LUKAS 10: 38 - 42 HADAULATON DI ADOPAN NI DEBATA IBADAH YANG BENAR DI HADAPAN ALLAH

 

LUKAS 10: 38 - 42

HADAULATON DI ADOPAN NI DEBATA

IBADAH YANG BENAR DI HADAPAN ALLAH

1.         Barita na Uli na sinurat ni si Lukas laho Patuduhon barita las ni roha tu angka na pogos, dohot tu angka golongan na metmet na so mardihadiha. Na ro do Tuhan Jesus Sipaluai ndada paluahon halak na porsea sambing manang na sangap di portibi on, alai dohot do tu angka halak na diasinghon (marginal). Dipamasuk si Lukas do pardalanan ni Tuhan Jesus tu sada huta (Betania) na jumpang dohot si Maria nang si Marta laho mangajari hinaringkot ni mananda dohot mangihuthon Tuhan dohot cara na sintong.

 

2.         Tumangihon Hata ni Debata (ay. 38-39) Di bagasan agama, nunga torop na mananda Tuhanta Jesus Kristus, alai di bagasan hasintongan godang dope tutu na so mangantusi aha do pangidoan manang maksud ni Tuhan Jesus di angka na mangihuthon Ibana. Songoni ma na masa di si Marta nang si Maria pe. Rap adong do respon / tanggapan nasida tu Tuhan Jesus, alai marasing. Marta gabe sibuk do marhobasi paradehon saluhut na ringkot laho manomu Tuhan Jesus ro tu Jabuna. Hape si Maria di bagasan roha na tenang hundulhundul do di jolo ni Tuhan i tumangihon hataNa. Rap ulaon na denggan do na pinatupa nasida, na sada repot laho manghobasi na sadanari tumangihon hata ni Tuhan Jesus. Alai dia do na dumenggan sian dua respon nakking i. Kisah ni si Marta nang si Maria nang mamboan hita di pilihan na dumenggan (terbaik) jala hombar tu na pinangido ni Tuhan Jesus. Di ayat on laho mandok asa tumangihon Hata ni Debata; laho mamboto maksud/pangidoan ni Tuhantai na ingkon jumolo do tumangihon HataNa. Molo tabereng Rom 10: 17 Asa sian na tumangihon do ro haporseaon; ia panangihon i, sian hata ni Kristus do.

3.         Hadaulaton dohot Sangkap ni Debata (ay. 40-41) Ulaon na denggan do laho manghobasi songon binahen ni si Marta, alai orientasi/ arah ni angka ulaon naeng gabe tingkos. Haroro ni Tuhan Jesus dohot angka siseanna gabe humalaput do si Marta laho paradehon, hape angina si Maria holan na hundul laho tumangihon Tuhan Jesus. Laos dipatuduhon ibana do murukna laos mandok: “Tuhan, ndang diantoi roham, na pinasombu ni anggingki ahu marhobasi sahalakku? Dokkon ibana antong mandongani ahu!”. Laho mangantusi na nidok ni Tuhan, di hata Junani dipangke do thelima: kehendak Allah. Disi nunga tarmasuk pantas ni roha mananda lomo ni rohaNa marhitehite nasa hapistaran dohot habisuhon partondion. Dipangantusion ni jolma tutu, na jumotjot laho pangasahon parbinotoanna, pemahamanna, ulaonna sandiri so jumolo membereng aha do na pinangido ni Tuhan I di bagasan ngoluna. Jolma manisia patujolohon na sinangkapan ni rohana, hape dang diranapi aha do sangkap ni Tuhan i ulaning. Ndada laho patulushon sude pangidoan ni jolma manisia, alai naeng pasauthon sangkap ni Debata, ima hadaulaton ni Debata. Di angka ibadah: ende, tangiang, dna pe porlu do diparrohahon asa unang ma sangkap ni portibi sambing masa alai lomo ni roha ni Tuhan i ma na saut.

4.         Patujolohon Partondion (ay. 41-42) Di na ro Tuhan Jesus tu jabunasida, rap dipatuduhon do ianggo responna, si Marta na humalaput angka siparadeon, hape si Maria dipasonang do rohana tumangihon Hata ni Debata. Alai hatorangon na pinasahat ni Tuhan Jesus laho mandok asa patujolohon / memprioritaskan hubungan dohot Debata. Alani i ringkot laho tumangihon hataNa, mangantusi nasinangkapan ni Debata. Parange ni si Maria patuduhon tung mansai arga do di Ibana Tuhan Jesus dohot angka hataNa martimbanghon angka na asingna i. Naniluluan ni ibana ndada holan na ringkot di parsatongkinan alai dilului ibana sada hal na rumingkot ima parsiajaran sian Tuhan Jesus. Dieahi ibana do tumpal na so pola boi sibuaton sian ibana. Parsiajaran di hita: diangka kesibukan ni jolma di portibi on na jotjot mambahen lam mandao sian Tuhan i termasuk kesibukan di angka pelayanan, asa unang ma angka ulaonta gabe mangambati parsaoran dohot Debata. Ingkon tongtong patujolohon angka na ringkot di partondion. Diangka karejo na tung mansai sibuk, sai adong ma nian tingkina laho marhubungan tu Tuhan Debata.