MATEUS 13: 47 – 50 Halak na polin dohot na marsipaulaula

 

MATEUS 13: 47 – 50

Halak na polin dohot na marsipaulaula

1.      Jotjot do dipangke Tuhan Jesus tudosan/ perumpamaan laho mamaritahon barita na Uli asa ummura diantusi. Di bagasan turpuk on, diumpamahon Tuhan Jesus do harajaon banuaginjang i tu jala na sinampakhon tu laut gabe marragamragam dapotsa dengke. Laut ima simbol ni portibi on na niingani ni angka jolma na marragam (halak partigor dohot parjahat). Diloas do rap mangolu na porsea i dohot na so porsea i alai di tingkina patuduhon ni Debata ma annon saluhut hasintonganna di ari paruhuman i. Tarida disi hadaulaton ni Debata na sangap na manguhumi saluhut bangso. Marhite parumpamaan na binahen ni Jesus martujuan do asa taboto, tangi jala tahaporseai harajaon ni Debata.

2.      Halak na polin dohot na marsipaulaula (ay. 47-48). Situasi na dipangke di bagasan turpuk on ima kelautan manang nelayan. Adong pigapiga unsur na digoari gabe simbol nampuna arti tarsongon laut, jala, dengke. ‘Laut’ na gabe gombaran ni portibi on inganan mangolu ni saluhut jolma di sude kategori: na burju-na jahat, na badia-na pardosa, na sangap-na lea, na mamora-na pogos, na balga-na metmet, dna. ‘Jala’ ima gombaran ni  asi niroha dohot panonoguon ni Tuhan Debata tu jolma na manait manang mamboan jolma tu harajaonna asa taruli di angka haulion naung diparade Tuhan Debata. Adong muse ‘dengke’ ima gombaran ni jolma na gabe tujuan asi ni roha ni Debata. Na tardohot do sude tarjou laho mandapot haluaon sian Debata, alai ragam do kondisi ni angka na tarjala i. Diadopan ni Debata botoonNa do na patut angka dapotan jambar hangoluan i, jala bahenonna ma paruhuman tu angka parjahat na saleleng on. Dos do dohot umpama sebelumna ‘Eme dohot simaremeeme’ alai di bagasan turpuk on dipangke do marhite na mamillit dengke na denggan na manggombarhon halak na polin di bagasan lapatan halak na burju, sintong dohot satia. Jala dengke na so hasea ima gombaran ni halak na marsipaulaula/ berpura-pura, motivasi na pe ndang sintong, diulahon na so sian ias ni rohana manang marpangansi. Minggu parningotan ni angka na monding tongtong laho paingothon hita: parsatongkinan do portibi on jala sude jolma ingkon mate di tingkina be, alani saleleng mangolu dilehon Tuhan i ingkon mangolu do hombar tu Hata ni Debata.

3.      Keadilan ni Tuhan Debata (ay. 49 – 50). Saluhut do patar di adopan ni Debata. Ndang pintor diuhumi halak siparjahat i, alai dilehon dope tingki parasian laho paubahon rohana. Adong do huaso/ hak mutlak ni Debata laho manontuhon ise na denggan dohot na roa. Dung pe ro Tuhan I di ari paruhuman laho mamboan upa dohot uhum, do angka surusuruan i manirangkon angka parjahat sian tongatonga ni angka partigor. Sialani I ndang jadi halak na porsea i mangiburu ala sipata mamereng mandohar do parngoluan ni angka parjahat i. Ndang jadi mandele manang gotap di tongan dalan haporseaonta alani dang tahan mangihuthon Kristus. Ndang patut manguhumuhumi dongan sembarangan, apalagi molo so tangkas salana, ala adong do Tuhan Debata Panguhum na tingkos. Molo di jolo ni jolma, boi do ditabunihon angka pardosaon, alai di adopan ni Debata tangkas doi sasude, alani I sai tarboto halak na polin manang marpangansi; antara Kristen sejati dohot na berpurapura. Ai ganup jolma manjalo sogot hombar tu na niulana. Dilehon Debata do angka sipasingot asa unang adong panolsolion molo masa paruhuman disi ma masa angguhangguk dohot na patungoripon.

4.      Dohot Pararathon Harajaon ni Debata, marhite perumpamaan na jotjot dipasahat Tuhan Jesus, godang do na mambege alai saotik do na mangantusi dohot manghaposi. Alani I asa dapot lapatan ni angka perumpamaan ni Tuhan Jesus, ingkon lam tangi jala mangoloi Hata ni Debata. Tarjou do saluhut ruas gabe jemaat na missioner marhite hadirionna ganup; tohonanna, profesina, jabatanna, ngoluna asa dohot marbarita na uli. Lobi mangkorhon do Barita Na Uli i molo dipasahat secara kerja sama di bagasan huria I. Songon “Jala’ tu dengke i, asi ni roha dohot panjouon haluaon sahat do tu ganup jolma, asa tapangke asi ni roha ni Debata tu hadengganon asa dohot hita monang di ari naung ditontuhon ni Tuhan Debata. Diarahon turpuk on do hita asa masuk tu horong ni angka tu dosan na denggan (contoh yang baik) gabe eme na hasea ndang simaremeeme, gabe dengka na denggan ndang dengke siambolongkonon, dna asa dapotan angka pasupasu, upa naung pinarade ni Tuhan Debata . Amen