Johannes (Yohanes) 7: 37-39 a Mangolu di Bagasan Tondi ni Debata

 

Nats	Johannes (Yohanes) 7: 37-39 a
Topik/ Tema/ Judul	Mangolu di Bagasan Tondi ni Debata

Patujolo

Andorang masuk tu turpukta on dipaboa do panghataion ni Tuhan Jesus dohot halak Jahudi dohot angka siboto patik ala habisuhon ni Tuhan Jesus mangajari lobi sian angka nabinotonasida. Gabe sungkunsungkun do nasida; sian dia do ro angka pandohan ni Tuhan Jesus i ai so manang diguruhon. Dibonana, nunga dipatorang Tuhan Jesus, ia hata ni Ibana marhoroan sian Debata Ama na marsuru Ibana, sialani i pasahatonNa ma Hata ni Debata marhite bisuk na sian Debata. Deba sian halak Jahudi dohot siboto patik na ro i ndang bolas laho mangantusi Hata ni Tuhan Jesus ala sai dijugulhon do rohana, alai deba laos gabe porsea do nasida di Tuhan Jesus. Marhite panghataion i laos naeng diondolhon do hadirion ni Tuhan Jesus, hataNa dohot lapatan ni hataNa i.

Hatorangan

1)      Jesus do Aek Hangoluan. Dibagian parpudi bindu 7, naeng diondolhon Tuhan Jesus do ia Ibana ima Aek Hangoluan di bagasan pangantusion na sian Debata. Na so tupa be mauas manang ise na porsea di Ibana (6: 35). Jala boi diantusi pandohan i molo dijangkon sian haporseaon. Parasingan na tandi sian haportibion, ia Tuhan Jesus ndang torus rap dohot angka na torop i, ai ndang dibatasi pamatang ianggo Tuhan Jesus, alai Ibana do annon di ari na parpudi na gabe panguhum. Jala ndang torus ibana di portibi on ala manaek do Ibana tu harajaon ni Debata. Tuhan Jesus ndang be holan tu halak Jahudi manang tu jolma na mangolu hatiha i, alai Tuhan Jesus tu saluhut halak na porsea. Siala Tuhan Jesus ndang tarihot tu pamatang manang tingki, gabe boi ma ganup halak na porsea manjou goarNa di sandok portibi on sahat tu partingkian salelenglelengna.

2)      Ro ma hita tu Tuhan Jesus. Marhite hamonangan na nilehon ni Tuhan Jesus; haheheon dohot hananaekNa tu Banua ginjang gabe mangalehon kesempatan marjambar di harajaon naung pinarade ni Tuhan Jesus di ganup halak na porsea i. Dijou do saluhut angka na mauas di Ibana termasuk hita asa ro tu Ibana. Dipangke do hata aek laho patoranghon ringkot na i aek di parngoluan siganup ari, tarlumobi ma Tuhan Jesus Kristus na gabe aek hangoluan na so boi tarsirang sian ngolu ni halak na porsea, ai ndang boi hita mangolu molo so adong aek dohot Aek Hangoluan i. Ingkon tajalo do aek hangoluan i, asa mangolu hita dungi gabe boi ma tasagihon muse aek i. Sian mual na tio dapotma tutu aek na tio, sian mual na doras dapotma aek na godang. Molo mian aek hangoluan i di bagasan hita, gabe taruli pasupasu ma hita jala gabe pasupasu tu angka humaliang.

3)      Na sian Debata ingkon diantusi “secara Debata”. Nian ndang boi singkop hita di adopan ni Debata, alai nunga diurupi Tuhan Jesus dohot Tondi Parbadia laho mangantusi Debata dohot angka lomo ni rohaNa. Na somal gabe dasar pingkiran ni hajolmaon ima logika (mangihuthon pingkiran) manang empiris (marojahan tu pengalaman) alai ndang torus i boi tapangke laho mangantusi Hata ni Debata. Songon halak Jahudi i, gabe dipingkir halaki do Tuhan Jesus paburnang diri ia didok Tuhan Jesus huasoNa sian Debata Ama jala didok Tuhan Jesus pe borhat Ibana laho mandapothon Debata Ama na marsuru Ibana dipingkir halak i do naeng borhat Tuhan Jesus tu Gorik (Junani). Jotjot dope pangantusionta mangalapati Hata ni Debata sian hadirionta ujungna gabe ndang martomu tu maksud ni Tuhan Jesus. Ingkon na sian Tondi i do boi mangantusi na nidok ni Tondi i.

Panimpuli

Lam meningkat ma kesadaran di hita ia ngolunta ima na sian Debata, alani mangolu pe hita ingkon di bagasan Debata do. Tajalo ma pangarupion sian Tuhan Jesus asa lam taantusi na pinangidoNa jala dipargogoi hita mangulahonsa. Amen