak na porsea ingkon manghilalahon Immanuel: Debata do mandongani. Di taon parasinirohaon on godang dope angka donganta na mamorluhon pangurupion sisongoni; mangalehon semangat tu angka na patah semangat, mangapuli angka na marsak, mandulo na marsahit, dna. Sian I gabe adong ma kesadaran laho mangalusi angka na mandok: ditadingkon Tuhan I do au, hape sasintongna turpuk on pataridahon holong ni Debata na singkop tu jolma manisia, pola do ingkon diapuli, diapoi jala dianjuanju manisia I asa olo paubahon rohana.

PSALMEN 69: 30 - 37 LAS NI ROHA DI BAGASAN TUHAN I

 

PSALMEN 69: 30 - 37

LAS NI ROHA DI BAGASAN TUHAN I

1.                  Di bagasan turpuk on, adong pembagian ni syair na marisihon tangiang mangido haluaon (ay. 30 dohot ayat sebelumna). Laos diuduti muse Pujipujian tu Debata (ay. 31-37). Psalmen on gabe ungkapan haporseaon ni parpsalmen ima Raja David na tongon di bagasan situasi angka hamaolon manang parungkilon alani angka musu, alai di bagasan sitaonon na dokdok i tetap do adong hubungan komunikasina tu Tuhan Debata, bahkan pardalanan ni ngoluna na maol i gabe sada inspirasi di ibana laho mamuji angka pambahenan ni Debata. Angka pengalaman ni raja David gabe dibaen dalam bentuk ende dohot tangiang ni na torop di angka parsombaon tu Debata sahat tu na mangarahon bangso I asa ingot tu angka denggan basa ni Jahowa.

2.                  MAMUJI TUHAN DEBATA (AY. 31-32). Ala nunga dipanghilalahon parpsalmen angka huaso dohot asi ni roha ni Tuhan Debata gabe adong ma roha na imbaru laho mamuji goar ni Debata marhitehite ende, laho pasangaphon Debata marhitehite pujipujian. Mamuji Tuhan Debata ala naung sahat do asi ni roha ni Debata jumolo tu hita, gabe pujionta ma Ibana sian roha na marolopolop. Tujuan ni Psalmen ima laho mamuji Tuhan Debata na marrumanghon angka ende, syair, tangiang, dna, ala pamujion tu Debata sada bagian balga doi di peribadatan tu Debata. Pamujion tu Debata na so tarsirang sian na mangalehon pelean, alai ala tingkos do pamujion tu Debata ido gabe halomoan ni Debata asa mida angka pelean situtungon. Sada tujuan ni jolma ima laho mamuji Debata, alai dumenggan do i borhat sian haporseaon, kesadaran, dohot keiklasanna laho mamuji Debata.

3.                  ASI NI ROHA NI DEBATA TU ANGKA NA DANGOL (AY. 30+33-34). Di angka panghilalan ni parpsalmen dison na paboahon taringot tu parsorion ni ngolu na dangol, singkor alai adong di ibana panghirimon patimbulon ni Debata ma ibana di tingkina. Dison psalmen laho mangondolhon asa unang talu halak na porsea ala ni angka sitaonon. Ala didongani Tuhan Debata do ibana di angka hamaolanna; parporangon, musuna, masalah keluargana, dohot angka persoalan na marrongom na ro tu ibana. Pandohan ‘angka na dangol’ di ayat 33 (sian hata anawin di hata Heber) na marlapaton dangol, pogos, pinaburuburu bahkan angka na diasinghon. Alai di angka na manghilalahon sisongoni adong do Tuhan Debata na rade gabe pangalualuan jala pangurupi di hagogotanna. Asa marhite i, halak na manghilalahon sitaonon i gabe marnida tu Tuhan Debata, gabe las ma rohana, gabe hiras ma rohana, ai ditangihon Jahowa do angka na pogos, jala ndang lea rohana mida bangsona na tarbuang i. Sian i do berengon ni angka halak na menderita, ingkon tetap di bagasan pos ni roha tu Debata, adong panghirimon, jala torus marlas ni roha ala disadari ibana; sai na donganan ni Tuhan Debata do ngoluna, jala gabe dapotan hamonangan dohot las ni roha na sian Tuhan i.

4.                  LAS NI ROHA DI BAGASAN TUHAN (AY. 35-37). Gabe dipuji parpsalmen ma Debata ala nunga dilewati hamaolon i rap dohot pandonganion ni Tuhan Debata. Ingot manghamauliatehon pangaramotion ni Debata ala naung monang di angka pergumulan holan ala asi ni roha ni Debata. Diujungna gabe dapot ma haulion naung pinarade ni Tuhan Debata tarsongon na paulihon/ memulihkan huta Juda jala pewaris di angka hadumaon songon na masa di Sion.

Domu tu goar ni Minggu Letare: Marlas ni roha ma hamu. Di halak na porsea, las do rohana alani Debata, jala manongtong do las ni roha i di bagasan dirina. Na marlapatan las ni roha i nunga sada, ‘larut’ tu bagasan diri ni halak na porsea. Las ni roha di bagasan Tuhan ndada be holan angka sipasonang roha (pasupasu na ringkot di parngoluan di portibi on), alai di hahotan (ketetapan) ni roha tu Debata pe nunga sada las ni roha. Boi manahan di angka sitaonon pe termasuk do gabe las ni roha jala panghirimon tu Debata pe termasuk do las ni roha. Antong siala naung sahat tu hita angka pasupasu ni Tuhan Debata, gabe marlas roha ma hita di bagasan ibana, Amen.

 

 

Tag/ Kata Kunci

Jamita, khotbah, bahasa Batak, renungan, Hata ni Debata, Firman Allah, pencerahan, yefta situmeang, yeftalius, evangelium, epistel, HKBP, Protestan, Kristen, Alkitab, Bibel, liturgi, gereja, sermon, Carilah, Tuhan Allah,