2 Korintus 13: 5-13 Ngolu Hakristenon

 

Nats	2 Korintus 13: 5-13
Thema	Ngolu Hakristenon

 

I.                   Patujolo

Di tongos Apostel Paulus do surat na paduahon tu Huria Korintus, jala disangkapi rohana do naeng ro muse tu Korintus laho patoluhalihon. Diboto ibana angka tontangan na balga na diadopi ni halak Kristen di luat Korintus ima: mangalo angka guru na mangaliluhon, mangondolhon habadiaon ni ngolu hakristenon dohot manogunogu haporseaon ni halak Korintus na so pola togu dope asa manongtong haporseaonnasida i. Sialani i dipatupa Apostel Paulus do kunjungan tu Korintus pola dua hali jala manongos surat dua hali. Holong rohana ala torop do naung gabe siihuthon Tuhan Jesus di luat i jala unang mago haporseaonnasida, nang pe luat Korintus ummaol sian angka luat na asing. Ndang marnaloja Apostel Paulus laho pararathon barita nauli marhite perjumpaan secara langsung nang pe marhite na manongos surat-surat pastoral.

 

II.                Hatorangan

Ay. 5-6: Panogunoguon na pinatupa ni Apostel Paulus ndada holan pasahathon Barita Nauli sambing, alai dipatupa ibana do pasahathon barita i marhite cara mangajari na tangkup tu ruas i (bersifat edukatif). Didok Apostel i:”Unjuni hamu ma dirimuna….”. Pangantusion ni unjuni ndada laho manuru asa masuk tu pangunjunan manang mangaloas diri laho mardosa manang marungkil, alai ganup halak asa lobi manat di bagasan haporseaonna. Hata unjuni di bagasan turpuk i marlapatan asa teliti, manat, merenung manang berefleksi sian hasintongan ni Debata. Mamereng satongkin pardalanan ni haporseaon jala manulingkit nunga tingkos manang sala pardalanan ni haporseaonta i. Dipaboa ibana muse, ia di bagasan diri ni halak siihuthon Tuhan Jesus, nunga adong hadirion ni Tuhan Jesus di bagasan diri ni halak na porsea jala dihirim asa hombar ma identitas hakristenon naung ni lehon ni Debata i tu parngoluan nasida.

Ay. 7-9: Apostel Paulus paingothon huhut manangianghon luat Korintus asa adong haimbaruon songon tanda naung siihuthon Debatanasida. Dungkon tatanda Tuhan Jesus Kristus, naeng do ndang be mangasahon hadirionta sambing songon pola pikir dohot karakter jolma na leleng, alai gabe jolma na imbaru na ma di bagasan Tuhan Jesus. Keadaan ni luat Korintus songon kota Pelabuhan na balga, na majemuk, jala gok angka ajaran na mangkorhon ndang boi polin laho mangihuthon Tuhan Jesus. Isarana mansampur haporseaon dohot ajaran na asing di duru ni Tuhan Jesus, maol rohanasida laho manjangkon barita nauli sian si Paulus ala godang angka pangajar na lilu na malo, pola do gabe ragu jala paoruoruhon Apostel i dohot angka donganna sahorong marbarita nauli.

                Ay. 10-13: Marsihohot do roha ni Apostel i laho pasahathon tona ni Debata anggiat adong hamubaon tu dengganna. Apostel i torus manoarahon asa ruas na di Korintus: asa mangulahon na denggan, manulak angka na lilu, togu roha dohot haporseaonna di bagasan Tuhan Jesus, asa olo ditogu jala diapoi, sisada pingkiran di bagasan Tuhan Jesus, parsidohot mangaradoti hadameon, parholong roha dohot masitabian na hormat. Angka pangalaho na denggan na dihirim di bagasan turpuk on, mendukung tu ngolu hakristenon. Sipata haportibion mambahen lalap hita, gabe ndang tasadari adong do hape hadirion ni Tuhan Jesus Kristus di bagasan hita, sialani i ndang boi holan mangihut tu lomo ni roha sambing, manang hagiot ni portibi on, alai bertujuan do pasauthon lomo ni roha ni Debata marhite ngolunta.

III.             Sipahusorhusoron

1)      Manat di bagasan haporseaon. Surat ni Apostel Paulus on, mangalusi angka tontangan na masa hatiha i, alai tong do ampit tu ngolu hakristenon saonari. Ringkot dohot di hita laho manat di bagasan haporseaon, martingki-tingki tapatupa songon ‘evaluasi iman’ laho manulingkiti tu bagasan sintong manang dang sintong na sedang tadalani. Isarana: Saonari martabur do angka jamita marhite video dohot tulisan alai molo tapamanat ndang sude mamboan hita tu hasintongan. Adong angka Alkitab na diterjemahkan tu hagiot ni jolma, adong angka pangajar na paliluhon haporseaon. Dohot mamereng pardalanan ni haporseaonta atik na sala do naung tahasomalhon.

2)      Mangolu di bagasan Tuhan Jesus. Ringkot muse hita mananda diri songon naung hinongkop ni Tuhan Jesus. Ala naung di bagasan Tuhan Jesus do hita antong ingkon pahombaronta do ngolunta tu hagiot ni Tuhan Jesus, asa unang marisuang angka silehonlehon ni Debata songon sungkunsungkun ni Aposte i di ayat 5: “…Na so ditanda hamu do dirimuna, paboa naung Jesus Kristus di bagasan hamu?...”. Dipaingot muse hita ala naung adong hadirion ni Tuhan Jesus di bagasan dirinta asa mangolu ma hita di bagasan Tuhan Jesus.

3)      Ngolu HaKristenon. Ngolu hakristenon na denggan, ndada laho mandok dang adong be hadosaon manang hagaleon, alai ngolu hakristenon na denggan ima pasolhothon diri tu Tuhan Jesus ganup tingki. Tarpatupa hita pe hadengganon ndada sian alani usahanta, alai ala pangoloion di bagasan Tuhan Jesus Kristus.