PSALMEN 31: 1 – 9 JAHOWA PARTANOBATOANKU

 

PSALMEN 31: 1 – 9

JAHOWA PARTANOBATOANKU

1.                    Goar ni Minggu ima Estomihi, namarlapatan: “Sai Ho do partanobatoan di ahu” na dienet sian Psalmen 31: 3b manang Psalmen 71: 3. Disungguli turpuk on laho mambahen Tuhan I gabe partanobatoan di ngolunta, ojahan mangadopi angka na masa di bagasan ngolu. Ala molo Tuhan Debata na gabe pangondianta nunga pasti be dapotan haluaon.  Ido na gabe Ende ni si Daud laho manghatindanghon pambahenan ni Jahowa. Alani ragam ni angka hamaolon na ro tu Ibana, bahkan naung dianggap ibana ndang boi malua sian masalah I tarsongon na pinaburuburu ni si Saul, alai boi do ibana malua sian saluhutna angka hamaoloni ala Tuhan Jahowa do partanobatoanna.

2.                  PASAHATHON DIRI TU DEBATA (AY. 1-4), di bagasan turpuk on di pasahat si Daud do dirina tu Debata di bagasan roha na marhaposan tu Jahowa. Diadopi ragam ni hamaolon, tamba muse si Saul na sai torus mangiburu ibana dungkon si Daud gabe Raja na manggantihon ibana. Tarlumobi di angka kebijakan-kebijakan ni sahalak raja laho manguluhon bangso I asa unang terjadi kesalahan dohot angka serangan sian duru dohot sian bagasan di bangso na niuluhonna. Alani I ma ndang tuk holan hagogoon manang hamaloanna laho mangadopi saluhutna I, ia so mangasahon Tuhan Jahowa. Debata do na mamillit ibana, alani I ingkon pasahatonna do angka alualu parsorion ni ngoluna tu Debata, ai holan Ibana do na tuk mangurupi parngoluonna. Dijou do tongtong halak na porsea, asa bijak mangadopi angka na masa di ngoluna marhitehite na pasahathon diri tu Debata di bagasan pos ni roha. Marhite na pasahat diri tu Debata disi do adong pangondian, inspirasi, solusi ni angka masalah, dna.

3.                  MARHAPOSAN TU JAHOWA (AY. 5-9), angkup ni na pasahathon diri tu Debata ingkon tongtong do marpos ni roha nasida tu Debata, asa haposan nang Debata tu hita. Ringkotna I martangiang pasahat saluhut angka pergumulan tu Debata, alai ingkon tongtong dihaporseai tangiang I. Hea do bangso Isral maralo dohot bangsa Asyur taon 703 sM gabe mangido pangurupion tu bangso Misir, hape laos dihianati jala ditaluhon bangso Misir do nasida. Sabalikna hea do nasida mardongan rap dohot bangsa Asyur, alai laos maup do dohot haporseaonnasida gabe marsomba tu debata sileban. Alani I ma ditanda si Daud do dirina di adopan ni Debata jala dihatindanghon Ibana do Debata di bagasan hatigoran dohot hasatiaon. So tung masa pasahat diri tu Debata, alai dibalikna dipasahat muse dirina tu debata ganaganaan.

4.                  REFLEKSI: Dison dipaingot do ia di parngoluan siganup ari, torop dope halak na gale haporseaonna. Di tingki gok angka hamaolan, na gabe pelarian tu haportibion on. alani angka permasalahan di keluarga, karejo, dna gabe pasahathon diri tu angka minuman keras, narkoba, perselingkuhan, kelompok ni angka preman, dna. Dirimpu do dapot angka jalan keluar sian angka na masuk tu horong I, hape lam madabu tu bagasan kehancuran. Godang dope na ingkon sijamothonon ni angka keluarga Kristen asa unang hancur parngoluonna ala ndang mampu mangadopi angka hamaolon. Dipaboa turpukon do salah satu cara mengatasi angka permasalahan ima marhite na pasahathon diri tu Debata jala marhaposan Ibana do pangondianta huhut mangido panorangion sian Debata andorang mambuat angka keputusan dohot tindakan asa saluhutna na taula mardalan dohot denggan. Amen