GALATIA 1: 11-18 HATA I DO HANGOLUAN

 

GALATIA 1: 11-18

HATA I DO HANGOLUAN

1.         Dung sahat barita na uli tu angka Non Jahudi, termasuk surat ni Apostel Paulus tu halak Galatia, timbul do perdebatan: ia gabe halak Kristen na toho na ingkon mulak dope tu patik dohot hajahudion ima pangantusion ni na deba. Hape si Paulus tung mansai tangkas do laho mengubah pemahaman i, ia dasor ni ngolu ni halak Kristen ima porsea tu Tuhan Jesus na gabe Sipalua I. Alai ndang holan i tantangan na niadopan ni si Paulus, adong muse dope angka halak na mangalo ibana na ro tu Galatia laho manegai angka panghobasion ni si Paulus, terkhusus di turpukta on na mamparsoalhon Injil dohot Ha-Apostel-an ni si Paulus. Sialani i ma Apostel Paulus mambahen suratna on laho patingkoshon angka halak na lilu dibahen ajaran-ajaran palsu i. Berjuang do Apostel Paulus dohot tegas laho mandokhon hasintongan:

 

2.         Barita Na Uli sian Debata do harorona (ay. 11-12). Ia angka Barita na Uli na pinasahat ni Apostel Paulus, ndada sian jolma manang haroharohaonna sandiri, alai sian Debata do dijalo ibana marhitehite Jesus Kristus dohot Tondi Porbadia asa dibaritahon tu angka luat. Hata ni Debata marojahan sian Padan Narobi dohot padan Naimbaru, alai terutama di halak Kristen ima laho patuduhon Tuhan Jesus Kristus do na gabe dalan haluaon ni jolma dohot portibi on. Alani I di ganup parbaritaon ingkon paboahon Kristus do haluaon I, ndada sian parbinotoan ni jolma manang portibi on sambing na naeng pasahaton. Ido na pinasahat ni Apostel Paulus laho mangalo angka parpoda haliluon, manongtong do ibana mangajarhon ia halak Kristen ingkon marojahan tu Kristus, ai sian pangungkapon ni Jesus Kristus do i.

 

3.         Dipangke Debata do si Paulus gabe Apostel-Na (ay. 13-14) Nunga tabege taringot tu Pertobatan ni Si Paulus di panjouon ni Tuhan Jesus Kristus (Ulaon ni Apostel Bindu 9). Latar belakang ni ibana na jolo jala diakui ibana doi uju di bagasan hajahudion dope: Ima na gasagasaon, mangalelei jala mangarotongkon huria ni Debata. Na silele angka sisean ni Tuhan Jesus hian do si Paulus i, na kejam menyiksa angka siihuthon Jesus. Alai dipardalanna tu Damaskus laho mamusa angka na porsea I, disi do Panjouon ni Jesus Kristus tu ibana. Disima dijou Tuhan Jesus ibana jala dipabangkit gabe ApostelNa, ndada jolma na pabangkit Ibana. Uju di hajahudion ibana, termasuk do ibana na koras di agama Jahudi ala marsiajar do ibana tu si Gamaliel. Alai dung nampuna ni Kristus ibana gabe muba situtu, ido alana gabe olo ibana mangula mansai marsitutu, olo manaon na hansit, ala nunga porsea ibana tu Tuhan Jesus.

4.         Dipatangkas ibana dope muse (ay. 15-17), Ia pamillitonna ndada holan di dalan na tu Damaskus, alai sian uju di bortian dope ibana nunga dipillit Debata. Sian asi ni roha ni Debata nunga sarupa ibana dohot halak na asing na dipangke ni Debata songon si Jeremia, Petrus dohot Naposo ni Debata na asing na sian Jahudi. Nunga diangkat Debata ibana na gabe Apostel tu angka sipelebegu (Non Jahudi). Sude masa lalu-na I, gabe sangkap ni Debata laho paradehon ibana manjalo ulaon sian Debata. Dipatuduhon Debata asi ni rohana, asa mangolu ibana di haimbaruon dohot gabe parhobas ni Debata. Dipalua Debata asa gabe parhobas ibana laho pararathon Barita Na Uli. Keadaan awal ni si Paulus tung mansai marasing do dungkon bertobat ibana, sian halak na antipasti tu halak siihuthon Kristus, alai gabe halak na manghongkop haporseaonna situtu.

 

4.         Marojahan tu Kristus (ayat 18). Angka persoalan na niadopan ni si Paulus maradophon angka halak na lilu dohot pangajar sesat di Galatia, ima pertentangan ni Hajahudion dohot Kristus, termasuk di pangantusion taringot tu Haluaoan. Dipatingkos ibana do pemahaman haluaon ndada holan tu halak Jahudi. Alani i dung salpu tolu taon, nangkok ma si Paulus tu Jerusalem, laho mananda si Kepas. Ditopot ibana do sisean ni Tuhan Jesus si Petus dohot Jakobus laho pahantushon ia haluaon ima sian Tuhan Jesus Kristus, ndada sian Jahudi. Jala taringot tu tradisi nasida songon sunat dohot sipanganon na diharamkan ndang gabe kewajiban i tu angka Kristen na so Jahudi. Ia si Paulus konsisten do ibana marojahan tu Kristus. Halak naung gabe Kristen ingkon mardasor tu Tuhan Jesus Kristus, ndang boi targantihon ni angka parbinotoan ni jolma manang teori-teori ni portibi on. Petunjuk na sasintongna ima sian Tuhan Debata. Na mangihut, haluaon ndang alani usaha ni jolma manang patik alai ala asi ni roha ni Debata do marhitehite anakNa Tuhan Jesus Kristus gabe dapotan haluaon ma saluhut manisia. Halak na porsea dang gabe ganggu dibahen angka ruparupa ni pangajarion ni portibi on, ingkon ingot ojahanna ima Tuhan Jesus Kristus. *AMEN*