1. Marende BE. No. 565: 1+3 Sangap Di Jahowa
Sangap di Jahowa na sun timbul i, balga ni holongNa ndang tarasam i.
Dilehon AnakNa na sasada i, manobus hita jolma pardosa i.
Puji ma Debata ale manisia, las roham, las roham, somba ma Debata.
Dapothon Jahowa na sun timbul i, marhite AnakNa Tuhan Jesus i.
Balga situtu pambaenMi Debata, tung sohasuhatan holong ni rohaM.
Tu jolma pardosa asi do rohaM, diungkap Ho dalan lao tu banuaM.
Puji ma Debata ale manisia, las roham, las roham, somba ma Debata.
Dapothon Jahowa na sun timbul i, marhite AnakNa Tuhan Jesus i.
2. Votum-Introitus-Tangiang (L = Liturgis; R = Ruas; K= Keluarga, S=Sude)
L : Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia. Amen ! Pos situtu do rohangku manang hamatean, manang hangoluan, manang angka surusuruan ni Debata, manang harajaon, manang hagogoon, manang angka na masa nuaeng, manang angka na ro sogot, ndang tarbahen i manirangi hita sian haholongon ni roha ni Debata, na marhitehite Kristus Jesus Tuhanta i.
R : Diloas jala dipasupasu Ho do ale Tuhan, dongannami dison Kel.... manghilalahon pardongansaripeonnasida tongon 25 taon.
K : Dipataru Ho do ruas ni huriaM dohot angka keluarga tu Inganan on asa rap hami manghalashon angka halongangan na pinatupaM.
L : Sai lam pargogoi ma hami ale Tuhan laho manghatindanghon angka denggan ni basaM, marhitehite Jesus Kristus Sipalua hami.
S : Amen
3. Marende BE. No. 467: 1 Asi Ni RohaM Hupuji
Asi ni roham hupuji ala Ho manobus au. Dipaias Ho rohangku, gabe soranganMu au.
IngananMu rohanami, TondiMi manggohi i. Pangke dohot ngolunami gabe ulaulaMi.
4. Epistel: Nehemia 5: 1-13
L : Dung i mangangguk badar ma situan na torop i ro di jolmanasida dompak hahaangginasida, halak Jahudi:
R : Ai adong do deba na mandok: Torop do hami, nang anaknami dohot borunami, salionnami ma eme, asa mangan hami jala mangolu.
L : Alai anggo na deba mandok: Ingkon lehononnami na ma haumanami, porlak anggurnami dohot bagasnami bahen singkoram, asa tarbahen hami manuhor eme managam haleon.
R : Adong muse deba angka na mandok: Nunga huurang hami hepeng bahen garar ni rundo tu rajai, haumanami dohot porlak anggurnami singkoramna.
L : Nuaeng pe, ia songon i sibuk ni hahaangginami, songon i do sibuknami, angka anaknami pe laos songon anaknasida do; hape ida ma, ingkon lehononnami nama anaknami dohot borunami bahen hatoban, nunga pola mangadop deba sian borunami, jala marhagogoon Debata tangannami; haumanami pe dohot porlak anggurnami nunga sahat tu halak na asing.
R : Jadi tarrimas situtu ma ahu, dung hubege angguhangguknasida dohot alualunasida i.
L : Jadi marpingkir ma rohangku di bagasan, laos mangonai hata ma ahu tu halak na sangap dohot tu angka induk, ningku ma mandok nasida: Nunga manjalo bunga ni hepeng hamu hape ganup sian hahaanggina? Jadi hupaluhut ma sada luhutan na balga mangalo nasida.
R : Dung i ningku ma mandok nasida: Nunga pola hita manobus hahaangginta, halak Jahudi, angka naung targadis tu halak parbegu, hombar tu gogonta be; dohot hamu naeng manggadis hahaanggimuna i, laos manggadis tu hita tahe? Jadi sip be ma nasida ndang haalusansa.
L : Dung i ningku ma: Ndang denggan pambahenanmuna i! Nda ingkon marhabiaran tu Debatanta hita nian tama marparange ala ni panginsahion ni halak parbegu musunta i?
R : Nang ahu, nang hahaanggingku dohot angka naposongku, nunga hupasali hami nasida perak dohot eme; ua itasalesehon ma utangon.
L : Ua paulak hamu ma tu nasida sadarion haumanasida, porlak anggurnasida, porlak Jetun nasida dohot bagasnasida, ro di bunga ni hepeng, eme, anggur dohot miak, naung tinunggumuna sian nasida.
R : Dung i ninna nasida ma: Olo ma hami paulakkon, jala ndang be tungguonnami sian nasida, bahenonnami ma songon na nidokmi. Dung i hujou ma angka malim, laos hupatolon ma nasida, asa bahenonna hombar tu hata i.
L : Angkup ni hupaspas ma parandoraan ni bajungku huhut hudok: Sai songon i ma paspason ni Debata ganup jolma na so mangkajongjongkon hata on, sian jabuna dohot sian artana, ingkon songon i ibana tarpaspas, jala luangan. Dung i sandok luhutan i mandok: Amen! Jala dipuji nasida Jahowa; halak situan na torop i pe diulahon do hombar tu hata i. Ido Sahatna. Martua ma halak na tumangihon Hata ni Debata jala naumpeopsa!
S : Amen
5. Marende BE. No. 116: 1 Ditompa Ho Do Au
Ditompa Ho do au, sondangi rohangkon. Tung basabasaMi sudena di au on.
Gomgomi pamatanghu, naeng Ho do oloanhu. Sai lehon ma gogongku, lomoM naeng ulaonhu.
Urupi tatap au tutu, Panompa na burju.
6. Tangiang Pangondianon :
7. MARENDE BE. No. 443: 2 Dung Tuhan Jesus
Di Ho ngolungku! Las rohangki jumolo Jesus siluam i.
PangiringonMu, tolongMu i, mangalo dosa nang rohangki.
Tabaritahon holongNa i, didia Tuhan, tudoshon i?
Tuk manumpahi, tarlobi da? Sasada Jesus, pinuji ma.
8. MANDOK MAULIATE TU DEBATA: 25 TAON ULANG TAHUN Parbagason
L : Pujionta ma Jahowa Sian nasa rohanta, pajojoronta ma sude angka halongangan na binahenNa. Huparhatopot hami do ale Tuhan angka denggan ni basaM na hujalo hami ganup ari.
R : Alani i tama do hami mamilangi angka pasupasuM, di naung dilehon Ho di hami haluaon sian tingki tu tingki. Mauliate ma Tuhan di angka pambahenanMu na balga i, lumobi ma dipangiringiringonmu di Keluarga ni dongannami dison Kel. ..... na manghalashon ulang tahun pardongansaripeonnasida na pa-25 taonhon.
K : Alani asi ni rohaM do Tuhan boi hami marhahipason jala manghilalahon angka denggan ni basaM. Di ramoti ho do keluarganami, jala huhilala hami do pandonganionMu sahat ro di sadarion di keluarganami naung gok 25 taon.
R : Ale Tuhan Debata mual ni pasupasu, tu Ho do hami mangido ale Tuhan. Sai lehon ma hahipason, hadumaon, las ni roha tu keluarganami on.
K : Pasupasuma angka ianakhon asa gabe ianakhon sioloi ajar, sijujung goar jala biar mida Ho Tuhan. Pargogoi ma hami songon natoras asa gabe pangalapan poda dohot ajar di sude angka ianakhon nang keluarganami jala na sa ulaonnami tama diadopanMu.
L : Hupangido hami ma i di bagasan serep ni roha marhitehite Anak haholongan ni rohaM, Tuhan Jesus Kristus.
S : Amen
9. Koor:
10. Marende BE. No. 159: 3-4 Martua Dongan Angka Na
Martua na saripe pangajari di anakkonna asa tong burju.
Na so mamparsohotan ganup ari, tumangiangkon angka i tutu.
Tu Tuhan Jesus asa sai Ibana mamasumasu sasudena i.
Huhut dilehon asi ni rohaNa, manogihonsa tu lambungNai.
Martua dongan angka na sajabu, parlas ni roha di bagasan Ho.
O Jesus, na ringkot mamasumasu, angka na holong roha i di Ho.
Martua ma tutu sude nasida, nang di na songgop hasusaan pe.
Ai sai diapul Ho rohanasida, paima ditogu Ho tu jabuMi.
11. TANGIANG SIAN PARJABU
12. Marende BE. No. 714: 4 Tuhan Na Marmahan Hami
Pabotohon ma tu hami siradotannami i.
Tuhan gohi rohanami dohot haholongonMi.
Tuhan Jesus Sipalua, ndang tarasam holongMi.
Tuhan Jesus Sipalua, ndang tarasam holongMi
13. JAMITA / RENUNGAN:
14. Marende BE. No. 724:1,3-4.... Tuhan Baen Ma Ngolungkon
(Papungu Pelean)
Tuhan baen ma ngolungkon, parbadiai ma di Ho. Pangke ma nang tingkingkon,
mamuji pasangap Ho, mamuji pasangap Ho.
Hata nang soarangki, pasangaphon Ho ma i. Dohot pambahenanki,
pararat baritaM i, pararat baritaM i.
Arta hamoraonki, tau pasangap Ho ma i. Roha nang ulaonki,
marbarita na uli, marbarita na uli.
15. Tangiang Ale Amanami – Pasupasu - Amen-Amen-Amen
II. ACARA RAMAH TAMAH (Diatur Tersendiri)
Tidak ada komentar:
Posting Komentar