Mangurupi Sian Nasa Haholongon

 

 

Epistel Minggu	3 September 2023
Nats	2 Kronika (Tawarikh) 9: 1 - 8
Topik	Mangurupi Sian Nasa Haholongon

I.                   Patujolo

Buku Kronika (Tawarikh) tardok agak jarang dipangke gabe turpuk ni jamita, ala buku Kronika pada umumna ima buku na marisihon angka tarombo dohot angka barita habisuhon ni raja Israel. Deba angka pande mandok buku Kronika ima na sinurathon ni horong Malim (sumber P/ Priest) dung mulak bangso Israel sian habuangan Babel + taon 538 sM, alai deba mandok si Ezra do manurat laho pabangkithon semangat ni bangso Israel laho paimbaruhon bangso I. Alai na pasti maksud ni panuratan ni Buku Kronika ima paingothon bangso i, di masa kejayaannasida asa boi hinsat nasida dung mulak sian habuangan Babel. Turpuk on 2 Kronika 9: 1-8 sarupa dohot na tarsurat di  1 Rajaraja 10: 1-13. Diungkap angka sejarah laho manghehei jala paingothon nasida songon bangso naung pinasupasu ni Tuhan Debata.

II.                Hatorangan

Ay. 1-2: Tarbarita do habisuhon ni Raja Salomo sahat tu saonari, tarlumobi di zamanna pola do raja boruboru (ratu) ni Saba (Syeba) ima si Makeda mambege barita taringot tu Raja Salomo jala ro ibana mebat rap dohot paranganna tu Jerusalem laho pajumpa dohot Raja Salomo. Dipatorang do haroronasida mamboan na hushus marragamragam dohot sere mansai godang dohot mata intan. Hatiha i Saba ima harajaon na mamora siala gok serenasida dohot perdagangan na hebat (Saonari negara Yaman). Didok haroro ni raja sian Saba ima laho masiujian dohot marundangundang tu raja Salomo. Songon haroro ni sahalak raja laho manopot sahalak raja mardongan hatongamon dohot ragam ni haporluan. Dipatorang si Salomo tu nasida sude sungkunsungkunna, jala ndang adong na buni nanggo sada sian roha ni si Salomo.

Ay. 3-5: Longang ma roha ni raja sian Saba i mamereng si Salomo sian sude hal ima hapistaran dohot habisuhon ni Raja Salomo dohot bagas na pinaulina i, dohot angka panjangkonon na luar biasa  marhite haradeon sipanganon di meja, tole partordingna hundul angka naposona, tole panagam ni angka parhaladona dohot pangkeannasida, tole angka sitahu anggurna dohot pangkeannasida, tole partanggaonna laho nangkok tu joro ni Jahowa, jadi hira na tarmali tondinasida. Nunga taruji habonggalon ni Raja Salomo, ndada holan di bagasan harajaonna, alai sahat tu portibi. Di bagasan panghilalaan na gok halongangan raja sian Saba mamuji raja Salomo, ai ndada holan barita alai lobi sian barita i nunga dibereng si Makeda i hahebaton ni raja Salomo.

Ay. 6-8: Pamujion ni raja sian Saba siala longang rohana. Tontu sahali rasa kagum ndang na dibahenbahen, alai na timbul do i sian roha siala sian na tebereng i tung mansai uli. Didok raja sian Saba i: “Martua ma halak parhaladom, martua ma dohot angka naposom, angka na tongtong marhalado di adopanmu pabegebege hapistaranmu!”. Alai ndada holan i, pola do dipuji ratu i na hinaporseaan ni Raja Salomo ima Tuhan Jahowa. Pola do na so parangan ni Debata mamuji Tuhan Jahowa siala halonganganna mamereng raja Salomo.

III.             Sipahusorhusoron

1)      Habisuhon na sian Tuhan Debata. Dilehon Tuhan Debata do habisuhon tu Raja Salomo, marhite habisuhon i, gabe boi ibana patupahon na dumenggan jala mamboan harajaon Israel gabe balga, mamora jala tarbarita. Taruli raja Salomo disaluhutna, siala pangidoanna ima pangidoan na arga sian Tuhan Debata ima habisuhon. Saleleng mangolu ibana di bagasan Hata ni Debata gok ma pasupasu dohot pandonganion ni Debata, alai dung lipe ibana sian dalan ni Debata ima na gabe bonsir ni kemunduran ni harajaon Israel. Di bagasan Tuhan Debata do hita gabe marbisuk.

2)      Gabe Parhitean ni Debata. Gok do huaso ni Tuhan Jahowa laho manontuhon angka sangkapNa, alai naeng do tapangidohon asa dohot hita gabe parhitean ni Debata songon raja Salomo na mambahen tarlongang raja sian Saba dohot angka paranganna, gabe dipuji nasida Tuhan Debata, na hinaporseaan ni raja Salomo. Sialani i tarjou hita laho mangulahon Hata ni Tuhan, jala dohot nian hita gabe parhitean ni Debata di angka sangkapNa. Marhite hita gabe taruli pasupasu humaliangta, Tuhan Debatanta gabe ditanda halak, gariada gabe dohot nasida mamuji Tuhan i.

3)      Asa Gabe Pasupasu. Mangungkap batas-batas ni pangantusion ia halak na tarpasupasu holan kelompok tertentu, misalna mangalo pangantusion na mandok ia na dipasupasu Tuhan Debata ima holan na sahaporseaon, gereja-gereja tertentu, holan suku manang marga-marga tertentu, alai hurianta ima pardomuan ni halak Kristen sian sude marga, houm dohot bangso di Indonesia dohot di sandok portibi on, na tardidi tu bagasan Goar ni Debata Ama, AnakNa Tuhan Jesus Kristus dohot Tondi Parbadia (Almanak HKBP, hlm. 4). Saurdot dohot visi ni hurianta HKBP ima huria na inklusif, dialogis, jala ungkap naung dipasingkop muse asa marhatauon jala marhagogoon pahembanghon parngoluon dohot Misi na mangondolhon pahinsathon mutu ni hangoluon dohot hakristenon dohot prinsip gabe pangoloi, sira dohot panondang, pajongjong hatigoran, hadameon dohot hasadaon na tinompa (AP HKBP 2002 Dung Amandemen III, hlm. 9).