Mateus 10: 40-42 Mangoloi Parsuruon ni Debata

 

Nats	Mateus 10: 40-42
Nats	Mangoloi Parsuruon ni Debata

I.                   Patujolo

Di bagasan turpuk on, dibaritahon Injil Mateus do taringot tu Tuhan Jesus na paborhathon angka siseanNa. Andorang so dipaborhat, jumolo do Tuhan Jesus mambohali angka siseanNa marhite angka poda na porlu sipeopon ni siseanNa dohot angka na laho borhat manghobasi di ulaon ni Debata. Isarana: borhat manghobasi siala parsuruon ni Debata, mangurupi angka siurupan (na marsahit, na kemalangan, dna), ndang holsoan tu angka na ringkot di ibana, borhat sian ias ni roha ndada patujolohon sihirimon (bdk. Ay. 1-12). Alai di ayat na mangihut dipaboa Tuhan Jesus do muse angka realita na marragam taringot tu panjanghonon ni angka na laho manjalo Hata ni Debata dohot sikap ni angka sisean di na laho manghobasi parbarita naulion.

 

II.                Hatorangan

Ay. 40. Mangoloi parsuruon ni Debata marhite ragam ni ulaon panghobasion. Alai dipaboa hian do, adong do na mura manjanghon Ibana dohot adong na maol manjanghon Ibana. Mangulahon Hata ni Debata na sipata ndang mura ala ndang sai mulus sude laho mangulahon hataNa, sipata sai jumpang do angka tontangan isarana ndang olo tujuan ni barita nauli i laho manjalo Hata ni Debata, manang adong do na manjalo Barita Nauli i alai tongtong mangolu di bagasan hasomalanna na golap jala gok dosa. Alai sabalikna boi jala neang do ulaon na sian Tuhan Debata, molo Ibana na gabe tapangasahon di bagasan panghobasionta. Tung pe dokdok ulaon panghobasion i, alai molo mangasahon Tuhan Debata gabe lobi tangkas ma muse pandonganionNa di bagasan panghobasionta. Di ayat 40 nunga tangkas mandok ia na manjanghon angka na sinuru ni Debata tudos do i na manjanghon Debata.

Ay. 41. Ringkot ayat 41 on, sitiopon ni angka parhobas ni Debata suang songoni dohot angka khalayak, ia ulaon na pinasahat ni Debata, ndada ulaon ni hajolmaon sambing misalna ala lomolomo ni roha manang hamaloan, manang laho patuduhon hagogoon alai tujuan ni ulaon panghobasion i ima laho pasangaphon Debata. Tujuan ni ulaon panghobasion i ima laho pasauthon sangkap ni Debata na laho mamboan haluaon. Ulaon na sian Debata isarana panurirangon, hamalimon, parbaritanaulion, parsaoran, parasirohaon, dohot angka na asing naeng do taulahon songon tanda las ni rohanta dohot haporseaonta tu Debata. Sialani i, angka na sinuru ni Debata dohot angka sasaran ni Hata ni Debata (ruas) ingkon rap patulushon ulaon ni Debata i. Gabe martua ma halak na mangulahon parsuruon ni Debata, suang songoni halak na manjanghon Debata. Gabe ndang marisuang Hata ni Debata di angka parhitean na pinangkeNa suang songoni di halak na tumangihon.

Ay. 42. Marragam do sikap manang reaksi ni jolma laho manjanghon Hata ni Debata. adong do na manulak, manutup diri, satonga roha, dna. Alai tahirim do, dungkon ro Hata ni Debata manang angka parhobas na sinuruNa, angka reaksi na uli ma nian na ro, manjanghon angka na sinuru ni Debata, tarlumobi manjanghon angka poda ni Debata. Dilehon Debata do dalan laho patuduhon hadirionNa marhite angka panurirang, malim, parhalado, panggomgomi dalan laho mamboan jolma tu hadengganon. Hapataran ni Debata, ndada laho patuduhon diriNa secara fisik (songon na masa tu si Musa marhite jillam ni api di rambaramba) manang songon Tuhan Jesus uju ro tu portibi. Alai dipatuduhon Debata do hadirionNa marhite ulaon ni Tondi Parbadia na mamangke jolma gabe parhiteanNa.

 

III.             Sipahusorhusoron

1)      Manjanghon Tuhan Jesus. Disuru Tuhan Jesus do angka siseanNa laho marbarita nauli dohot pararathon harajaonNa. Dipartingkian saonari, ndang be tingki ni angka sisean, alai partingkian ni angka parhobas huria na pinangke ni Debata. Sialani i tajanghon ma angka na sinuru ni Debata, ai tudos doi na manjanghon Ibana.

2)      Mangoloi Parsuruon ni Debata. Di ganup halak na dijou, dipillit jala disuru Debata, dengganna mangoloi jala marpos ni roha mangulahon ulaon na sian Debata, ai Tuhan Debata do na paborhathon.

3)      Pasauthon Sangkap ni Debata. Saluhut hita na hingkop ni Tuhan Debata. Nang pe marasing be pardalanan ni ngolunta, alai sude do tarjou laho pasauthon sangkap ni Debata. Naeng taarahon sude aspek ni ngolunta manatap tu lomo ni roha ni Debata.

4)      Tarjou do Hita sude laho mangulahon HataNa. Hadirion na marrgam songon partohonan na so partohonan, baoa manakitabng parompuan, na metmet nang na balga naeng do mamangke ngoluna laho pasangaphon Debata.