Unang Hamu Manguhumi

 

 Unang Hamu Manguhumi

Nats	1 Musa (Kejadian )50: 15 - 21
Topik	Unang Hamu Manguhumi

 

I. Patujolo

Josep na di bagasan padan na robi ima salah satu ompu ni bangso ni halak Israel, anak ni si Jakob na pasampulu sada sian sampulu dua, tubu ni si Rahel. Di angka barita andorang turpuk on, nunga godang dipaboa taringot tu na masa tu si Josep (mulai sian 1 Musa bindu 37). Si Josep ima hasudungan ni roha ni si Jakob umbahen na sogo roha ni angka haha dohot anggina. Nunga godang dipanghilalahon si Josep mulai sian sangkap ni hahaanggina pamatehon ibana, digadis tu halak Misir, difitnah, dihurung dohot angka hapariron na asing. Alai songon tanda halak na sintong ibana, ndang diloas Debata holan manghilalahon na parir, dipasupasu Tuhan Debata do ibana sahat ro di gabe songon pangarajai (perdana menteri) ni Raja Parao ni halak Misir.

II. Hatorangan

Ay. 15-17: Diboto angka hahaanggina i do naung salanasida di tingki na salpu, alani i mabiar do nasida mida si Josep, tarlumobi siala angka pambahenannasida na roa uju i. Patut do nasida mabiar siala jorbut ni pambahenannasida i, hape Josep gabe sahalak pangarajai jala na di haporluhonnasida gabe penolong ala masa muse haleon potir haraparon. Sian hajolmaon na somal na jotjot masa ima pambahenan na denggan sian pangalaho na denggan, alai molo na jat do dijalo, ingkon lobi jahat ma balosna nian. Biar ni rohanasida gabe muba holong ni si Josep dungkon mate amanasida si Jakob. Dipasahat nasida do tona ni amana asa marpamuati roha ni si Josep diangka dosa ni hahaanggina i.

Ay. 17-18: Sada hal na denggan sian sian angka hahaanggi ni si Josep ima di haoloan nasida laho mangaku sala huhut manopoti angka dosana marhite na marsinggang nasida tu jolo ni si Josep. Sada hasurungan do molo olo mangaku sala di tingki sala, ndang mamorso manang mamaksa. Molo sian status nasida songon angka siangkangan alai gabe ingkon manopot hasalaan nasida tu si Josep. Manang habuluson ni roha nasida laho manopoti hasalaon di tingki na salpu.

Ay. 19-20: Suang songoni nang sian si Josep na gok sitiruon, tarlumobi di turpuk on ima haoloan ni ibana laho memaafkan manang mangampuni angka dosa ni hahaanggina. Habalgaon ni roha ni si Josep na luar biasa boi manjalo angka hahaanggina rap dohot keluarga. Ndada holan memafkan alai dipastihon ibana do laho marmudumuduhon angka ianakhonnasida.

 

III. Sipahusorhusoron

1) Pardalanan ni Ngolu naung niaturhon ni Debata. Secara hajolmaon, olo do hita mangarimangrimangi parngoluon on, marhite pingkiran na denggan gabe tubu angka sangkap tu joloan manang rencana, nang pe na tarencanahon sipata ndang jadi. Suang songoni nang marhite pingkiran na roa, sipata gabe tubu panolsolion tu ngolu, manginongi, mandele, gariada manontuhon hamateanna sandiri. Alai marhite pardalanan ni ngolu ni Josep dipatudu do ia parngoluan on nunga diaturhon Tuhan Debata. Ndada sangkap ni jolma na saut alai sangkap ni Tuhan Debata do. Dipangke do angka peristiwa na hansit i laho membentuk si Josep gabe sahalak na dihaporluhon ni torop halak.

2) Manopoti Dosa. Ulaon manopoti dosa manang hasalaaon ima sada ulaon na maolmaol mura. Marhite ibadah tapatupa do panopotion ni dosanta na godang i tu adopan ni Debata, alai sada bangko na roa di halak kita ima hamaolanna laho manopoti dosa tu dongan jolma, lumobi alani angka faktor gengsi, balas dendam, roha diri dohot jogal ni roha na mandok halak na sai sala jala dirinta na sai sintong. Marhite panopotion ni dosa jumpang do hangoluan na imbaru, padengganhon parsaoran, jala saut ma ulaon ni Tuhan Debata ima mangalehon hadameon. Ditopot angka hahaanggi ni si Josep do hasalaanna gabe jumpang di nasida haimbaruon ni ngolu jala dapotan pasupasu muse sian Tuhan Debata.

3) Haoloon Memaafkan. Marhite turpukta on, nunga dipatudu sada contoh habalgaon ni roha ni si Josep na tuk memaafkan hahaanggina. Diboto ibana do dirina di adopan ni Debata. Di ayat 19 didok :”… ai nda guru di Debata do nang ahu?”. Dirajumi ibana sarupa do ibana dohot na halak asing di adopan ni Debata gabe ndang hasurunganna dipatujolo. Marhite turpuk on tarjou do ganup siihuthon Tuhan Jesus Kristus asa gabe halak na rade memaafkan songon na di bagasan tangiang hatopanta: Ale Amanami Sipangidoon Palimahon: “Sesa ma dosanami songon panesanami di dosa ni dongan na mardosa tu hami.” ai hita pe gabe olo manesa dosa ni angka na mardosa tu hita.