Lukas 16: 1-13 Dipatimbul Debata Do Angka Na Dangol

 

Nats	Lukas 16: 1-13
Topik/ Tema/ Judul	Dipatimbul Debata Do Angka Na Dangol

 

1)    Patujolo. Godang do perumpamaan na pinangke ni Tuhan Jesus laho patoranghon HataNa, paboahon taringot tu Harajaon ni Debata dohot angka hasintongan. Dibagasan turpukta on tongon ma perumpamaan Juara bagas na geduk. Lobi bagas ma tabereng muse maksud ni Tuhan Jesus pasahathon sarita i, ala ndada songon kisah ni Robinhood na ni rajuman ni na deba songon hasintongan ala merampok jala dibagibagihon tu angka na pogos.

2)      Juara Bagas na Haposan. Di bagasan sarita on dipatorang do adong sahalak na mora nampuna juara bagas, jala tarbortik ma tu na mora on; ia juara bagasna i mansuasaehon angka artana. Disungkun jala dipangido do pertanggungjawaban sian juara bagasna i. Alai gabe angka langka ni haportibi on dipingkiri jala dipillit ibana. Dijou ibana angka parsingir, na sada marsingir saratus gunsi miak, alai disuru ibana ma dibahen lima pulu, na sada marsingir saratus tuhuk eme gabe didok ma marsingir ualu pulu. Tung mansai malo do cara ni juara bagas i, laho manubut roha ni parutang i, dipingkiranna molo tung ndang gabe juara bagas ibana, alai nunga boi annon dijalo parutang i ibana. Alai dosa do i jala ndang dihalomohon Debata, Angka hajahaton nabinahen ni juara bagas i nunga maralo be tu tugas na ni lehon ni tuan i. Aturanna na gabe siradoti gabe mansalai.

3)      Maksud ni parumpamaan ni Tuhan Jesus. Ia parumpamaan na pinangke ni Tuhan Jesus, ndada holan patoranghon taringot tu juara bagas na so haposan, alai sada kritik do tong tu halak Parise dohot Siboto surat dohot angka na tumangihon, na mian na sai laon di bagasan hageduhonna. Parjolo, Gari angka parjahat diboto do patupahon na denggan tu angka ianakhonna, apalagi ma angka na porsea i ingkon lobi manghangoluhon Hata ni Debata. Paduahon, songon hagiot ni rohanta mandiori hangoluan ni portibi ingkon lobi marsitutu ma nian ganup halak mangalului harajaon sogot. Na mangihut muse holong ni Tuhan Jesus tu jolma nang pe mardosa alai sai tongtong do dihaholongi anggiat olo maninggalhon angka dosana jala olo muba tu hadengganon.

4)      Mangoloi Debata. juara bagas nakking manggombarhon hajolmaonta, tarlumobi di situasi na jotjot hita diboan tu pilihan mamillit mangoloi Debata manang mangoloi mammon. Na dua on boi do mangarahon parangeta, molo tapilllit haportibion on (mammon), tontu roha, pingkiran, jala sude na taula pe martujuan holan mangalului hasonangan di portibi on,termasuk marhite dalan na kotor jala gok dosa. Alai sabalikna molo nunga taoloi Debata ingkon dohot ma hita mangorom diri asa unang sarombang dohot portibi on. Jadi tujuan ni ngolunta ndada holan pasuksukhon haadongon, alai di tingki mandalani partingkian na ni lehon ni Debata ingkon tahangoluhon do Hata ni Debata songon pengawal ni ngolunta. Diondolhon do muse diturpuk on ayat 13 na mandok: “Ndang haoloan sada anak somang dua induk: Sai hosomanna do na sada, haholonganna do na sada nari; hombaranna do na sada, toisanna do na sada nari. Ndang haoloan hamu Debata rap dohot Mammon i!”. sada hasintongan na niajarhon ni Tuhan Jesus, ndang taroloi hita Debata molo taoloi tongtong angka debata sileban manang roha-roha portibi.