1 Korint (Korintus) 6: 1 – 8 Marojahan tu Hata ni Debata

 

1 Korint (Korintus) 6: 1 – 8

Marojahan tu Hata ni Debata

1.           Apostel Paulus manurathon surat on, alani arsak ni rohana ala angka pangalaho na masa di huria i, angka persoalan na masa hatiha i: masa ma parbolatbolaton, adong na meragukan haapostelan ni si Paulus, dosa amoralitas tarlumobi ma ala pangalaho na manguhumi, na marparkaro antara halak Kristen alai dipasahat ma i tu sipargeduk. Alani i ma dipodai Apostel Paulus na so patut halak Kristen mangalului hasintongan sian halak parbegu. Dihirim ibana do asa pataridahonon ni huria Korint haporseaonnasida di Jesus marhite na pasahathon masalah na ni adopan ni huria, bulus tu Tuhan i. Ala holan Tuhan Debata do Panguhum na sintong, Panguhum sian saluhut panguhum na adong di portibi on. Intap ni na boi ingkon pasidingon ni halak na porsea do angka parkaro alani hadosaon, alai marhite turpuk on denggan do molo jolo manimbang dalan na sian Debata laho pauliulihon jolma i.

 

2.      Marojahan tu Hata ni Debata (ay. 1 – 2) . Mangida angka parkaro na masa diantara ni ruas di Korintus, dison do Apostel Paulus laho patuduhon sikap ni halak Kristen na ringkot laho patujolohon angka aturan na hombar tu Hata ni Debata. Ndada na mandok asa tadinghonon ma portibi on, alai tujuanna ima laho manirang dosa i sian nasida. Siarsakhonon do molo tubu angka parkaro, alai lam tamba ma balga ni parkaro molo mangalului gogo sian duru ni huria. Naung diranapi Apostel Paulus do dang denggan aluhonon dongan sahaporseaon tu halak sipargeduk. Sipargeduk martudutudu ma i tu angka oknum pejabat paruhuman na gok haliluon, na jotjot manjalo sisip sian angka parkarona. Jala na mangalehon sisip ipe tong do gabe mardosa. Tarbalik ma angka hasintongan; hajongjongan ni uhum hape disi masa hajahaton, dohot hajongjongan ni hatigoran masa disi hageduhon. Songon na niadopan ni Apostel Paulus maradophon Hakim Felix dohot Festus, na marsigogo pamasukhon ibana tu Penjara nang pe so terbukti hasalaanna. Alani ringkot do jumolo manjalo partimbangan sian Huria, na berazaskan holong ni roha dohot panogunoguon.

 

3.      Paruhuman na manghatindanghon hasintongan (ay. 3-4). Di sadasada Negara manang parhutaan pasti adong do uhum na berlaku disi. Alai Apostel Paulus ndang na mandok ndang ringkot paruhumon, manang gabe halak na memberontak, ala tangkas do disungguli halak Kristen asa unduk tu pamarenta. Tuhan Jesus pe mangajarhon asa unang manguhumuhumi (Matius 7: 1 – 2), asa unang muramura menilai, menghakimi, apalagi molo so tangkas dope diboto hasalaanna. Alai mangulahon angka uhum ingkon jumolo do mampartimbanghon hasintongan. Na naeng dohonon ni si Paulus, songon dia ma mangalului uhum tu halak na so sintong, na so mananda lomo ni roha ni Debata? Sialani i angka na manghatindanghon uhum pe ingkon jumolo do ibana mabiar tu Debata, asa boi ibana manghatindanghon hasintongan. Molo dang biar rohana tu Debata, apalagi ma jolma pasti dang dihabiari be, ujungna gabe marlomolomo ma papeol angka uhum i. Paingothon godang angka pejabat penegak hukum dohot keadilan na tartangkup alani Korupsi, Kolusi, Nepotisme (KKN) dohot angka hajahaton na dos tusi. Tung borat pe pajongjonghon uhum laho mandapot nilai na ideal: hasintongan dohot keadilan, alai angka nampuna huaso taringot tusi naeng do berupaya laho pajongjonghon i.

 

4.                  Parasingan Nauli ni Halak Kristen. Marhite turpuk on naeng patangkashon hatandian ni halak Kristen sian na di portibi on. Didok Rom 12: 2 Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan. Nang pe halak Kristen dohot na asing rap mangolu dope di hasiangan on, alai ndang boi lupa ibana naung diparbadiai Tuhan Jesus Kristus. Ala marharoroan sian Debata, ingkon tongtong do ngolu na bersifat ilahi. Molo masa pe angka hagaoron na di portibi on, tetap do halak siihuthon Jesus gabe sira dohot panondang. Alani i, dasar dohot cara-cara ni halak Kristen pe ingkon hombar do tu ajaran ni Tuhan Jesus. Songon na dihirim ni Apostel Paulus di bagasan turpuk on, pasaehon angka parkara nasida naeng ma secara Kristiani. Lam tarida ma tongtong pandohan ni Apostel i di Huria, asa mardasor dohot padalanhon panghobasionna dohot cara na Huria. Parbinotoan na sian Debata ndang jumpang molo holan mangasahon parbinotoan, logika ni jolma dohot keegoisan. Asa boi martomu pangajarion sian Debata tu angka na mambege, ingkon dijangkon do secara haporseaon dohot partondion. Amen