Mateus 8: 5 - 13 Gabe pasupasu marhite panumpahion ni Debata

 

Nats	Mateus 8: 5 - 13
Topik	Gabe pasupasu marhite panumpahion ni Debata

 

I.                   Patujolo

Dipatupa Tuhan Jesus do godang halongangan dalan laho patuduhon huasoNa na sian Tuhan Debata, mangurupi halak naung leleng marsahit dohot angka na asing, sudena i laho manogu halak na so porsea gabe porsea tu Ibana. Di bagasan turpuk on, ro do sahalak soldadu di huta Kapernaum manopot Tuhan Jesus laos mangido asa dipatupa Tuhan Jesus sada tindakan pe na boi mambahen naposona malum sian parsahitonna. Dibege soldadu i, nunga godang dipamalum angka na marsahit dohot patupahon halongangan na marragamragam, sialani i dipangke ibana do partingkian i asa ro tu Tuhan Jesus. Barita nauli do on dipasahat tu angka na dietong dang marhaporseaon alai sasintongna gumogo do haporseaonnasida dohot sipaingot di angka na manganggap marhaporseaon hape ndang hombar tu pandohan ni Tuhan Jesus.

 

II.                Hatorangan

Ay. 5-6: Dibagasan parjumpanganna dohot Tuhan Jesus, adong panghataion di nasida. Ro soldadu i paboahon kondisi ni naposona i na tongon marsahit sarion (sakit lumpuh) di jabuna jala mansai bernit diahap. Tabereng ma soldadu i na gabe sitiruon: dibagasan dirini soldadu i adong panghirimon asa malum parsahiton ni naposona jala di bagasan haporseaon mangelehelek Tuhan Jesus. Adong upaya na marsitutu laho mangido pangurupion ni Tuhan Debata. Nang pe lehonon ni Debata do saluhut na ringkot, alai ingkon tongtong do tapangido asa saut i tu bagasan ngolu.

Ay. 7-9: Dialusi Tuhan Jesus do pangidoanna i jala marsangkap ro tu bagasna laho pamalumhon sahit i. Alai dialusi soldadu i do muse:” Ale Tuhan, na hurang tama do ahu, tung degeonmu jabungku; dok ma hata sisandok, asa hipas naposongki!”. Diadopi ibana do Tuhan Jesus sian hadirionna songon soldadu; ia soldadu mangihut do tu parsuruon ni indukna, ia tongon jabatanna di ginjang boi do patupahon parsuruon tu naposona, alai ia naposo ibana ingkon mangoloi do di aturan ni indukna. Adong haserepon ni roha di ibana ai, dipeakhon do dirina songon naposo di adopan ni Tuhan Jesus, sialani i aha pe pandohan ni Tuhan Jesus na ingkon oloanna do. Tung manang aha pe na pinatupa ni Tuhan Jesus, nunga dihaporseai ibana boi pamalumhon naposona.

Ay. 10-13: Dibereng jala dipuji Tuhan Jesus do ibana: ia soldadu i ima halak na gok haporseaon martimbanghon godang halak di Israel. Laos dipatorang muse torop do annon halak na so dietong parhaporseaon alai gabe tama di adopan ni Debata, sabalikna angka anak ni Harajaon i hian gabe dipabali jala diuhum. Laos diuduti Tuhan Jesus muse panghataionna:” Laho ma ho, jumpang ho ma hombar tu haporseaonmi!” Jadi hipas ma naposona i di na sangombas i. Digohi Tuhan Jesus do pangidoan ni soldadu i ima hamamalum ni sahit ni naposona marhite sandok hata.

 

III.             Sipahusorhusoron

1)      Pasahathon Parsorionna tu Debata. Tung mansai uli do soldadu nangking gabe sitiruon ni angka siihut Tuhan Jesus, dibege ibana do barita taringot tu Tuhan Jesus dohot angka pangulaonNa umbahen tubu haporseaon di bagasan dirina. Haporseaon na diihuthon ni tindakan/ perbuatan marhite na ro ibana tu Tuhan Jesus. Ndang holan pananginangi manang pamerengmereng di halongangan i alai ndang dohot porsea (songon halak Parise), alai porsea do ibana na diuduti dohot parbue ni haporseaonna i ima pangalaho na denggan. Dipasahat ibana do parsorionna tu Debata. Nang pe sahalak soldadu (Perwira), ndang mangasahon hagogoon manang hamaloon portibi na adong di ibana, alai dipaserep do rohana di adopan ni Debata.

2)      Hagogoon ni Haporseaon. Marhite haporseaon tu Debata, gabe parsidohot hita mananda Debata, alai ndada holan i tung godang do panghorhon ni haporseaon. Haporseaon i do manogunogu hita laho mangulahon Hata ni Debata jala haporseaon i boi do tong mandorong hita laho mangulahon angka ulaon na denggan isarana holong, sosial dohot angka rumang ni pangurupion na asing. Tung pe ndang tarbahen songon na ni dok ni Tuhan Jesus; haporseaon na berwujud songon batu ni siarum na boi papindahon dolok, alai margogo do haporseaon na adong di bagasan dirinta. dipasaut Tuhan Debata do angka tangiangta na dipangidohon marhite haporseaon na marsitutu. Songon na masa di bagasan Bibel i, haporseaon i do na pamalumhon.

3)      Pambahenan ni Debata laho patoguhon haporseaon. Angka halongangan na pinatupa ni Tuhan Jesus i martujuan do asa taboto jala tahaporseai Harajaon dohot huaso ni Debata. Nunga taihuthon angka halongangan na pinatupa ni Debata mulai sian na robi, gariada nunga tabereng marhite angka pengalaman ni ngolunta be, sialani i ingkon lam togu ma haporseaon tu Ibana, ala nunga dohot hita manghilalahon angka na pinatupa ni Tuhan Debata.