5 Musa 6: 1-9 Mangaradoti Haporseaon tu Tuhan

 

Nats	5 Musa 6: 1-9
Topik	Mangaradoti Haporseaon tu Tuhan

 

I. Patujolo

Turpuk on ( 5 Musa 6: 1-9) ima Tona ni Debata marhite si Musa tu bangso Israel hatiha naeng bongot dope tu tano Kanaan; tano naung nibagabagahon ni Debata na gok susu dohot situak ni loba topet nasida di bariba ni aek Jordan tungkan habinsaran. Di bagasan buku 5 Musa (Ulangan/ Deutronomi) marisi taringot tu hata sipaingot laho mangaradoti Patik ni Debata dohot haporseaon na manongtong tu Debata. Dihatuaonna diulahi si Musa do muse pasahathon angka pangajarion asa ingot jala ndang mose bangso i tu angka Hata ni Debata naung diajarhonna uju di pardalanan manuju tano Kanaan i. Nang pe ndang dohot si Musa bongot tu tano Kanaan alai dipasahat do bohal tu bangso i.

II. Hatorangan

Ay. 1-2: Si Musa martujuan laho mangondolhon hinaringkot ni aturan dohot uhum naung tinonahon ni Jahowa Debata tu nasida dung bongot di tano na dipasahat Debata. Diondolhon do 1) asa marhabiaran tu Jahowa, 2) radot di angka tona ni Debata, 3) dohot manurunhon pangajarion i tu angka sundut na umposo ima tu angka anak dohot pahompu saleleng mangolu. Tona na dipasahat i ima dalan nasida asa manongtong haporseaonnasida tu Debata naung tangkas paluahon dohot mandongani nasida saleleng on. Nunga tung leleng nasida di bagasan pardalanan jala deba nunga marganti angka generasi, sialani i ringkot si Musa laho torus paingothon bangso i.

Ay. 3: Holong ni roha dohot sangkap ni Debata na jumolo tu bangso Israel ima bangso na pinillitNa dohot na pinasupasuNa. Dang tarambatan angka sangkap ni Debata nang pe bangso i tardok na koras roha alai tongtong do diasii jala dipasaut do angka bagabagaNa, dipasupasu angka na mamasumasunasida jala manorui angka na mamurainasida umbahen gabe bangso na so taralo, dilehon do ganjang ni umur dohot angka hasonangan dohot gabe bangso na torop alai disosohon do nasida asa jumolo manangihon patik ni Debata dohot mangharingkoti mangulahon angka tona ni Debata dungi tambahononNa ma angka ondeng na ringkot tu bangso i. Porlu diingot dung haroro ni Tuhan Jesus, ndang be holan bangso Israel na dihaholongi Debata alai sude bangso na porsea tu Ibana marhitehite Tuhan Jesus, sialani i tona na dipasahat si Musa dohot do tu hita saonari asa manongtong haporseaonta gariada sahat tu na manurunhon haporseaon.

Ay. 4-6: di ayat 4 didok Tangihon ma (Syamar) ale Israel, hata i tangihon ma marlapatan lobi sian na mambege, alai sahat tu na mamparrohahon dohot mangulahon. Laos mangondolhon Jahowa (ima goar ni Tuhan i) ibana do Debata manang Tuhan sihaporseaon, jala sasadasa do. Ndang boi debata na asing (ilah, dewa, dna) sisombaonnasida songon na sinomba ni angka bangso parbegu. Angkup ni i, dalan laho padimposhon haporseaonnasida ingkon haholongannasida ma Tuhan Jahowa sian nasa roha, sian nasa ateate dohot sian nasa gogo, lapatanna sian sude parngoluonna/ secara totalitas ingkon biar jala holong roha tu Debata.

Ay. 6-9: Haporseaon tu Debata ingkon diparbuehon di bagasan pangalaho; sialani i ma Hata ni Debata dipataridahon marhite sosososo pangalaho na dipatupa di bagasan ruhutruhut na denggan. Ayat 6-9 laos on do gabe dasor ni angka pangajarion Kristen isarana katekisasi asa 1) taparateatehon Hata ni Debata, 2) pasahathon Hata ni Debata na borhat sian jabu jala di sude situasi jala ndang tading Hata ni Debata manang tu dia pe lao, 3) surat/ gorga Hata i di ganup bagas ni halak na porsea.

 

III. Sipahusorhusoron

1)                  Parhaporseaon na Manongtong. Uju di pardalanan dope bangso Israel tu tano Kanaan nunga diajari nasida taringot tu Hata ni Debata, alai ringkot do na sai mangulahi (mangulangulang) Hata ni Debata asa manongtong haporseaon ni jolma. Di bagasan pardalanan ni ngolu ni jolma na olo gabe lilu, alai di na lilu i, ingkon diboto ma mulak tu hasintongan songon na ni ajarhon ni Tuhan Jahowa. Ngolu di portibi dohot perkembangan zaman na tung mansai dinamis, alai ianggo sisombaon dohot sihaporseaon ingkon manongtong ma sada di bagasan Kristus. Godang do tantangan di bagasan haporseaon isarana: pengaruh lingkungan, pengaruh ni hapariron dohot elaela ni portibi, alai ditogihon turpuk on ma hita asa gabe parhaporseaon na manongtong.

2)                      Mangaradoti Haporseaon. Nunga dibasabasahon Tuhan Jahowa tu hita ragam ni pasupasuNa dohot haluaon marhite Tuhan Jesus Kristus. Sialani i tugas ni halak na porsea dohot naung manjalo pasupasu na sian Debata ima mangaradoti haporseaon, na dimulai sian haporseaon ni dirinta ganup, baru keluarga, huria, masyarakat, dna. Basabasa ni Debata do haporseaon i, alai na boi do dipatudos tu sada bibit ni suansuanan na unggul na di suan, alai molo ndang diradoti suansuanan i gabe marisuang. Ganup halak na porsea ndang boi leas tu haporseaonna, alai ingkon parsidohot do ibana laho mangaradoti haporseaonna sandiri asa manongtong mangolu jala mangerbang haporseaonna i.