MANONGTONG DO ASI NI ROHA NI DEBATA TU BANGSONA
2 MUSA (Keluaran) 17: 1-7
1. Turpuk on ima bagian ni pardalanan bangso Israel sian Misir tu Kanaan, jala di bagasan pardalanan tangkas do angka halongangan na pinatupa ni Tuhan Debata tu bangsoNa laho paboahon Debata Jahowa do Tuhan jala Pangaramoti nasida. Sada-sada nunga dilewati nasida tahapan ni pardalanan menuju tu Tano na naeng dilehon Debata tu nasida. Borhat sian halongonan Sin, gabe marsaro nasida di Rapidim, hape ndang adong aek siinumon ni bangso I, ala parhorsihan dohot halongonan do i. Marhite i, ingkon adong ma pangaradeon nasida andorang manjalo patik ni Debata di Gunung Sinai jala Tuhan Debata do na marmudumudu nasida.
2. Ayat 1-4, mangunjuni Jahowa? Ala situasi na so pola adong aek, gabe tubu ma godang parsoalan ima mauas, dohot hahurangan aek tu haporluan na asing isara marhaiason, mangaloppa, dna. Sian i ma muse timbul angka parungutunguton ni bangso I ala so adong aek jala dibadai ma si Musa; marsipandok hatanabe laho mangido aek, pola do didok si Musa “Boasa ahu badaanmuna? Boasa unjunanmuna Jahowa?”. Na baru dope dipanghilalahon nasida angka halongangan na binahen ni Jahowa, jala porsea do nasida. Alai ala masa sisongoni pintor mago do hasabaron nasida jala diunjuni dope Debata. Bahkan gabe dibandingkon nasida do parngoluanna hatiha di Misir na gok sunge dohot sipanganon daging, sahat tu na mansalahon si Musa jala naeng mandanggur si Musa dohot batu. Gabe mulak muse mental hatoban nasida, ganggu roha nasida laho manghaposi Debata. Borat do sitaononnasida ala mardomu tu kebutuhan aek, alai ndang pola nian sahat tu na mangunjuni Debata.
3. Ayat 5-7, dibege Tuhan Jahowa do anggukangguk nasida. Ala naung disosak angka bangso I, jadi mangangguhi ma si Musa tu Debata. Cara na tepat mangadopi angka parungkilon ima na tongtong mangido pangurupion sin Debata. Ala Tuhan Debata do na manguluhon nasida marhite naposona si Musa, dipatuduhon do dalan laho mangatasi persoalan tentang aek i. Disuru do si Musa laho mangarahon perwakilan ni angka sintua ni Israel bahen donganna, jala dipaingot muse laho mamboan tungkotna na nilipathonna tu batang aek hatiha di Misir dope (2 Musa 7: 20). Dison ma peran ni Tuhan Jahowa paluahon nasida na mangalean parenta tu si Musa taringot tu aha sipatupaon ni si Musa jala disaksihon ni angka Sintua ni Israel. Marhite na mangalipati dolok batu di Horeb, gabe ruar ma sian I aek siinumon ni bangso i. gabe dibaen ma disi tanda ima Massa manang pangunjunan dohot Meriba manang parbadaan. ala ni bada ni halak Israel, jala ala ni niunjunannasida Jahowa, na nidokna i: Di tongatonganta ulaning do Jahowa manang ndang? Tanda i gabe parningotan nunga masa parbadaan dohot pangunjunan tu si Musa dohot Debata alai manongtong do asi ni roha ni Debata tu bangsoNa.
4. Hadirion ni Debata. Molo mangihuthon harohaon dohot pangalaho ni bangso I, tontu nunga patut nasida hona rimas jala uhum ni Debata. Hagaleon ni bangso I na so marpos ni roha tu Debata, mangaleai bahkan meragukan keberadaan ni Tuhan i, marhite hata “Di tongatonganta ulaning do Jahowa manang ndang?” sai hira na marpalensem taringot tu ha-adong-on manang ha-boi-on ni Debata. Hape dialusi Debata do i marhite angka pambahenanNa na so tardodo jolma isara mambaen dolok batu gabe mual ni aek. Sian on naeng dipatuduhon adong do Tuhan Debata na tuk paluahon manisia sian ragam ni hamaolon, gariada dipalua do jolma sian pardosaon. Jala tongtong do asi roha ni Debata huhut disarihon do ngolu nasida.
Songon goar ni Minggunta Reminescere na marlapatan: Sai ingot ma angka denggan ni basaM (Psalmen 25 : 6). Dipaingot do tongtong tu halak na marungkil ia hadirion, huaso dohot asi ni roha ni Debata hot do ro di saleleng-lelengna, alai ala gale haporseaonta manang ala ni angka parungkilon ido na manutupi gabe ndang tarbereng ni ‘mata haporseaon’ angka pambahenan ni Jahowa hape ganup ari do masa halongangan na sian Debata. Marhite I mangorahon hita asa marlambas ni roha mangida hangoluan jala tongtong marningot denggan basa ni Jahowa. Amen.
Tidak ada komentar:
Posting Komentar