2 Korint 12: 2 - 10 Topik MANGASAHON TUHAN DEBATA

 

Nats	2 Korint 12: 2 - 10
Topik	MANGASAHON TUHAN DEBATA

 

I. Patujolo

Paulus ima sahalak apostel ni Debata na tardok gabe “apostel na singkop”. Godang do tontangan na ni adopan ni apostel Paulus mulai sian tontangan mambahen na so porsea tu Tuhan Jesus gabe porsea sahat tu na maralohon angka pangajar haliluon na pistar. Godang do reherehe manang panginsahion tu Ibana, alai di panginsahion na ro tu ibana laos dipatuduhon ibana do dirina songon Naposo ni Debata na haposan. Di ibana adong do parbinotoan ala mamolus sian pangajarion sian Si Gamaliel sahalak guru na balga jala tarbarita hatiha i, apostel na ditangkup jala na sinuru ni Tuhan Jesus di pardalanan tu Damaskus dohot marbarita nauli tu godang luat jala dapotan pangungkapon na sian Debata.

 

II. Hatorangan

Ay. 2-4: Dang pola jotjot apostel Paulus martaringot tu angka pangungkapon manang sada peristiwa na luar ni hasomalon na masa, alai na pasti hea do apostel Paulus taruli pangungkapon na sian Tuhan Debata. Alani angka parpoda haliluon dohot angka na hurang porsea tu barita na pinasahatna (bdk. Bindu 11) gabe ingkon paboaonna ma angka pengalaman-pengalaman partondion laho pasohon angka pangalilui dohot angka na so porsea i. Pengalaman partondion naung dipanghilalahon ibana ima nunga sampulu opat taon salpuna tarhinsat ibana tu lampis patoluhon ni banua ginjang (ay. 2) jala diulahi muse marhite istilah Paradeiso (Firdaus) ima inganan ni angka na badia di banua ginjang di adopan ni Debata (Pangk. 7: 9-17; 22:1). Dipangke ibana do istilah sada jolma mamang ibana na manghilalahon pangungkapon i, hape na mandok dirina sandiri manang Apostel Paulus i do na mandapot pangungkapon i.

Ay. 5-6: Hasurungan do i di apostel Paulus na manghilalahon pangungkapon i. Aut sura apostel Paulus naeng mamuji diri manang mangalului pamujion tu dirina nunga boi bahenonna i, alai ndada pamujion tu diri na naeng bahenonna alai gabe pamujion tu Debata jala mangarahon jolma na mambege asa lam togu haporseaonna tu Tuhan Debata. (boi dibandinghon tu angka na jotjot masa saonari na patupahon angka kesaksian alai ndada na laho pasangaphon Debata alai gabe pasangaphon diri dohot asa manait roha ni angka na torop).

Ay. 7-10: Diboto jala disadari ibana do pangungkapon na sahat tu dirina songon silehonlehon (karunia) ni Debata na ingkon diboanhon dohot denggan ima gabe haserepon ni roha. Didok ibana “asa unang huhaginjanghon angka pangungkapon na sumurung na tu ahu” jala dirajumi ibana do i songon basirbasir di sibukna jala pola dipangido ibana sampe tolu hali asa sumurut i sian ibana. Lapatanna apostel Paulus manjaga asa unang madabu tu ginjang ni roha. Denggan do taruli do di pangungkapon manang talenta na songon i, alai ganup na taruli sisongoni ingkon boi mampartanggungjawabhonsa tu Debata.

 

III. Sipahusorhusoron

1) Marserep ni roha. Marhite turpuk on, ditogihon do hita asa marserep ni roha, tarlumobi molo adong manang godang talenta manang silehonlehon ni Debata. Sude pangalehonon ni Debata, uli ma molo dipangke dohot denggan jala dibahen gabe hasangapon ni Debata. Apostel Paulus patuduhon molo adong sada hasurungan, boi doi gabe dalan ni sibolis mambahen hita mardosa, alai molo bisuk jala biar mida Jahowa gabe pangkeonna ma angka silehonlehon ni Debata tu hadengganon.

2) Mangasahon Tuhan Debata. Pardalanan ni ngolu na boi do digombarhon songon halak na mardalan di bire ni rura. Lapatanna boi do jolma mardalan disi jala malua alai boi do ibana gabe madabu. Sialani i ringkot jolma i mandalanhon ngoluna marhite na mangasahon Tuhan Debata, ndada na mangasahon diri. Secara khusus muse turpuk on laos gabe pangajarion tu hita di bagasan manghobasi asa mangasahon Debata dohot pasangophon Debata ndada mangasahon diri dohot pasangaphon diri songon na masa di angka parpoda haliluon manang di deba ruas na di Korint. Molo adong pe panghobasion manang karya na boi tapatupa ndada hita na patupahon i; alai Tuhan Debata do na patupahon i marhite na mamangke hita.

3) Dipargogoi Tuhan Debata. Diboto Tuhan Debata do na ringkot tu hita jala diboto Tuhan Debata do na topet tu hita. Di ayat 9 didok Debata tu apostel Paulus: “Tuk ma asi ni rohangKu di ho; ai di hagaleon do sun timbul hagogoon”. Marhite gabe pos ma rohanta na dipargogoi Tuhan Debata do hita di bagasan ngolu dohot patupahon angka panghobasion. Silehonlehon ni Debata i nunga tuk laho patolaphon hita patupahon na dumenggan di bagasan ngolu. Panindangion ni apostel Paulus gabe cara pandang na imbaru di hita ima sonang ni roha nang pe di bagasan hagaleon, pangaleaion, hasosahan, pangaleleon dohot hagogotan ala ni Kristus. Sabar do ibana di bagasan angka sitaonon na hansit ala ni Kristus jala gabe hasurungan do i di ibana. Marhite i gabe dipaimbaru ma pamerenganta tu na masa di portibi hombar tu Hata ni Debata.