JOHANES 21 : 15 - 19 MANONGTONG MANGIHUTHON JESUS

 

JOHANES 21 : 15 - 19

MANONGTONG MANGIHUTHON JESUS

1.         Patujolo: Di bagasan turpuk on, dipatupa Tuhan Jesus do laho patuduhon dirina asa diboto jala porsea angka Siseanna I naung hehe do Jesus i. Tongon di tingki i marpungu angka Sisean I, laos didok si Simon Petrus ma naeng mardengke ibana tu Tao Tiberias. Na saleleng on rap dohot Tuhan Jesus nasida nunga marbarita nauli dohot paihutihut panghobasion ni Tuhan Jesus, alai dung dibotonasida mate Tuhan Jesus mulaima nasida naeng mulak tu ulaonna ganup laho mangulahon angka ulaonna na hian. Termasuk si Petrus dohot angina Andreas ima panjala dengke hian do nasida uju so dijou Jesus gabe siseanna. Sialani i mirip tu panjouonna na parjolo, ringkot do Tuhan Jesus manungguli/ paingothon panjouonNa tu si Petrus. Dang dapotan dengke nasida alai disuru sahalak ma muse nasida laho manampakhon jalana dompak siamun, jala dapotan dengke na godang ma nasida. Gabe diingot si Petrus ma Tuhan Jesus jala diangkui ibana: “Tuhan I do i” (ay.1-14). Udutna laos marpungu ma nasida rap mangan dohot Jesus.

 

2.         Sungkun-sungkun ni Tuhan Jesus: disungkun Tuhan Jesus do si Simon Petrus, anak ni si Jonas, “humolong do roham di Ahu sian angka on? Jadi didok ma tu Ibana: Olo, Tuhan; diboto Ho do holong ni rohangku di Ho!”. Marhite na masa I, dipaimbaru Jesus ma muse panjouonNa tu si Simon Petrus, ala tutu nunga diparsoada ibana Tuhan Jesus tolu hali jala naeng lam mandao manadinghon Jesus. Masa hagaleon ni haporseaon di bagasan dirina ala ndang gok dope haporseaonna di haheheon ni Tuhan Jesus. Disungkun Tuhan Jesus do I marulakulak pola sampe tolu hali, pola do marsak roha ni si Petrus. Alai adong do cara ni Debata, laho pabangkithon muse, mambahen si Petrus gabe sahalak na porlu didok Jesus ma tu ibana: Parmahan i ma anak ni birubirungku!. Marhite I naeng mandok asa unang mangulahon ulaonna di bagasan pandelean manang frustasi. Jala unang holan mangandalhon dirina sandiri. Ai tarbukti do, dang dapotan agia aha nasida tingki marjala dengke molo so didongani Tuhan Jesus, ala nunga dijou Debata nasida gabe sijala jolma. Antong laho mangula angka siulaon pe tongtong do ingkon pasahathon diri tu Tuhan Debata. Lam toguma haporseaon tu Tuhan Jesus, asa unang marisuang hahehon ni Tuhan Jesus sian hamatean.

 

3.         Manongtong Mangihuthon Jesus: sungkun-sungkun ni Tuhan Jesus dialusi si Petrus do: “Olo, Tuhan; diboto Ho do holong ni rohangku di Ho!”. Si Petrus manggombarhon sifat na menggebu-gebu, pandohanna patuduhon na holong do rohana tu Tuhan Jesus jala naung rade do ibana manjalo manang ahape na masa laho mangihuthon Tuhan Jesus. Ndang olo ibana targasip haporseaonna( Mat. 26: 33) jala rade do Ibana (Mat. 26: 35) dna. Alai ndang martahan hasatiaon ni ibana molo ro angka ujian. Mago do haporseaonna, tingki diparsoada ibana Tuhan Jesus jala dung ndang rap be nasida dohot Jesus. Tongtong do paingothon saluhut halak na mangihuthon Kristus Jesus na jotjot patupahon angka pandohanna, janjina, ikrarna laho mangihuthon Debata, hape molo ro angka tantangan pintor sumurut muse haporseaonna. Angka pandohan: na tutu do au porsea tu Debata, manang ahape na masa ingkon Tuhan Debata do haporseaonku, alai dung ro angka hamaolon laos ditinggalhon do Tuhan i. Tongtong paingothon godang halak Kristen na mago haporseaonna alani angka faktor tekanan, karejo, jabatan, arta, lingkungan, dna. Alani I dipangido turpuk on do tu hita asa manongtong mangihuthon Tuhan Jesus, adong komitmen laho mangihuthon Tuhan Jesus, jala setia mangihuthon Tuhan Jesus di saluhut angka na masa. Manang ise na bertahan ro di ujungna, ido pamonangon ni Tuhanta Jesus i.

 

4.         Parmahan i ma angka birubirungku!: Dihagaleon ni si Petrus dipatogu jala dipangke Tuhan Jesus do ibana, disuru do ibana laho marmahani Birubiru ni Debata. Na salelengon godang do si Petrus patuduhon ha-diri-onna, emosina, pingkiranna sambing, alai ditingki na mangihut bangkit do ibana muse gabe Apostel na marbarita nauli tu halak Jahudi di Jerusalem. Dung togu haporseaonna gabe, godang do panghobasion ni Apostel Petrus dung borhat Tuhan Jesus tu banua ginjang.  Dungi laho ma ibana tu halak Samaria, Yoppa, Kaisarea. Borhat muse tu Asia Kecil: Pontus, Galatia, Kapadosia, jala leleng di Antiokhia. Saut do hata ni Tuhan Jesus di ayat 18-19, songon dia parmatena laho pasangaphon Debata. Ai si Petrus tarsurat do na gabe Martir, jala mate dohot silang na tarbalik di Roma tingki pemerintahan Kaisar Nero. Si Petrus gabe sitiruon ni halak muse laho patuduhon panghongkopion/ pengorbanan diri siala haporseaonna tu Tuhan Jesus Kristus. Songoni ma panjouon tu halak na porsea, asa unang adong na maila, na mabiar, munggilunggil (tidak berpendirian), alai naeng ma marsihohot laho manghatindanghon haporseaonna ganup tu Tuhan Jesus Kristus. *AMEN*