Maleaki (MALEAKHI) 3: 13-18 HADAULATON DI ADOPAN NI DEBATA

 

Maleaki (MALEAKHI) 3: 13-18

HADAULATON DI ADOPAN NI DEBATA

1.         Maleaki sian hata dasar ‘Mal’akhi’ na marlapatan suruanKu / suruan ni Debata. Ima suruan laho parade dalan ni Jahowa. Buku Maleaki disurathon dung dipauli muse Bagas Joro di Jerusalem (tingki 516/515 sM). Gomos do Panurirang Maleaki laho mandok asa sude angka Malim dohot Bangso Israel laho padengganhon hadaulaton nasida tu padanna dohot Debata. Dibereng ibana do na godang sipatureon di Bangso Israel tarlumobi di parsombaon nasida tu Debata, diparngoluan nasida na godang angka pargadombuson (kemunafikan), jala ndang sintong parngoluannasida dipoda na nilehon ni Debata dohot kemerosotan moral na lam rarat. Di Buku ni Maelaki tanda do songon Panurirang dohot Malim na berintegritas na mangolu sezaman raphon Ezra dohot Nehemia, jala diangka soara napisahatna laho mangondolhon Hasatiaon tu Padan dohot Debata, mangalo angka parsaombaon na marsipaulaula dohot mangalo angka na mambuat Bagian ni Debata (pelean dohot perpuluhan).

 

2.         Sungkun-sungkunnasida tu Debata (ay. 13-15). Marhite Panurirang Maleakhi bindu 3 tarida do panghataion ni bangso I maradophon Debata dohot gaya bahasa na dialektis hira marsialusalusan do nasida dohot Debata. Tarida do I diangka ayat sebelumna hira diparsoalhon bangso Israel I do Debata. Godang na diperdebathon nasida taringot tu aha na binahen ni Debata dohot angka na masa diparngoluan nasida. Tarida do disi na so adong be biar ni rohanasida maradophon Debata, hape Holong ni roha ni Debata manongtong do tu nasida. Diramoti Debata do nasida di pardalanna tarlumobi dung mulak sian habuangan Babel. Tangkas do asi ni roha ni Debata; diangka pambahenan ni Debata tu nasida sahat ro dipaulihon Bagas Joro, hape dang manongtong roha nasida tu Jahowa, jala manimbil do angka pangalaho nasida sian padanna tu Debata. Gariada hira diparsoada nasida do angka pambahenan ni Debata marhite angka pangalaho na lumlam, dang diakui nasida holong ni roha ni Debata (Bdk. Mal. 1: 1).

Godang panghataion nasida na manghalupahon denggan basa ni Jahowa, bahkan mangalo dohot hatanasida na mandok: “Tung aha ma hatahatanami dompak Ho?” (ayat 13) dohot di ayat 14 didok “Ndang adong labana oloan Debata, tung aha ma parlabaannami ala huradoti hami tonana, jala martujung hami di adopan ni Jahowa Zebaot?”. Sian sungkunsungkunnasida I dipatuduhon do hatangkangon ni rohana di adopan ni Debata. Tontu dosa do i mansoadahon huaso dohot gogo ni Debata manang na mangaleai Debata nama i. Denggan do laho manulingkiti haporseaon, songon si Jakob na marsiranggut di topi sunge Jabok, alai diparsangapi ibana do hadirion dohot pasupasu ni Tuhan Jahowa. Molo adong pe angka sungkunsungkun manang keluhan tu Debata, bagian ni pergumulan iman ma nian I laho padimposhon haporseaon tu Debata, ndang gabe dang parduli manang lam mandao sian Tuhan I songon pandok nasida di ayat 15: “Nuaeng pe ianggo hami angka halak na jungkat do huparhatua hami; tongon tahe, lam mardohar do angka siulahon hajahaton; gari Debata di unjuni nasida do, hape malua do nasida sian jea.” Molo tung pe dipergumulhon angka na masa di ngoluon naeng ma gabe hasangapon di Tuhan I, ndada sabalikna gabe paroahon manang mamparsoada naung jinalona sian Tuhan i.

 

3.         Ngolu na sintong di adopan ni Debata (ay. 16) Alai nang pe songoni pangalaho ni Bangso Israel, disuru do naposoNa Panurirang Maleaki na tongtong manghirim hamubaon ni roha dohot pangalaho, ai Tuhan Debata pe dipaima do hamubaonnasida. Molo pe diunjuni nasida Debata, diharophon do asa mulak nasida tu Debata. Asa naeng ma nasida biar mida Jahowa marhitehite na sai tongtong mangulahon lomo ni roha ni Tuhan i. Sada tanda ni halak na porsea tu Debata, ingkon tongtong do sintong ngoluna. Marhite Panurirang Maleaki manjou tu hamubaon ni roha, ragam ni angka dosa na masa hatiha i:

Na so mabiar be nasida tu Debata, gabe marsilomolomo mangulahon dosa, manghaporseai debata sileban, pangalangkupon, manghatahata dohot mangose padanna tu Debata, mamogo angka halak na metmet. Angka i ma siubaon nasida asa unang sanga ro uhum sian Tuhan Debata. Naeng ma masipaingotan ma angka sihabiari Jahowa, asa unang adong na mago sian nasida. Sian asi ni roha dohot pambahenan ni Debata, dihirim do asa halak na porsea I, mangolu tongtong dibagasan hasintongan.

4.         Tumpal ni Halak partigor dohot na manghabiari Jahowa (ay. 16-18) Ditangihon jala diparrohahon do angka na mabiar mida Jahowa. Tarsurat diadopanNa sada buku parningotan di halak angka sihabiari Jahowa dohot angka na pasangap goarNa. Gabe nampuna ni Debata ma nasida, songon holong ni amaama tu ianakhonna. Disima tarida hasurungan ni halak partigor martimbangkon halak parjahat, hasurungan ni halak sioloi Debata, martimbangkon halak na so mangoloi ibana. Alanii sai muba ma angka pardosa i tumadinghon dalanna, jala manongtong ma angka na porsea i. Diujungna tarida ma keadilan ni Debata, dapotan pasupasu ma angka halak partigor i jala ditingkina hona uhum ma angka parjahat na mangalo tu Debata, alani monang do angka na porsea i. AMEN