LUKAS 6: 27 - 36 HAHOLONGI MA MUSUM

 

LUKAS 6: 27 - 36

HAHOLONGI MA MUSUM

1.         Injil/ Barita Nauli on ima na sinurathon ni si Lukas hirahira taon 62 M. Sada pokok naditekanhon di bagasan Injil Lukas laho paboahon angka barita nauli tu kaum marginal: angka na marsahit, angka na pogos, angka na so mardihadiha, angka na lea, dna. Ditujuhon ibana do Injil on tu halak Jahudi dohot tu halak Non Jahudi, asa unang adong parbadaan manang parsirangan diantara ni halak na porsea dohot laho patuduhon hasadaon di bagasan Tuhan Jesus Kristus. Jala marhite turpuk on do taida pangajarion ni Tuhan Jesus tu natorop na mangondolhon songon siihuthon Jesus ingkon manghangoluhon holong  ni roha na polin.

 

2.         Haholongi ma Musum (ay. 27-28). Di poda ni Jesus di turpuk on na pinatolhas ni si Lukas mambuka simalolong nasida paboa sude jolma do dongan termasuk halak na lea (Hatoban, bdk. tu Epistel 3 Musa 25 39-43), jala na tumimbo sian i dope dohot do angka jolma na so dongan ima angka musu, halak na maralo dohot na manghosomi na manginsahi hita ingkon haholonganta. Pangajarion ni Jesus on patuduhon ia haroroNa tu portibi on ndada holan tu sahorong jolma manang bangso alai tu saluhut halak do gariada tu saluhut natinompa. Asa parange hatiuron na naeng tiruon ni ni halak Kristen na nidokna di turpuk on ima, parange di bagasan holong ni roha na mamolin. Ai parmusuon do na mangaribahi parsaoran ni jolma tu donganna jolma gabe so adong be pardomuan, hape tu jolma angka na manghosomi, na marsogo ni roha, ingkon dohot ma haholongan. Alani i unang ma hata bura dohot insakinsak bahenon tu dongan alai ingkon marhite pasupasu ma baloson. Dison adong 3 sikap laho manghaholongi musu: ima a) patupa ma na denggan tu na mangkosomi hamu, b) Pasupasu hamu ma angka na mamburai hamu, c) tangiangkon hamu ma angka na mangasupi hamu.

 

3.         Hasurungan ni Ajaran ni Tuhan Jesus (ay. 29 – 34). Disi tabege nangkin turpuk I, pintor tapikkiri manang tadok do: Maolna i! Gariada manghaholongi keluarga maol, tarhona dope manghaholongi musu. Pangajarion ni Tuhan Jesus tardok ekstrim, tung mansai marasing sian angka pangajarion ni tokoh-tokoh na asing. Alai sian I dipangido Tuhan Jesus do hita ingkon tandi sian portibi on. Molo na somal: Holong mangalap holong, manang istilah sabalikna mata ganti mata, gigi ganti gigi. Tabereng ma tingkat holong ni Tuhan Jesus na tumimbo sian angka na asing. Aut sura dibahen tingkatan ni holong, songon on ma gombaranna:

1) Sada kewajaran do manghaholongi angka na manghaholongi hita, patupahon na denggan tu angka sibahen na denggan (ay. 32-33), alai angka parjahat i pe, songon i do pambahenna.

2) Alai tung luar biasa/ andul do marasing molo dipastap hurum, ingkon tarehon on sambariba nari, molo dibuat ulos, unang jua bajubajum. Ido na tumimbo, Manghaholongi musu songon na niajarhon ni Tuhan Jesus: na gabe Sipalua tu halak si Parjahat dohot Pardosa, manangiangkon halak na mamparsilangkon ibana: pola didok: Ale Amang! Marpamuati ma roham mida nasida, ai ndang diboto nasida na binahennasida i. (Luk. 23: 34).

 

4)         Gabe Parasiroha ma Hamu (ay. 35-36). Roha na gok asi roha ima  na patuduhon sikap diakonal ni Jesus songon parmahan na peduli na mangharingkothon pangurupion dohot haluaon, angka na tarduru, na pogos dohot naso mardihadiha.  Ai dang marimbar holong ni roha ni Jesus tu  saluhut jolma. Jala i ma naeng tiruon  jala sihangoluhon ni halak Kristen di tingki on. Hata holong na dipake dison ima Agapao (Yunani): manghaholongi, patupahon na denggan so manghirim di balosna. Tongon ma songon na nidok ni Rom 12: 20-21: Onpe, jumpa male musum, lehon ibana mangan; jumpa mauas ibana, painum! Ai songon na pagukgukkon gara do ho tu atas uluna, anggo dibahen ho songon i. Unang ma talu ho dibahen hajahaton; alai taluhon ma hajahaton i marhitehite na denggan!. Patupahon parasinirohaon na so pola manghirim balosna tu ho, ai Ido gabe gabe angka anak ni Natumimbul di jolo ni Tuhan i. Sabalikna tung so jadi manghasogohon manang marhosom maradophon angka musu, tongtong do ingkon ditangiangkon ala hadaulaton ni Tuhan Debata na mamaloshon saluhutna i. Dipatuduhon tu hita sada nilai na dumenggan sian na denggan, molo nunga gabe parholong roha na saleleng on, ingkon meningkat ma parasinirohaon, molo nunga tapatupa manghaholongi dongan, olo ma hita tongtong manghaholongi musu. AMEN