ROM (ROMA) 5: 1 – 11 DIPINTORI, DIPADAME TUHAN DEBATA DO HITA

 

ROM (ROMA) 5: 1 – 11

DIPINTORI, DIPADAME TUHAN DEBATA DO HITA

1.      Turpuk on ditujuhon do parjolo do tu halak Kristen non Jahudi di Rom, siala naung dohot tarjou tu haluaon na sian Debata marhitehite Tuhan Jesus Kristus. Ala adong parasingan ni Halak Kristen Jahudi  na sai tongtong mangondolhon patik gabe dalan haluaon. Dison do dipatuduhon posisi ni hajolmaon di adopan ni Debata tung godang hahurangan, ala jolma na gok dosa dohot pangalaosion gabe ndang patut nian dapotan na tama ianggo jolma. Alai Tuhan Debata sandiri do na marasiniroha gabe taruli jolma i di haulion na sian Debata marhite na mamintori (membenarkan) asa boi jolma i mardame dohot Tuhan Debata. Marhitehite Tuhan Jesus Kristus gabe adong muse hubungan na denggan tu Debata Ama. Tuhan Jesus Kristus gabe sada dalan laho paluahon manisia. Na naeng dipatangkas muse ima porlu ni hadirion ni Tuhan Jesus, bahwa holan Ibana do na tuk mamboan jolma manisia gabe dapotan asi ni roha ni Debata.

2.      Dipintori, dipadame Tuhan Debata do hita. (ay. 1-2). Haroroni Tuhan Jesus tu portibi on  mamboan godang haulion na masuk tu horong ni Teologi pembebasan. Marhite Tuhan Jesus, gabe dapotan haluaon ala Ibana do Mesias Sipalua (Juru Selamat). Dison ma tarida ia jolma, terbatas do dirina bahkan dang boi malua sian hadosaonna sandiri, ia so holan alani Tuhan Jesus. Sialani I ingkon sadar ma ganup hita ima na dipintori, dipadame Tuhan Debata do hita di bagasan parngoluan on. Las ni roha dohot martuani nihalak na dipintori targombar do songon perumpamaan ni Tuhan Jesus taringot tu 2 halak na marutang na dipasuang ni tuanna (bdk. Lukas 7: 41-43). Gabe malua, marlas ni roha, tarlumobi ma halak na umbalga dosana. Martujuan do pamintoran ni Debata gabe dalan tu jolma asa mardame dohot Debata mamungka parngoluan na imbaru jala badia. Pamintoran ni Debata asa dohot do sude taruli di haluaon naung pinarade ni Ibana. Jadi tangkas ma songon nidok ni Martin Luther, haluaon sahat tu ngolunta on holan mangasahon asi ni roha ni Debata (Sola Gratia).

3.      Manaon di bagasan habengeton (ay. 3 – 5). Asi ni roha ni Debata I, ingkon dipangke muse gabe sada hagogoon ni halak na porsea mangalo tantangan ni haporseaonna. Molo tung pe godang parungkilon dohot haporsuhon laho mangihuthon Tuhan Jesus, gabe lam togu ma nasida. Tagamon nasida ma angka insakinsak, persoalan bahkan penganiayaan alani haporseaonna, alai diujungna saluhutna i gabe hadengganon. Halak na porsea ingkon mamereng sian sisi positif dohot pamerengan ni haporseaonna songon nidok ni ayat 3 dohot 4; dihorhon haporsuhon i do habengeton ni roha, dihorhon habengeton ni roha i do hatauon, jala hatauon i do mangkorhon pangkirimon tu Debata. Proses ni ngolu ni halak na porsea i, patuduhon nunga monang nasida sian pergumulan i, molo benget di bagasan Kristus. Ia sasintongna nunga jumolo diusehon tubagasan rohanta holong ni roha ni Debata marhitehite Tondi Parbadia. Dilehon do tondi hagogoon, tondi haholongon, tondi pangarajaion diri, ndada tondi hatahuton (2 Timoteus 1: 7). Sialani I gabe yakin halak na porsea I mangadopi angka tantangan ni ngolu ala nunga jumolo diperlengkapi Tuhan Debata.

4.      Panghongkopon ni Tuhan Jesus (ay. 6 – 11). Hatuaon ni halak na sian Tuhan Jesus ima panghongkoponNa luar biasa, na so pola adong di ajaran ugamo na asing jala holan Tuhan Jesus do na tuk laho mangulahon i. Ala olo do Ibana tuat tu portibi on mangalului jala manggantihon jolma pardosa tu paruhuman. Pandohan ni Apostel Paulus “Uju pardosa dope hita” nunga dilehon Debata asi ni rohaNa disi, alai gabe lam arga ma hita dung ditobus mudarNa sandiri. Alani I ingkon tapasangap ma Ibana jala satia tu Tuhan Jesus. Di ganup angka naung tinobusNa, ingkon mangargahon silehonlehon (anugerah) ni Tuhan Debata marhitehite Tuhan Jesus, asa unang magopo pambahenan ni Tuhan i. Tajalo sian Tuhan Jesus; holong na murni jala balga, hasesaan ni dosa, pardamean dohot Debata dohot di hangoluan na so ra suda, gabe motivasi tu halak Kristen asa olo maniru/mangihut songon binahen ni Tuhan Jesus, pinomat tau diri, ia hita ima na tinobus ni Tuhan Jesus asa taboto bersyukur tu adopan ni Debata jala marsihohot di bagasan goar ni Tuhan Jesus Kristus. Amen