MARKUS 12: 1-12 JESUS DO BATU PARSUHI

 

MARKUS 12: 1-12

JESUS DO BATU PARSUHI

1.         Barita na Uli na sinurathon ni si Johanes Markus sekitar taon 60-an Dung M, laho patoguhon haporseaon, mampargogoihon nasida asa marsihohot jala rade manaon angka sitaonon alani haporseaonna tu Injil ala di tingki i masa ma pangaleleon, penyiksaan dohot pembunuhan tu angka halak na porsea di zaman ni Kaisar Nero. Dipaingot si Markus parngoluon na paet i songon ngolu ni Tuhan Jesus na mangalewati angka sitaonon, hamatean dohot haheheon. Di bagasan turpuk on, dipangke Tuhan Jesus do sada parumpamaan taringot tu Sahalak nampuna porlak anggur na marsuru angka naposona ro di anakna laho manjalo parbue ni porlakna sadeba tu angka pangula (penggarap). Turpuk on pe dohot manggombarhon halak Jahudi na maol manjalo hadirion ni Tuhan Jesus Kristus.

 

2.         Disuru Debata do angka naposoNa (ay. 1-5). Di umpama na pinasahat ni Tuhan Jesus, adong ma sahalak nampuna porlak anggur jala dipauli ibana do porlak anggurna i. Diupayahon ibana do patupahon na dumenggan tu porlak anggurna i; songon patupahon handang humaliang, manghali pangilangan, paulihon gudangna. Singkop dibahen porlakna i dungi dipasahat ma tu angka pangula asa manghirim ibana adong dapotan sian hasil ni porlakna i, dung i marhutasada ma ibana. Hape balik do na dapot sian panghirimon ni ibana, ndada parbue ni porlak i dapot ibana apala saotik, sabalikna naposo nasinuruna laho manjalo hasil ni porlak i, gabe ditangkup, dipukpuhi, laos mulak boti do dipaulak. Dung i diulakkon ma marsuru naposona na asing tu nasida, alai dilombut do nang i jala dileai. Jadi disuru muse sahalak na asing, alai dipusa do anggo i; dung i lan dope angka na asing disuru, na deba dilasahi, na deba dipusa nasida. Sian mulana pe disuru Debata do angka suruanNa, naposoNa tu tongatonga ni portibi on, alai ragam do na masa tu nasida. Di Padan Na Robi dipabangkit Debata do angka Panurirang, Malim, Raja-Raja, Panguhum. Di Padan Na Imbaru dipabangkit Debata do angka Apostel alai adong do na hona tolak, dipukpuhi, sadeba mate alani haporseaonna tu Tuhan Jesus (Martir).

 

3.         Dilehon do AnakNa na sasada I (ay. 6-8). Dung disurui angka naposona hape ndang berhasil. Disuru tuan nampuna porlak i ma muse anakna na sada hinaholongan ni rohana, ai ninna rohana do: Ra biar ma rohanasida mida anakki!. Alai martahi-tahi hajahaton do angka pangula I mandok : On do panean! Beta ma, tapusa ma ibana, asa di hita siteanonna i! Gabe ditangkup nasida ma ibana, dipusa ma, jala didanggurhon tu balian ni porlak anggur i. Panghirimon ni tuan nakking asa muba do angka pangula i, hape anakna sandiri pe tong do dipusa. Turpuk on manggombarhon Tuhan Debata na mangalehon anakNa na sasada I ima Tuhan Jesus Kristus. Didok di Johanes 3: 16 Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana. Dia ma tagamon bahenon ni tuan parporlak anggur i? Ro ma ibana mangalengsehon angka pangula i, dung i pasahatonna ma porlak i tu halak na asing. (ay. 9). Halak na porsea i gabe dapotan haluaon, alai ditingkina hona uhumma angka parjahat i na so mamboto mandok maulite jala naeng mangarajai na so artana. Asa lam sadar ma angka halak na so manjangkon Tuhan Jesus dohot pangajarionna di bagasan ngoluna, ai Ibana do Anak ni Debata na gabe dalan haluaon.

 

4.         Jesus do Batu Parsuhi (ay. 10-12).  Pandohan "Ia batu na binolongkon ni angka pande bagas i, nunga i gabe batu parsuhisuhi. Nang pe ndang tarjalo sebagian halak Jahudi hadirion ni Tuhan Jesus, gariada ditulak jala dibolonghon. Ndang gabe halangan di Tuhan Debata laho pabangkithon Tuhan Jesus na gabe batu parsuhi. Batu na mansai togu, na gabe dasor, na tung mansai penting jala marguna laho padirihon Harajaon ni Debata. Anak ni Debata I ma na gabe ojahan ni saluhut halak na porsea jala mual ni haluaon. Saluhut huaso nunga dipasahat Tuhan Debata tu Tuhan Jesus. Lam tarida ma angka bagabaga taringot tu Tuhan Jesus, gabe lam mabiar ma angka malim dohot siboto patik ala nunga saut Nubuat ni Panurirang na di Padan na robi. Gabe dilului nasida ma dalan manangkup Ibana, alai mabiar do nasida mida natorop i. Ala torop do angka pangihut dohot halak na porsea tu Tuhan Jesus disi, laos laho do nasida manadingkon Ibana. Umpama ni Tuhan Jesus laho laho patingkoshon pangantusion ni halak Jahudi na mambahen haluaon songon nampuna nasida sandiri, gabe leas rohana mambege Hata ni Debata, jala manulak AnakNa ni Debata ima Tuhan Jesus Kristus. Di turpuk on naeng dipasahat do tongtong di angka pardalanan ni Tuhan Jesus na ingkon marsitaonon humongkop jolma pardosa, alai na hehe sian hamatean do Ibana muse laho paboahon Ibana do Tuhan. *AMEN*