Pangungkapon (Wahyu) 5: 11-14 Marhaposan tu Jahowa ma hamu

 

Nats	Pangungkapon (Wahyu) 5: 11-14
Topik/ Tema/ Judul	Marhaposan tu Jahowa ma hamu

Patujolo

Dilehon Debata do pangungkapon tu si Johannes uju tarbuang ibana di pulo Patmos laho patoguhon roha ni angka siihuthon Jesus mangadopi angka pangaleleon dohot panggosagosaon sian na manghasogohon goar ni Tuhan Jesus Kristus. Pangungkapon dipasahat dibagasan bahasa na mamangke parnidaan, gombaran na marlapatan, na boi diantusi halak Kristen ujui alai maol diantusi halak na asing. Tardok masa do hatiha i angka halak Kristen na marbunibuni sian angka panggomgomi na koras (Kaisar Domitianus) na so mangaloas hajongjongan ni Siihuthon Jesus. Porlu diingot ia Pangungkapon on nunga hea masa, alai tetap do i topet tu partingkian sisaonari (kekinian) jala na naeng masa dope.

Hatorangan

1.                  Tuhan Jesus na gabe sipalua. Turpuk on laho patoranghon huaso ni Tuhan Jesus na gabe Sipalua ni halak na porsea tu Ibana. Pamerengon dohot pengalaman ni si Johannes i laho patoranghon Tuhan Jesus naung hea mate jala mulak mangolu laos i do muse na gabe Panguhum na parpudi na holan Ibana do boi mambukka buku na marsahap i laho manontuhon upa dohot huhum na patut tu ganup manisia. Sahat ma Anak ni Debata i tu hasangapon na tumimbo, jala ndang adong be na boi mangimbangi hasangaponNa. Jadi ndang marisuang haporseaon dohot parsihohoton mangihuthon Tuhan Jesus nang pe di bagasan angka sitaonon na dokdok alani haporseaon tu Jesus Kristus i. Tuhan naung hea tarsilang i, laos ido Tuhan ro di salelengnilelengna jala Ibana do na marhuaso di ari na parpudi.

2.                  Parangan Pardisurgo. Parangan ni pardisurgo ima saluhut angka na porsea i: torop angka surusuruan, soara ni angka parngolu i dohot angka sintua i. Di hata Gorik dipangke do Angelon, zoon dohot presbuteron. Laho mamparsitutu lehonon ni Debata do tumpal na ummuli i tu angka naung manghamonanghon haporseaonna: angka surusuruan ni Debata, mahluk hidup dohot angka tuatua (sintua) na gabe halomoan ni Debata. Alani i do ganup halak na porsea ingkon sai torus mandasdasi halak na porsea asa sude gabe parmonang di adopan ni Tuhan Debapta. Sai adong do i nian na ingkon ambolong alai dihirim do unang ma nian adong na mate haporseaonna. Nunga diparade Tuhan Jesus be dalan laho tu haluaon ni, holan mandalani dalan na naung pinaradena i na ma hita asa hot di dalanna, nunga dilehon haluaon i, tinggal manjaga haluaon dohot pahembanghon haporseaon na ma ianggo ulaonta.

 

3.                  Mamuji dohot Pasangap Debata. Angka na porsea i marsoara na gogo mandok: “Na tama do Birubiru naung tarbunu i manjalo hagogoon dohot hamoraon dohot hapistaran dohot sahala dohot hamuliaon dohot hasangapon dohot pujipujian.” Ganup halak marlas ni roha ala nunga dilehon Debata pangondian na umbalga ima AnakNa Tuhan Jesus Kristus. Birubiru ni Debata naung tarbunu i mate sahali laho manggantihon birubiru pelean situtungon jala gabe singkat ni uhum na tu hita. Gabe gok jala singkop ma haluaon ni Tuhan Jesus. Naeng do saluhut na tinompa ni Debata angka na dibanua ginjang, di tano, di toru ni tano ro di na di laut laho mamuji dohot pasangap Debata tarlumobi ma angka manisia songon tompaan na marmulia jala angka na hinongkopNa.

Panimpuli

Turpuk Hata ni Debata on nunga patoranghon hadirion ni Tuhan Jesus marhite pangungkapon na tu si Johannes. Unang ma nian adong na ragu di haporseaonna tu Tuhan Jesus, ai nunga tangkas jala singkop ha-Debata-on ni Jesus Kristus na paluahon hita sian dosa dohot hamatean jala na paradehon inganan di angka naung porsea. Diarahon turpuk on do hita asa marhaposan tu Jahowa. Tarjou do hita laho patuduhon sikap manang bentuk ni haporseaonta na ingkon lam matoras ima parsombaon tu Debata na borhat sian haporseaon na togu. Amen