Psalmen 82: 1-8 Polin Mangihuthon Jesus

 

Nats	Psalmen 82: 1-8
Topik/ Tema/ Judul	Polin Mangihuthon Jesus

1)    Patujolo. Godang do turpuk di bagasan Psalmen na pinatupa ni Raja Daud dohot Salomo, alai asing sian i godang dope angka na patupahon psalmen sian horong ni angka malim, parmusik dohot parende, tarmasuk turpuk sadarion ima si Asap anak ni Berekhya na mangula di zaman ni Raja Daud jala godang do psalmen na binahenna ima psalmen 50, 73-83. Si Asap dohot 4 halak anakhonna dohot donganna na mangalehon diri gabe parmusik dohot parende di bagas joro ni Debata. Mamelehon ngolu na polin marhite hadirion na marragam; talenta, gogo, tingki, dohot na asing na boi tapelehon tu Debata.

2)      Mangalo Na Jat. Sada hal na umbalga na niparungkilhon ni si Asap ima naung mamerengi parngoluan ni halak na jat na berengon tung mansai tabo; ndang mabiar be tu Debata, papeol angka uhum, marlomolomo do nasida mangulahon hagiotna sambing, manindos angka na metmet. Jala on ma na hinagigihon ni Jahowa dohot si Asap. Disoarahon parpsalmen do ia dung jumpang tingkina patupaon ni Debata ma panguhuman lobi sian angka parhuaso na adong di portibi on. Sada tantangan di partingkian saonari on ima penegakan uhum na jotjot mansalai aturan na sintong, pardingkanan, gariada hira na patar patuduhon uhum tajom tu toru, tumpul tu ginjang, dna. Tung pe boi dipalindaklindak portibi on, alai patar do i di adopan ni Debata. Tung pe berengon sonang ianggo angka parjahat i, alai di ari paruhuman tarida ma hapolinon dohot hasintongan. Molo hehe annon Tuhan Debata na gabe panguhum, angka na posi na ma jaloon ni angka parjahat i. Alani i, ndang boi mangiburu tu halak, ia na denggan na pinatupana gabe mandohar do i, ia na jat na pinatupa tarida do i muse di pudian ni ari. Sintong do uhum ni Debata; na marisihon holong, kesempatan dohot uhuman.

Hajongjongan ni Halak Na Porsea. Songon angka anak ni Debata marhitehite Tuhan Jesus Kristus, naeng ma tahangoluhon tondi hasintongan songon na binoan ni Tuhan Jesus mangatasi “hasomalan naung dianggap sintong, hape nunga dao sala”songon halak Parisi dohot Siboto Patik i. (Tbdk. Rom 12: 12) “Sarupa alai ndang dos” boi do gabe istilah laho manggombarhon hadirion ni halak na porsea dohot jolma haportibion. Sarupa di bagasan hataridaan na adong di portibi on (fisik) alai ndang dos di bagasan kualitasna. Lapatanna: unang ma parsidohot hita mangarajumi angka dosa dohot hasalaan gabe sada kewajaran manang hasomalan. Contoh: pandapot na mandok ganup pejabat ingkon KKN asa boi sumuang angka modalna laho nangkok, dohot angka hajahaton na asing na ditolopi alani angka sidalian na sian portibi on na boi pakaburhon Hata ni Debata.