2 Timoteus (2 Timotius) 1: 1-14 Ndang Marpansohotan Asi ni Roha ni Tuhan I

 

Nats	2 Timoteus (2 Timotius) 1: 1-14
Topik/ Tema/ Judul	Ndang Marpansohotan Asi ni Roha ni Tuhan I

 

1)      Patujolo. Ditongos Apostel Paulus do surat tu si Timoteus, naung dirajumi songon “anak rohani” ni si Paulus. Timoteus naung olo jala mamelehon diri gabe dohot marbarita nauli mulai sian haposoonna. Ndang mansadi paniroion ni Apostel Paulus tongtong laho manungkolnungkoli panghobasion ni si Timoteus. Nang pe naung gok parbinotoan dohot pengalaman ni Apostel Paulus ndang hea ibana gabe mangondolhon diri manang menokohkan diri. Tongtong do ibana torus mangondolhon haserepon ni ibana marhite na torus mangasahon goar ni Tuhan Jesus Kristus.

2)      Panghobasion ni si Timoteus. Gabe dohot do si Timoteus porsea jala marbarita nauli ima parbue ni pardalanan ni parbaritaon ni Apostel Paulus na parjolo tu luat Listra dohot Derbe. Marparbue do parbaritaon i gabe tamba bilangan na porsea gariada gabe dohot parbarita nauli. Tontu keluarga pe boi do mempengaruhi semangat panghobasion ni si Timoteus ai keluargana pe angka na burju jala mangalehon dukungan tu si Timoteus. Inang na si Oinike jala ompung boruna pe si Lois ima halak na burju masibasabasa jala tarbarita halak na porsea jala sumurung do burju nasida. Dunghon dijalo nasida barita nauli gabe dihangoluhon jala mampangkorhon tu bagasan ngolunasida.

3)      Hagogoon ni Parbarita Nauli. Turpuk on (II Tim. 1: 6- 7) gabe sada motivasi dasar tu si Timoteus di na laho manghobasi, ndada holan tu si Timoteus alai dohot do tu sude angka parhobas ni huria. Marhite on dipaboa do dijou jala dipargogoi Tuhan Debata do angka olo mangulahon parsuruonNa. Dipapos roha ala nunga jumolo dilehon ibana pandonganion ima: tondi hagogoon, tondi haholongon, tondi pangarajaion diri. On ma sada dorongan asa ganup halak na tarjou laho gabe parhobas asa unang pola mabiar, maila, khawatir, na tolu on jotjot gabe sipangambat laho mangihuthon Jesus tarlumobi gabe parsidohot laho manghobasi. Ditonga ni panghobasion ni si Timoteus na hea gabe gamang jala naeng maninggalhon panghobasionna alai dipargogoi do ibana muse.

4)      Sahat Ula Tohonanmi. Adong do tudosan sai hira eme na disamehon, dimulana godang do disabur, alai dipardalanan ni partingkian disi ma muse taruji. Sian boni na godang nangkingan i ndang sude boi gabe pangkeon ni pangula i. Sian i tabareng ma tarjou do hita laho manghomonanghon haluaon naung ni lehon ni Debata asa unang adong hita na madabu haporseaonna manang maila, tahutan manang mandele. Taingot ma angka dasor ni panjouon ni Debata na adong di turpuk on (ay. 9-10) dijou marhitehite panjouon na badia ndada marguru tu hita alai na dibasabasahon Tuhan Jesus Kristus do tu hita. Jala dipanjouon ni Debata i laos dipalumehon do godang tu hita ragam ni pasupasu tarlumobi ma i Tondi Parbadia. Alani i parbaritanuli on ndada holan ulaon ni jolma na manghobasi i, alai na diloas ni Debata jala dipargogoi do hita. Antong tongtong ma hita margogo mangulahon angka tohonan dohot angka ulaon basabasa na dilehon ni Debata sahat ro di ujungna.