MARKUS 15: 22-32 AMPE TU JESUS DO BURA NI DOSANTA

 

MARKUS 15: 22-32

AMPE TU JESUS DO BURA NI DOSANTA

1.            Diparsilangkon do Ibana (Tuhan Jesus) Ay. 22-24. Pardalanan ni Tuhan Jesus laho mangoloi parsuruan ni Tuhan Debata Ama laho manobus dosa ni jolma manisia tung mansai porsuk. Tapaihutihut do i di Minggu Passion, alai di bagasan turpuk on dipatorang Injil Markus do na diboan Tuhan Jesus tu dolok Golgata (lapatanna: Partangkurahan) laho diparsilanghon. Godang nai haporsuhon naniae ni Ibana, tung singkop do penderitaan na ingkon dialami Tuhan Jesus; ima kekerasan di bagasan fisik dohot psikis, ai dohot do Tuhan Jesus dileai disi. Tingki didok Tuhan i: Mauas au, dilehon nasida ma tu Ibana anggur na marsaor mir na asom i. Dungi dibagi ma angka abitna; tondung do dibahen laho pasagihonsa asa saut ma Hata ni Debata taringot tu na so jadi ribahon juba ni Tuhan Jesus alai gabe diundi (Mazmur 22: 19). Penyiksaan dohot haleaon ingkon dalanan ni Tuhan Jesus laho paluahon jolma pardosa, pola do ingkon tarsilang ibana. Silang I gabe tanda ni holongNa na so hasuhatan ganup manisia.

 

2.            Tuhan Jesus Raja ni Jahudi (Ay. 25-28). Di halak Israel, Pandohohan Tuhan Jesus Raja ni Jahudi ima songon bentuk panginsahion tu Jesus. Alai ndang sian dirinasida umbahen masa songoni. Disukkun Pontius Pilatus do asa paluaonna Jesus, alai dialusi Tuhan Jesus do ndang adong huaso ni si Pilatus di Tuhan Jesus, ai sian Tuhan Debata Ama do huasoNa. Dihasogohon angka malim I do molo didok Tuhan Jesus: Rajani Halak Jahudi. Alai ndang sian jolma laho mangongkui Jesus gabe Raja alai na ro sian Debata Ama dohot Tondi Porbadia do haRajaon ni Tuhan Jesus. Rap dohot Ibana diparsilangkon nasida dua panamun, sada di siamunna, sada di hambirangna. Gabe jumpang ma na nidok ni Surat i: "Tarrajum do Ibana tu halak parjahat. Di hau pinarsilang i sai hira parjahat do Tuhan Jesus (Jesaya 53: 2), alai ima hahomion ni Debata patuduhon holong ni rohaNa tu portibion. Alani i Tuhan Jesus ndang gabe ‘korban hukuman romawi’ manang ‘tuntutan ni halak Jahudi’ alai saluhutna pardalanan ni Tuhan Jesus I ima sangkap ni Debata laho paluahon jolma. Alanii ma tangkas do Tuhan Jesus na gabe Mesias Sipalua, Raja jala Anak ni Debata na so pola be diraguhon. Tuhan Jesus sandiri do mangalehon diriNa humongkop jolma na torop i.

 

3.            Diinsahi ma Ibana (Ay. 29-32). Humongkop hita gabe diinsahi do Tuhan Jesus. Adong istilah baru na jotjot tabege di tingki na parpudi on ima Bully/ Bullying na marlapatan pambahenan na manginsahi, paoruhon sangap sahat tu na mangagohon rasa percaya diri na boi mambahen gabe maila bahkan stress. Adong muse Persekusi ima pangalaho na roa, manusai dohot penganiayaan sian sahalak manang kelompok tu halak na asing. Lobi sian ima tahe na dipanghilalahon ni Tuhan Jesus ujui, disi adong do angka soldadu, sintua ni malim rap dohot sibotosurat, panamun na tarsilang rap dohot angka pamolus laho manginsahi Ibana. Dipandoki nasida: Pe Ho, na mangalohai bagas joro i jala na pajongjongkonsa di bagasan tolu ari!. Tutu hea do didok Tuhan Jesus songoni alai  ndada Bagas Joro secara fisik maksudna, alai Ibana sandiri do na hehe sian hamatean di ari patoluhon. Nang pe insakinsak nadijalo ni Tuhan Jesus alai ima peran na umbalga di haluaon ni jolma. Tuhan Jesus ma singkat ni Bagas Joro laho padamehon jolma tu Debata.

 

4.         Ampe tu Jesus do Bura ni Dosanta. Sitaonon dohot hamamate ni Tuhan Jesus, ndada holan tu halak Jahudi, alai dohot do nang tu hita ro di saluhut halak na porsea. Di Jesaya 53: 4-5 didok: Tongon do angka sahitta diusung ibana, jala angka pardangolanta diporsan; alai anggo rohanta mandok: Debata do maminsang, mamungkul dohot pasipal ibana. Hape ala ni pangalaosinta ibana tartullang, binahen ni hajahatonta ibana mabugang. Ampe tu ibana pinsangpinsang parhitean ni hasonanganta, jala binahen ni bugangna malum itahilala. Ima bidang ni pangkorhon ni hamamate ni Tuhan Jesus jala mambuktihon na tutu do Tuhan Jesus: Mesias, Raja na pinaimaima laho paluahon portibi on. Diporsan Jesus do Silang i gabe singkatta laho manobus angka dosa, asa taargahonma mudar na durus di hau pinarsilang i. Marhite pambahenan ni Tuhan Jesus i ma olo nang hita manaluhon dosa dohot sibolis jala dapotan ngolu na imbaru.