PANGUNGKAPON 22: 12-17 NGOLU NA MARHABADIAON DI JOLO NI DEBATA

 

PANGUNGKAPON 22: 12-17

NGOLU NA MARHABADIAON DI JOLO NI DEBATA

1.         Dilehon Debata do pangungkapon tu si Johannes uju tarbuang di pulo Patmos laho patoguhon roha ni angka siihuthon Jesus mangadopi angka pangaleleon dohot panggosagosaon sian na manghasogohon goar ni Tuhan Jesus Kristus. Marhite Pangungkapon i laho mangalehon semangat haporseaon tu angka Kristen na hona aniaya asa tongtong martahan marhaporseaon holan tu Tuhan Jesus. Buku Pangungkapon na dipasahat dohot bahasa na mamangke parnidaan, gombaran na marlapatan, na boi diantusi halak Kristen ujui alai maol diantusi halak na asing. Tardok masa do hatiha I angka halak Kristen na martabuni-buni sian angka panggomgomi na koras na so mangaloas hajongjongan ni Siihuthon Jesus.

2.         Ida ma, gira ma Ahu ro! (Ay. 12 a) Tongon do muse nasida maimaima haroro ni Tuhan Jesus na paduahalihon, anggiat malua nasida sian angka sitaonon alani haporseaonna tu Jesus. Hape secara partingkianna nunga didok Tuhan Jesus ndang adong na umbotosa asing sian Debata Ama I (Mat. 24: 36). Alai sitiopan dohot pos ni roha ni halak na porsea didok Tuhan Na ro do Ibana muse, “Ida ma, gira ma Ahu ro!”. Na paimaimahon haroro ni Tuhan Jesus na paduahalihon (Parousia) asa torus rade managam Tuhan Jesus di bagasan hasatiaon. Saleleng adong dope tingki dilehon Debata, asa tongtong jolma i berbenah diri. Na pasti, ingkon saut do haroro ni Tuhan Jesus muse tu portibi on.     Boanonku ma upa silehonon tu ganup, hombar tu na niulana! (ay. 12 b). Halak na tongtong mangulahon hatigoran, manjaga habadiaonna jaloonnasida ma upa na denggan hombar tu pambahenanna. Molo nunga jumpang ari paruhuman, marlas ni roha ma angka halak na porsea jala na satia I, alai dapotan uhuman ma angka pardosa manang parjahat. Sian I dipaingot do halak na mangihuthon Tuhan Jesus I asa tangkas marhaporseaon jala satia. Molo nunga dipaboa Tuhan Jesus adong do upa hombar tu na niulana, asa lam manat ma tutu angka jolma mamangke hangoluanna.

3.         Ahu do Mulana jala Punsuna, Parjolo jala Parpudi, Bonana jala Ujungna! (Ay. 13) Aku adalah Alfa dan Omega, Yang Pertama dan Yang Terkemudian, Yang Awal dan Yang Akhir. Pandohan ni Tuhan Jesus do I laho patuduhon Dos do Tuhan Jesus dohot Debata Ama Panompa, Debata naung adong hian, na naeng ro i, Sigomgom saluhutna (Pangungkapon 1: 8; 21:6). Jala Tuhan Jesus ma na ro gabe Raja dohot Panguhum na bonar di ari parpudi. Marhite Tuhan Jesus Kristus, nunga ditaluhon Debata be sude musu, termasuk sibolis. Gabe ndang surut be haporseaon ni halak na mangihuthon Tuhan Jesus. Sian Pandapot ni Penafsir (W.A. Criswell) Alfa dohot Omega marlapatan nunga dirahut /dirongkum Debata sude na adong di portibi on, ima angka na masa dohot na naeng masa, na nyata dohot na so nyata dope. Laho patuduhon Tuhan Jesus na marhuaso di atas ni saluhutna. Ingkon marsomba tu Ibana do sude huaso, waktu dohot bangso. Tuhan Jesus ima Debata di sude partingkian sian panompaon sahat tu ujung ni portibi on.

4.         Martua ma angka na manjaga habadiaonna (Ay. 14) angka na mamburi abitnasida ima kiasan tu angka pardosa, parjahat, alai nunga ditopoti dosana jala bertobat. Tangkas do poda haluaon ni halak Kristen ima asi ni roha ni Debata marhitehite Tuhan Jesus Kristus, ndada alani pambahenan ni jolma, alai dipangido Tuhan Debata do nang tu angka na mangihuthon Ibana asa marhasatiaon, mangulahon holong, jala unang hasurahan sampe ro ari parpudi. Asa dohot nasida parjambar di hangoluan masuk tu Harajaon naung pinarade ni Tuhan Jesus.

5.         Uhum tu angka parjahat (Ay. 15) dipaingot do dison angka na so hot mangihuthon Tuhan Jesus dohot gombaran na roa: hata biang/panangga ima pandohan tu angka halak na sai lomoan rohana tading di dosa, na so olo pauba roha uju di ngoluna. Angka siulahon rasun ima angka tukang sihir, na mamangke hagogoon ni begu. Angka na mangulahon dosa dohot hajahaton na hinasogohon ni Debata; Parmainanon, Pargabuson, Pamunu. Dohot sioloi na so Debata ima angka hasipelebeguon; sioloi ajiajian, manomba dewa-dewa di kuil, dohot na mamparsoada hagogoon ni Debata. Halak sisongoni ndang dohot bongot tu Harajaon ni Debata alai dipapulik do laho uhumonNa.

6.         Ro ma ho tu Debata (Ay. 16-17) Marhite turpuk on laho mangorahon hita asa Ro ma tu Debata, Na di duru/ luar hian manang naung mananda Tuhan Jesus, asa ro ma tu Ibana, mangihuthon Tuhan Jesus di bagasan hasatiaon, angka na marsitaonon alani haporseaonna gabe margogo, angka na giot mangula dosa dohot hajahaton dipaingot so tung dang dapot boi bongot tu Inganan naung pinarade ni Tuhan Jesus. Tadapothon ma Tuhan Jesus bintang Sipaias I dohot aek hangoluan I jala paimahon haroro ni Tuhan Jesus di bagasan roha na manongtong dohot ngolu na mar habadiaon di jolo ni Debata. AMEN