LITURGI NATAL BAHASA
BATAK SEHARI-HARI
Liturgi I.
1. Uli jala singkop saluhut tinompa ni Debata, alai Tung mansai bisuk do si bolis i loho mangelaela jolma na parjoloi, ai late do rohana marnida hinadenggan ni parsaoran ni jolma na parjoloi dohot Debata. Alani pangolaosion nasida di patik ni Debata, gabe marhusor ma ngolu nasida marnida sian na sonang gabe parungkilon, sian ngoluna pinasurung gabe nani huhum.
2. Di pataridahon Debata do rimasna tu jolma i. Marhitehite parungkilon na bolon na pola mambahen dung marhasonangan ngoluna. Jala bahenonhu parbadaanmu dohot boruboru i. Ro di pinomparmu tu pinomparna ibana mangalisathon ulum, gabe parguton mu tambihulna.
3. Buni do dosai di roha ni portibion, nang di roha ni jolma. Hape ianggo di Debata dang adong na holip. Obuk sabiji pitik sian simajujungta on di boto Debata do. Memang molo tasadari do dirintaon. Sasintongna ndang talup be hita di Debata boasa hudok songoni? taidama lam tu godang na do angka na mangulahon hajahaton, Jala ndang mabiar be di uhum.
4. Taida ma muse. Holong ni jolma nuaeng nungga lam ngali, lam dao, lam so adong, namar keluarga pe nunga marsiseatan, masiagatan, masilatean, ndang lao roha na mamingkiri uhum aha si jaloonna di ari sogot.
5. Molo sai nirimangan, dang hapingkiran, lamos do roha, bohama tu angka tingki na naeng ro dope ninna roha mai. Ai dang adong na umboto na naeng masa sogot, Holan on nama, nunga marpadan Debata, songon na didokna : Jahowa do siparmahan au ndang tagamon hurangan au.
Liturgi II
6. Nang pe naung porsuk do hilala jolma i ngolunai. Paet ala hancit, sai unang nian lupa jolmai. Paboa tongtong do di asi i Debata. Jala marpangulahi rohaNa di angka na mardosa. Asa dapotsa tumpal hangoluan.
7. Antong sai olo ma hita manangihon saora ni Debata marhite hatana, sai olo ma hita togihonon ni angka dongan tu angka ulaon na denggan anggiat marhite siani gabe dapotan hita di ngolu na denggan. Atik tahe ! Ndang na hasuhatan balga ni holong ni roha ni Debata, inganan na mansai uli di jolma di sarihon do dohot angka sipanganon nasida na tabo.
8. Nda ido tutu : Hape ianggo nuaeng “mutung do siborok mangalului angka guluanna” mutung do nang rohani jolma mangalului na tau hangoluanna. Alai masa pe sudena on holan alani hisap ni jolma na parjolo ido. Mula ni singkat mabarbar, bonsir ni padan matutung.
9. Eee, tahe tung na mongkusma jolmai ate? Sude do naeng daion na, sude naeng botoonna, diahut do nang naso jambarna diahut nang naso bagianna. Molo pinangtangkas jala molo pinarrohahon angka pangalaho ni hita jolma nunga lam tu jorbutna.
10. Mansai godang bangkobangko na manghorhon hasusaan. Dia do ulaning hasusaani, Eee..... ondo: sahit manular! roha biar, hagangguon, late, gabus, manangko, korupsi … alai na jumorbut ndang parduli be tu Debata.
11. Gabe mago ma jolma i hinorhon ni hisapna, sahat tu sadarion laos ido dosa na umbalga, ala so boi di rajai dirina, sandok tung na mongkus do jolmai. Tung alani pangalaosion ni jolma na parjolo ido umbahen na bangkol di hita roha hasadaon i.
12. Ima da! ndang tuduon sada, tung sude do, ai dang adong imbar nii tung saluhut do pardosa, jala ndang dapot pujian ni Debata hita. Jadi hamu angka dongan ! molo sai tapasiding bangko namardosai, mulak do hita tu hasonangan na pinarade ni Debata, dibaheni, tagogo ma pasidingkon bangko ni dosa na jorbut i.
Liturgi III
1. Parasi roha jala pardengganbasa do Jahowa ndang lomo rohana mida hamatean ni jolma nangpe di laosi napanatikkonNa, di bagabagahon do na ingkon ro Sipalua tu portibion. Ndang na meret Tungkot sian si Juda, manang paruhum sian holangholang ni patna paima si silo. Jala ibana do ihuthonon ni angka bangso.
2. Dungi ruarma sada tunas sian tungkot ni si Isai. Jala marparbue sada tubis na tubu sian uratna. Jadi songgop ma tu Ibana Tondi ni Jahowa, Tondi ni habisuhon dohot Tondi ni hapistaran. Tondi ni panuturion dohot hagogoon, Tondi ni parbinotoan dohot biar mida Jahowa.
3. Tarida ma sian on. Umbalga do hape holong ni Debata sian rimasna, di uhum pe jolma mardalan do holongna dohot panatapna dingolu ni jolma. Jala alani ulaon asi ni roha ni Debata, ndang lomo rohana, marujung tu hamatean angka natinompaNa i.
4. Tangkas do dipasahat bagabagaNa, ingkon ro Sipalua, paluahon jolma sian dosa dohot hamatean. Nunga dipatorang nangkin. Alai di paboa muse songon dia haroro ni Sipaluai, asa pintor boi nian ditanda jolma, jalo pintor ungkap nian rohana manjalosa.
5. Molo tabereng di panurirongan ni si Jesaya didok do : Simbur di Ibana tubu songon tunas sian tano na mahiang, ndang hinauli ni rupana manang hamuliaonna idaon umbahen sihalomohononton Ibana. Di leai jala di pasiding jolmai do ibana, pala ditabunihon jalma bohina marodophon Ibana di bahen leana.
6. Angka panurirang na asing pe nunga marboaboa taringot tu haroro ni Mesias i, rodi inganan hatutubuna tahe nunga dipaboa panurirang Mika ai didok do : ingkon tubu Sipaluai di huta Betlehem.
7. Alai ianggo ho ale Betlehem Efrata. Pametmet hu do ho nian. ianggo tung pola jujuron sian marribu – ribu huta di Juda, hape sian ho do haroroni panggomgomi di Israel.
Liturgi IV
1. Ragam dope tahe di bahen Debata mangalumbahon haroro ni Sipalua i ai pola di na naeng jumpangi tingkina, disuru Debata dope patujolona si Johannes pandidi na pangidohon anggiat di pauba jolma rohana.
2. Di Jamita ni si Johannes Pandidi pe tangkas do didok: Taringot tu Sipalua i ai didok do, songon soara ni na manjoujou di halongonan mandok: Pauba hamuma rohamuna ai nunga jonok Harajaon Banua Ginjang.
3. Ahu, aek do didihon tu hamu mondok paubahon roha. Alai andul gumogo dope naro sian pudingku, gari mamboan sipatuna hurang tama dope ahu. Didihon ni i do tu hamu Tondi parbadia.
4. Jala didok do muse : “Ida ma” Na ro ma angka ari sogot, ninna Jahowa patindangonku ma disi sada tumbur na tigor, na bangkit Raja jala na pistar, jala hajongjonghononna ma uhum dohot na hatigoran di tano i.
5. Jala halomohonna do hadaulaton maradophon Debata, jala ndang manguhum Ibana marguru tu parnidaan ni matana, Jala ndang manguhum Ibana marguru tu na binege ni pinggolna.
6. Marhitehite hatigoran tahe uhumonna angka na pogos jala marhitehite hasintongan patingkosonna uhum tu angka na dangol di tanoon. Jala marhite Tondi ni bibirna bunuonna angka parjahat.
7. Olo tahe, tutu doi, tung di dia anama dapot ahu hasintangon i? Nunga tung malungun situtu ahu tu Sipalua i, dingolungku parsatongkinan na gok hasusaan on. oh ....... Tuhan tatap ma ahu pardosa on.
Liturgi V
1. Torop do jolma na pardebatahon dirina dohot portibion, di pingkir rohana ibana na ummalo, umpistar, na humebat. Hape ndang marlapatan. Torop nai jolma holan mangasangkon habisuonna, hajongjonganna, dohot pangkatna, hape tung sisoada doi saluhutna martimbanghon Debata Jahowa na sun songkali.
2. Tabereng ma panggogomi songon kaisar Agustus, disangkapi rohana do mamilangi jolma na nirajaonna, ido asa di parentahon, asa umbaen sude mulak tu bona ni pinasana. Aha do ulaning maksud na disi ? Roha ni Kaisar Agustus laho pasauthon angka sangkapna marhitehite Huasona. Ai ingkon sude do naeng nean unduk tu huasona. Hape Debata pargogo naso hatudosan, ido parhuaso situtu.
3. Alani ro ma hamu, pamanat hamuma huaso dohot hagogoon ni Debata na sumurung i, ai sian Ibana do haroroan ni huaso ni angka na targoar parhuaso. Ibana do na tumompa saluhut, dohot mangatur huhut marmudumuduhon saluhut na tarida nang naso tarida pe.
4. Marhitehite Hata ni Jahowa do manjadi angka langit, jala marhitehite hosa ni pamanganna sude angka paranganna. Sandok dipatuk do saluhut nasa ulu ni tot na di banua ginjang dohot na di tano on. Ibana papunguhon angka aek di laut i. Songon timbunan. Dibahen. Sai marhabiaran maradophon Jahowa ma sude tanoon, jala marsomba tu Ibana ma sude pangisi ni Portibion.
5. Nang sian mulana Debata do najumadihon saluhut marhitehite HataNa, ai saluhutna i, marhite sian Hata ido umbahen na manjadi, jala ndang adong nanggo sada sian na manjadi i, naso marhite Hata i, ima Debata.
6. Nunga tangkas tatanda Debata, pargogo naso hatudosan, parasiroha na sumurung do tutu. Ndang tongtong Ibana marrimas, ndang tongtong Ibana manguhumi. Alai ditahi marpamuati do di angka dosa niula ni jolma, naeng pasuangonNa. Marsangkap do Debata ro tu portibi on, manopot na di Ibana, alai di na ro i Ibana, hape ndang ditanda portibion Ibana.
7. Alai manang piga na manjanghon Ibana tusi do dilehon huasa asa gabe Anak ni Debata nasida. Ima angka na so tubu sian mudar manang sian sangkapsangkap ni baoa, tung sian Debata do. Dungi gabe daging ma Hatai jala maringan ditongatonga ni hita on, jadi huida hami ma hasangapon ni Anak sasadasa na sian Ama i, gok asi ni roha dohot hasintongan.
8. Nang pe sipata, dipapitung portibion do pikiran ni angka na so porsea asa unang nasida di patiur sondang ni Barita Nauli, na taringot tu hasangapon ni Kristus na tardok suman tu Debata. Ai Debata do mandok hatiuron i sian haholomoni, Ibana do patiurhon roha nami. Pabinsar porbinotoan disangap ni Debata, na di bagasan bohi ni Kristus. Tuhani do Tondi. Jala ia disi Tondi Tuhani disi do haluaon.
9. Alai anggo hita saluhutna, angka na sinondangan i hasangapon ni Tuhani so hunghup bohinta, paubahonna ma hita. Gabe tudos do rupana, mandapothon ragam ni hasangaon marguru tu Tuhan ni Tondi i. Alani marlas ni roha situtu do ahu dibagasan Jahowa, marolopolop do tondiku dibagasan Debatangku ai nunga di uloss on tu ahu hatuaon, baju hatigoran.
Liturgi VI
1. Papatarhon bagabaga ni Debata, i do tujuan ganup ngolu ni jolma ima marhitehite angka panurirang na tumimbul i. Holong ni Debata ido na umbalga, diuhum Debata pe jolmai, ndang na so holong rohana, ala magigi do Ibana mamereng na roa i. Alai ido na umbahen so marujung rimas dohot umum paminsangoni. Jala ndang olat ni i ulaon asi ni rohana, gabe jolma sihasogohononthon, dibagabagahon do ingkon ro Sipalua i, paluahon jolma asa singkop las ni rohana.
2. Alani ido didok, mandok muliate ma hamu di Ama i, naung patauhon hamu manjalo tohap hatiuron i ima : hasesaan ni angka dosa. Di tean angka na badia ido hatiuron, marhite naung di roro hita sian halolomoni, Jala di paunsat hita tubagasan harajaon Anak dohot halomoan ni rohaNa. Dibagasan Ibana do adong di hita haluaon i. Ima hasesaan ni angka dosa. Ibana do suman tu Debata naso tarida i, naparjolo tubu sian nasa na adong.
3. Tangkas do di patorang Debata, songon dia haroroni Sipaluai, asa pintor boi nian di tanda jolma, jala pintor ungkap nian rohana be laho manjalosa. Di paboa do .. ia Mesias na naeng roi, i ma na paluahon hita sian dosa. Ndang holan i, adong dope na asing ima : Na tarida dohot naso tarida. Di halongangan. Tutu ma tung mansai halongangan do tutu, patut do didok:
4. Bagas nai hape hapistaran dohot habisuon ni Debata tung si boi tarantusan ni hamaloon ni hajolmaon. Di jolo ni saluhutna do Ibana, jala saluhutna i do di tompa marhitehite Ibana jala marhapatean tu Ibana. Na tutu situtu do hape didok: Jahowa Sebaot, ima Debata Pargogo naso hatudosan.
5. Songon dia do Pangaradeon di Hatutubu ni Sipalua i. Ima marhite na dipantangkas Debata do bagabagaNai tu jolma marhite panurirangon dohot angka na asing, Asa mangarade jolma di hatutubuni Sipaluai. O, hamu angka donganku unang sai marsak manang mandele rohanta, holan na sai mamingkiri dosa i, Ai di parbagabaga Debata do paulakonna jolmai tu hasonangan.
6. Nunga pola mariburibu taon, ndung di parbagabaga Debata Sipaluai. Jala nunga margantiganti angka partogi ni angka bangso di tano on. Sadihari do haroroNa? Andigan do haroroNa? Jala Songon dia do HaroroNa? Iba pe, nunga pola dohot ngolgolan laho paimahonsa nang pe leleng di roha ni hita jolma alai saut doi patupaon ni Tuhan di naso panagaman ni roha ni hita jolma na galeon.
7. Ima da, tung halongangan situtu do na masai, ia nang pe so pamotoan ni angka raja dohot na sangap nang na pistar haroro ni Rajai alai di atur Debata do marhite huasona. Toho ma da, tutu tung di atur Debata do angka raja na di portibion gabe ulaulaNa, laho patulushon sangkapNa. Asa saut tubu Sipaluai, jala tangkas di hatindangkon ise do ibana di ngoluni torop jolma.
Liturgi VII
1. Torop do jolma naso manjanghon Ibana, alai nang pe songoni ndang sundat tahi ni Debata, mamboan dalan haluaon di ngolu ni jolma, ido umbahen si Maria na gabe hatubuan ni Sipaluai.
2. Lumbalumba ni Debata tu si Maria, sian Ibana do sorang Sipalua i. Tung tarsonggot situtu do rohana di hatai. Ai so adong dope di tanda Ibana baoa, ido asa ro hata mandok bohama parjadi ni i Tuhan: Ai so adong hutanda baoa.
3. Alai di boto Debata hian do sudena i, ala namarbaju dope Ibana huhut polin rohana ido asa di pillit Debata. Jala ndang olo Debata paurakkon na pinillitna, alani di papos Debata roha ni si Maria ai didok do
4. Linggoman ni Debata na tumimbul i do ho. Disi didok Debata songoni ndang manjua be si Maria. Ai pos situtu do rohana di Debata gabe didok ibanama : naposo ni Tuhan i do ahu sai saut ma nanidokmi.
5. Tutu do antong ndang di pasombu Debata si Maria gabe jolma si paduruon. Di patorang Debata ma sangkapNa marhitehite nasida na dua asa unang di tulak si Josep si Maria gabe dongan saripena.
6. Ndang manjua si Josep di sangkap ni Debata, ndang di tulak Ibana si Maria, gabe sautma nasida na dua natoras ni Jesus. Saut ma nasida tarpasu-pasu sian Debata, jala toho ma na nidokni panurirangi: ingkon tubu Sipaluai sian pomparan ni Juda.
7. Borhat ma si Josep dohot si Maria sian luat Judea tu Betlehem, loja nasida mardalan, alai ndang mandele, nang pe managam haroan si Maria. Di na sahat nasida di huta Betlehem nunga golap ari, jala dang adong be inganan na laho parmianan nasida.
8. Ujungna gabe di baranipinahan nama inganan parmianan nasida, lea nai.... Hansitnai.... partubuni Sipalua i, alai sudenai manggombarhon na ingkon taonon ni jolma doi alani dosa. Tubu ma Jesus di baranipinahan, ndang adong jolma na mangingani, nda holan si Josep dohot Simaria
Liturgi VIII
1. Lam rarat do barina nauli i, ima Barita taringot tu hatutubu ni Jesus. Ndang holan di luat Judea barita hatutubu ni Sipaluai, sude portibion on do tahe umbotosa, laos tabegema liturgi na domu tusi.
2. Nunga ro be tingkina, nunga saut nanidok ni angka panurirang, na tuturon ni Debata langit dohot tano, laut dohot darat. Maribak langit ni langitan, ala holong ni Debata. Nunga magargar langit ni langitan di tonjorhon surusuruanNa, di na mamolus mandapothon hajolmaon i, maningtinghon Barita las ni roha, parsaulian ni huta ni si David, Sipalua hajolmaon, ima Kristus Tuhan i
3. Toho di tonga borgin tubu Sipalua, ima laho manggobarhan haholomon, ala ni dosa: Songon portibion na holom, tompu tiur ala sinondang ni surusuruan na ro sian Banua Ginjang. Songon ima roha ni jolma na holomi. Dipatiur haroro ni Sipalua i, tuat do surusuruan paboahon barita halalas ni roha godangi.
4. Marlas ni roha ma ho ale hajolmaon. Na mian di na holom, ai nunga ro hatiuron na sai pinarsinta mi. Mariaia ma ho ale hajolmaon, nasai lulululu jala diordior, ai tangkas ma idaonmu jumpang ho ma saluhut na ni luluanmi.
5. Marolopolop ma ho ale hajolmaon, songon ursa nabinuru, na mauas di mual hangoluann i, alai ndang pola mauas be ho molo di inum ho sian aek hangoluani. Ima panjangkonon di sipalua i, Kristus na sian Debata.
6. On do na tiningtinghon ni surusuruan i di na nidokna: “Barita halalas ni roha. Di pataru angka surusuruan do tingki i. Jala hohom ma nasida mamereng jala paintehon panjaloon ni hajolmaon. Mangihuton panagaman ni roha nasida di banua ginjang na ingkon marsuraksurak, marendeende jala marolopolop ma jolma i ala naung ro Sipalua na pinarsintasinta ni rohana
7. Alai marasingasing do pangkirimon ni angka parangan parbanua ginjang laos so adong do panjaloon sian hajolmaon i, angka parmahan naung umbege barita halasan ni rohai laos tungkap do, hinorhon ni biarna.
8. Godang ni tua ni angka parmahani, ndang masoksok di bahen rupa habadiaon ni pardisurgo i, Nunga di tingtinghon pardisurgo taringot tu halalas ni roha i nian, alai laos so adong panjaloon sian huta Betlehem.
9. Di tagam angka surusuruan na di banua Ginjang do, pintor paimaon hehe pangisi ni huta Betlehem laho mangendehon Raja na baru sorangi, laho pasangaphon Debata alani denggan ni basaNa.
10. Alai marisuang do, laos tinggal modom do pangisi ni Betlehem i laos so adong na mallingik, na ingkon tatangisan maho ale betlehem so adong na mallingik, na ingkon tatangisan maho ale Betlehem angguhan maho ale hajolmaon?
Liturgi IX
1. Ro Sipalua ho, ro na pinaimaimam, ro naeng pabosur ho, ro naeng mangalehon aek hagoluan tu ho, hape so pardulihon ho. Nanggo manadinghon podomanmu so olo ho.
2. Ndung so adong Panjaloon sian hajolmaonni, atikpe alani hajolmaon i nian, umbahen na olo marlea Raja ni hamulioni, ndang tarpainteinte pardisurgo be panjaloon sian jolmai.
3. Beha do ia ho sandiri? Beha do panjalom di Raja na imbaru sorang i, atik na mangodang hu do hita di lungkupi angka pardurui, gabe so adong lao pingkiranta tu maksud dohot tujuan ni pestanta.
4. Sotung gabe lupa hita di tujuan ni pesta on, alani na loja hita na mangurus pesta on, hebo do hita mengguruhon angka ende na uli na mardomu tu pestaon. Hebo do hita mangguruhon angka ayat-ayat sipajojoron, hebo do hita mangajari angka dakdanak sihobasan, alani angka maringkot na di portibion.
5. Hebo do hita pajengkarhon pestanta, marsiadu do hita asa pestanta na dumengang jala na jumagar. Hamu angka dongan ndang na mandok sala hita, alai biar rohangku, sotung laos haluaoni binahen ni hariburoni.
6. Posoposo i do na naeng pestahononta, alai jotjot gabe habalgaonta tapatuduhon, gabe so marguna sude usahanta.Unang so tarida be sihalashonontai, gabe holan hata mandok “Selamat Hari Natal”.
7. Asa unang ma songon i be ianggo nuaeng, tahalashon taringot tu posoposo na tapestahonon nuaeng. Unang ma Gabe holan songon sipalensem, eme na masak di gagat ursa, ba ia i na masa, ima ni ula” ima na holan na marsipaulaula. Ndada sisongon i na ni igil ni Debata di pesta Natal.
8. Alani Boha do bahenonta Unang magopo pestanta? Asa marguna punguanta di ganup hita marsada-sada nang tu natumangihon? Tangkas ma tajanghon posoposo na tubu i di rohanta. Mian jala mangula Kristus i di ngolunta, ima na tau hangoluan dohot haluaonta.
Liturgi X
1. Di parrohai Debata do angka na pistar sian luat habinsaran na ro manopot Jesus. Di Patuduhon Debata ma tu nasida bintang na mansai torang situtu jala mardalan ma nasida paihuthiut bintang i sahat tu huta Jerusalem.
2. Di atas ni Jerusalem mago ma bintang sian parmerengan nasida. Ujungnya laho ma nasida tu raja Herodes manungkun inganan ni raja na imbaru tubu i, ai bintang ni raja ido na ni ida nasida. Jala na ingkon anak ni raja ido na tubu didok roha nasida.
3. Tarsonggot situtu Raja Herodes, ai so adong tubu anakna, alani i disuru ibana ma angka siboto surat laho mengalului manang na adong tarsurat di Bibeli taringot tu raja na baru tubui.
4. Sahat ma angka parroha nasian purba tu huta Betlehem di somba nasida ma Jesus i, songon sada tudutudu doi na ingkon sude do jolma ro marsomba tu Jesus i. Tu parmahan na di ladang Efrata pe di paboa taringot tu hatutubu ni Sipaluai. Tangkas do di paboa disi na dapotan tua angka na olo gabe halomoan ni Debata.
5. Alai anggo raja Herodes tarsonggot do umbege barita i, ai dirimpu ibana songon harajaonnai, harajaon ni Jesus i, didok rohana, munsat harajaon sian ibana, alani, tubuma roha jahat di si Herodes, dipauliuli ma bohina mandok: molo ndung jumpang hamu rajai, paboa hamu ma tu ahu, asa dohot au marsomba tu Ibana.
6. Tabo do begeon hatai, jala lambok situtu, hape ianggo di rohana nunga tung marurat hajahaton, ai bunuonna do posoposoi.Alani ido hape asa didok: marjea ma parmahan angka na mangago dohot paserakkon birubiru na pinarmahanna ninna jahowa. Dibahen didok Hata ni Jahowa: Debata ni Israel dompak parmahan na marmahan bangsongku. Nunga di paserak hamu punguanku jala di onjar hamu, jala ndang di matamatahon hamu nasida.
7. Ida ma, luluhononku ma tu hamu, hinajahat ni pambahenan muna ninna Jahowa, jala papunguonku ma pasipasi ni punguangki sian saluhut luat haambolongan nasida. Ida ma, na ro ma angka ari sogot ninna Jahowa, patindanghonku ma disi sada tumbur na tigor, na bangkit raja jala na pistar, jala hajongjonghononna ma uhum dohot hatigoran.
8. Hasasaut ni haluaon tu bangso ni Debata, di angka arina dapotan tua ma Juda, jala Israel marsonang-sonang di ingananna, jala adong goarna dohonon ni halak: Jahowa Parpintoranta” Di baheni ida ma: Na ro do angka ari sogot ninna Jahowa ndang be dohonon nasida: songon tutu na mangolu Jahowa na manogihon Israel ruar sian tano Misir.
Liturgi XI
1. Ida ma: Ndang boi paotootoon Debata, ndang boi holan uli ni bohi dohot tabo ni hata tu Debata, ai dibereng Debata do sude roha parbagasan i. Di na laho mulak angka parroha na sian purba i, tangkas do nasida di pangkulingi Debata, unang pola laho be nasida mandapothon raja Herodes.
2. Dung sai tarpaima-ima Raja Herodes, hape ndang ro parroha sian purba i muruk situtu ma Ibana, di jouma angka soridadu, jala di parentahonma, asa dibunuh sude angka dakdanak na marumur 2 taon tu toru, ai hira 2 taon dope di etong umur ni Rajai
3. Masa ma angguk bolon di sandok Judea, nung golap pamerengan ni si Herodes ala ni huaso parsatongkinani, nengel pinggolna, so di bege angguk-angguk ni natoras ni dakdanak i. Boasa masa angka i? On ma alani pangiburuon, alani biar haportibion, di rohana unang adong na tumimbo sian ibana.
4. Toho doi, lupa do si Herodes di hata namandok: samalomalo ni jolma adong dope na ummalo. Satimbotimbo ni pangkat di jolma adong dope na tumimbo sian ibana, sasangapsangap ni jolma adong dope na sumangap sian Ibana.
5. Antong boasa masa pangalaho ni si Herodeson? Ido na nidok nangkin. Mabiar ibana di saingi, sotung gabe tarbuat sian ibana ha-kaisaron nai alani Jesus naung tubu i, ro tu portibi on. Gabe Raja ni angka Raja.
6. Otonai tahe huaso ni portibi, pola ingkon buaton hosani torop dakdanak posoposo, ai ndang di pingkiri be dosa ulaning? alai dia ma tahe dohonon Nunga golap parnidaanna. Dang diida be hatiuron, sao ditanda be haluaon
7. Alai ndang roha ni jolma na saut, sangkap ni Debata do, Ai andorang so humusor dope sordadu Herodes nunga di suru Debata si Josep dohot si Maria mamboan dakdanaki tu Misir.
8. Malua do Jesus sian sangkap hajahaton ni portibi on, jala mangolu do Kristus Sipalua i sahat tu tingki on, ai ingkon saut paluanonna jolma na olo manjalo Ibana, alai jolma naso olo manjalo ibana gabe mate salelengni lelengna.
Liturgi XII
1. Torop do halak Jahudi, Farise, Saduse, lumobi Sibotosurat, na manulak Tuhan Jesus, ala mamereng tarombo ni hajolmaon, alani Ginjang roha nasida gabe maoto jala ndang di ingot nasida angka hata ni panurirang, maoto do nasida alani na mangkaporluhon hasangapaon portibion, gabe ditulak nasida Jesus jala dilului dalan pamatehon Ibana
2. Sian tongatonga ni sisean ni Jesus sandiri tahe adong do na majehehon Ibana ima: si Judas Parjehei, holan alani na gulut di hepeng, dijehehon ibana Jesus. Nang nuaeng godang jolma songon si Herodes dohot si Judas na barani manundali Debata holan alani arta nang hasangapon portibion.
3. Alai adong do na manjalo Jesus sian nasa rohana, pola diseahon ngoluna parsatongkinan i, asal mandapot hangoluan salelenglelengna dibagasan jesus, angka ima, jolma na talup mamestahon hatutubu ni Jesus.
4. Jala tarsonggot do rohangku tu jolma na maringan di huta betlehem, i ma ndung matua na mangoar si Hyronimus dohot dakdanaki di pingkiran sude angka pangkataionna di surathon do alani taihuthon ma jola pangkataion nasida.
5. Andingan pe, jala marhitehite ahama boi baloshononku sude pambahenanmu tu ahu ai pola tubu ho dibagasan haleaon alani ahu. Hubegema posoposoi mangalusi ndang apala adong di parsinta rohangku naeng tamba pogos jala tamba lea dope ahu saholan di dolok Getsemane
6. Didok di Hyronimus ma: ingkon adong do silehononku tu ho ale Tuhan hulehon ma nasa arta na adong di au tu ho. Di alusi Posoposo i ma sian mula ni mulana, ahu do nampuna sude Mas, Sere, Perak dohot nasa na adong di portibion. Artam naeng lehehonmu tu ahu, antong lehon ma tu angka na pogos.
7. Didok si Hyronimus ma mangalusi humbahen pe nanidokmi. alai ingkon do adong lehononku tu Ho. Molo sai diparsinta roham ingkon adong lehononmu tu ahu, antong lehon ma tua ahu sude nanisegaan mu saleleng ngolum, sude dosam angka naroa dohot na jahat lehon ma sude tu ahu
8. Asa disungkun si Hyronimus ma posoposoi: tu aha huroa bahenonmu angka dosangki? asa husesa jala asa dapot ho hangoluan na salelengnilelengna, i do didok posoposo i. Alani talup ma hita masisesaan dosa, asa dapaot hasesaan ni dosa hita, jala dipalua Kristus. Amen
Tidak ada komentar:
Posting Komentar