JOHANNES 15: 9-15 MANGOLU DI BAGASAN ASI NI ROHA NI DEBATA

 

JOHANNES 15: 9-15

MANGOLU DI BAGASAN ASI NI ROHA NI DEBATA

1.            Patujolo: Barita na uli na pinasahat ni si Johannes laho patuduhon Jesus ima Anak ni Tuhan Debata na gabe jolma jala maringan di bagasan hita. Injil Johannes laho patangkashon Tuhan Jesus do Mesias; Raja Sipalua naung dibagabagahon, Hata ni Jahowa na gabe daging. Debata Ama do na marsuru Ibana jala manang ise na porsea di Ibana dapotan hangoluan. Di bagasan Barita na Uli on ragam do dipatandahon Jesus diriNa songon tudosan sian benda siganup ari na marlapatan tu hangoluan partondion isarana aek, roti, dalan, hatiuron, parmahan dohot birubiruna, hau anggur dohot rantingna. Sude na i pabotohon hahomion ni Debata di bagasan diri ni Jesus.

2.            Hasadaon ni Tuhan Jesus dohot Amana I mangajarhon holong (Ay.9).  Pandohan ni Tuhan Jesus tu angka siseanNa papatarhon sada do Ibana dohot Tuhan Debata Ama, ai Ibana do nang Debata I sandiri. Hombar do Hata I tu konfessita (Bindu 1 taon 1996) na mandok sada do Debata jala di bagasan hapataranNa Sitolusada do Ibana, ima Debata Ama, Debata Anak, dohot Debata Tondi Porbadia, na so marmula na so marujung. Laos hasadaon ima mangajarhon tu jolma asa masihaholongan. Tuhan Jesus pe manghatindanghon holong ni roha ni Debata Ama di Ibana, alani holong ni rohaNa Ido umbahen disuru AnakNa na sasadai humongkop angka pardosa. Pambahenan ni Tuhan Jesus di hau pinarsilang I ima holong na umbalga na sahat tu saluhut jolma. Holong ni roha ni Tuhan Jesus tudos ma songon holong ni roha ni Debata Ama tu Ibana, jala dilehon do holongna i tu ganup angka na porsea. Lapatanna saluhut penggerak ni holong ima marnida Tuhan Debata dohot Anakna Tuhan Jesus Kristus na jumolo manghaholongi gabe patauhon jolma asa marsihaholongan.

3.            Mian di bagasan Tuhan I (Ay. 10-11). Molo mian di bagasan Tuhan I, berarti nunga manongtong manang tinggal hita di bagasan Tuhan i. Mian rap dohot Kristus marlapatan do i pasahathon diri gabe nampuna ni Jesus, ai na marsigantung tu Ibana do ngolunta asa boi mangolu jala marparbue. Disosoi do tu hita asa gabe siula Hata i marhite angka pambahenan manang parange na denggan di ngolu songon tanda ni parbue na mian manang rap dohot Jesus Kristus. Tontu ndang sae holan na mandok: Huholongi do Debata, alai roha dohot parngoluon tongtong dao sian Debata. Dipataridahon Tuhan Jesus do sada keteladanan, jala dilehon do dalan asa mian di bagasan holong ni roha ni Debata ima mangaradoti patik manang parenta ni Tuhan Jesus. Dioloi Ibana do parsuruon ni Debata Ama laho mangulahon patik holong I.

4.            Masihaholongan (ay. 12). Molo naeng gabe aleale ni Tuhan Jesus naeng ma masihaholongan, Songon Jesus manghaholongi hita. Molo dibandinghon tu patik Raya (Mateus 22: 37-40) Jadi didok Jesus ma: Sihaholonganmu do Tuhan Debatam sian nasa ateatem, sian nasa hosam dohot sian nasa roham! I do patik raja jala parjolo. Alai dos do arga ni na paduahon on: Sihaholonganmu do donganmi doshon dirim! Patik na dua on do mangkangkam nasa patik dohot hata ni panurirang. Didok disi asa manghahoholongi Tuhan Debata suangsongoni manghaholongi donganta jolma. Pangkorhon ni holong gabe pasupasu tu angka humaliang, marlas ni roha angka na diurupi, padamehon, manghungkupi godang dosa. Holong Ima na gabe pangoluhon jala umbahen gok halalas ni roha ni halak na porsea.

5.            Aleale ni Tuhan Jesus (Ay. 13-15). Di bagasan paralealeon sumurung do tarida holong ni roha, ala di bagasan paralealeon nunga rap mamboto, sapingkiran dohot sapanghilalaan diantara ni namaraleale i. Dijou Anak ni Debata I do hita asa gabe alealeNa. Angka na maraleale sai rap do mangadopi angka na masa; rap mandai hinatabo ni na mardongan, rap manaon hinahansit ni parngoluan. ‘Na sumeahon hosana humongkop angka alealena, i do parholong ni roha na so halompoan’. Ndang piga jolma na tarbahen songoni, alai nunga jumolo Tuhan Jesus patupahon i tu angka jolma pardosa. ‘Alealengku ma hamuna, molo diula hamu na hupatikkon i tu hamu’. Hataboan ni siihuthon Kristus diangkat gabe alealena. Nunga adong alealenta lobi sian pardonganon (persahabatan) na adong di portibi on. Molo paralealean di portibi boi do mubauba alani situasi, alai taingot ma adong do aleale na sumurung ima Tuhan Jesus I (BE. 219). Ibana na tongtong mandongani ngolunta jala mangaramoti hita ro di salengnilelengna. Nunga diajari Tuhan Jesus hita asa masihaholongan, gariada didok do hita gabe aleale ndang anak somang. Sian i do naeng berengonta ngolu on hape holan asi ni roha ni Debata sambing do (Sola Gratia), gabe pagogohon hita laho mangulahon angka holong ni roha. *AMEN*