Psalmen 107: 17-22 Ende Hamauliateon Malua sian Hagogotan

 

Nats	Psalmen 107: 17-22
Topik	Ende Hamauliateon Malua sian Hagogotan

 

I. Patujolo

Turpuk Hata ni Debata manang Psalmen 107 on masuk ma tu horong buku ende hamauliateon di Psalmen. Ndang apala tangkas dipaboa na masa hatiha i, alai ende i dipatupa laho marningot pardalanan ni bangso Israel na parir jala tarsosak di tingki haruar sian Misir. Psalmen 107 on marrumang ende di tingki halongonan, habuangan, hagogotan godang, mangalewati parmaraan di laut dohot hamauliateon marningot asi ni roha ni Debata. Parpsalmen manang panompa ni ende i mangalapati na masa tu bangso Israel jala patuduhon hubunganna tu Tuhan Debata na gok asi ni roha. Turpuk on ndang holan ampit tu sejarah ni bangso Israel alai dohot do tu ngolu ni halak na porsea sisaonari.

II. Hatorangan

Ay. 17-18: Mangihuthon hukum: na sala dapotan uhuman jala na bonar dapotan upa. Songoni do bangso Israel andorang tarbuang, nunga godang manimbil sian Debata jala ido dalanna mamboan nasida tarbuang jala marsitaonon dohot manarita. Di ayat 17 didok: “marsipal angka na oto ala ni dalan pangalaosionnasida i dohot dibahen angka hajahatonnasida.” Jala pangkorhonna tu parngoluan tung mansai bidang. Tarsosak nasida binahen ni pangalahona sandiri pola do digambarhon songon halak na so lakku mangan dohot songon halak na di harbangan ni hamatean jala hagogotan sian ragam ni angka persoalan.

Ay. 19-20: Somalna ditingki targogot jolma, pasti do berupaya laho mangalului pangurupion, alani gabe joujou ma nasida tu Jahowa di hagogotannasida i, jadi dipalua Ibana nasida sian angka hasosahannasida. Na denggan situtu do molo mangalualu tu Jahowa. Di hagogotan na marragam jala ro rongom mamboan hita taringot tu sada pangondian na balga ima Tuhan Debata songon lapatan ni goar ni sada Minggu ima Invocavit: Jouonna ma Ahu, jadi alusanKu ma ibana. Lehonon ni Debata ma alus marhite dalanna na marragam i.

Ay. 20-22: Songon halak na manghatai marsorinsorin, songoni ma hita mamereng angka angka pambahenan ni Debata. Dung sahat pangurupion ni Debata ingkon tapuji ma Jahowa dohot alasan asi ni rohaNa dohot angka na binahenNa i tu jolma manisia jala pasahat hamauliateon mardongan olopolop laho pajojorhon angka na binahen ni Debata. Tung mansai uli sude proses na dipasahat di turpuk on ima tingki targogot dungi diurupi Debata laho mandok mauliate.

 

III. Sipahusorhusoron

1) Di Tingki Targogot. Sude jolma do hea targogot jala marragam do cara mangadopi na pinatupa ni ganup halak. Alai mangihuthon turpukta on diarahon hita tu sada panatapon molo masa hagogotan ima laho mangalualuhon tu Tuhan Debata Jahowa. Ima sada dalan mangurupi hita laho pasaehon angka persoalan na ro. Tontu sahali angka persoalan na adong i ndang pintor mago songon sulap, alai tadapot do sian Tuhan Debata ima pandonganionna marhite hagogoon dohot habisuhon na sian Ibana. Di tingki targogot ndang lari sian Debata manang gabe mangalului ‘alternatif sian haportibion’, alai ingkon lam manjonok ma ai di Ibana do sude hapatean ni ngolu.

2) Pangurupion ni Debata. Bangso Israel di turpuk on ima gombaran ni hajolmaon na gok hagaleon, sitau monang sandiri / keegoisan, hajugulon, panimbilion sian Ibana dohot pardosaon. Alai Tuhan Debata mamereng hita sian balga ni asi ni rohaNa do tarida do i marhite hasesaan ni dosa na nilehonNa. Ndang dibaloshon tu hita hombar tu hasalaanta, alai sai hadengganon do dipatupa tu ngolunta. Ingkon marpos ni roha ma hita dipangurupion ni Debata ala nunga hea masa jala masa do i dingolunta siganup ari jala na naeng torus masa dope ro disalelenglelengna. Ditongos Ibana do HataNa, dipamalum do hita jala dipalua sian ragam ni hasusaan.

3) Dung Malua Sian Hagogotan. Parpsalmen nunga patuduhon proses dohot cara na tingkos marhite na ro angka tontangan / pergumulan di bagasan ngolunta. Molo taingot Debata di tingki targogot hita, ingkon tongtong do mangingot Ibana dung malua sian hagogotan i. Tarsongon ajaran etika ni hajolmaon na wajar laho mandok mauliate tu dongan naung patupahon pangurupion tu hita agia pe hal na metmet. Laho mangarespon angka pambahenan ni Debata naung sahat tu hita i, tapatupa songon na pinangido ni ayat 21-22 on ima laho mamuji Debata, pajojorhon angka na binahenNa, jala pasahathon pelean hamauliateon mardongan olopolop. Asa tarida hasadaonta dohot Debata; hita di bagasan Ibana jala Ibana di bagasan hita marhite na togu haporseaonta di tingki targogot manang dung salpu hagogotan i, ingkon torus rap dohot Debata.