BISUK NA SIAN DEBATA

1 RAJARAJA 3: 5-15

BISUK NA SIAN DEBATA

1.      Tarbarita do Raja Salomo songon sahalak Raja na bisuk, di bagasan buku on ndang adong na umbisuk sian ibana sian angka naung salpu i, nang na naeng tubu muse. Raja Salomo godang mambahen angka poda manang ajaran habisuhon nadigurithon di Kitab Poda/ Amsal. Sada habisuhon ni Raja Salomo ima di tingki manimbangi dua halak parompuan na manggulut dakdanak posoposo (3: 16-28), gabe tarsar ma barita habisuhon ni si Salomo, pola do angka Raja sian negeri na asing ro tu ibana laho marsiajar habisuhon songon Ratu Syeba na naeng mamereng langsung habisuhon ni Raja Salomo.

 

2.      Raja Salomo Mangolu di bagasan Haunduhon tu Debata (ay. 5-8) Hadirion ni Salomo ima sahalak na mabiar tu Debata, na mangolu di bagasan hasintongan, hatigoran dohot habonaron ni roha. Dung mulai ibana naeng gabe Raja ni halak Israel laho manggantihon Raja Daud nunga torus ibana mangalehon dirina tu Debata. Di buku Raja-raja, keberhasilan ni salahak Raja ima parsombaonna dohot hasatiaonna tu Tuhan Debata, ala hubunganna na denggan dohot Debata dohot do manontuhon keberhasilan ni sada Raja laho manguluhon Bangso Israel. Alai molo manimbil haporseaon ni halak I, ido mula ni hasesega dohot uhuman sian Debata. Songoni do na dihangoluhon ni Raja Salomo, na manongtong rohana tu Debata, diihuthon Ibana do peribadatan, pasahathon peleanna tu Debata di atas ni angka dolok songon na dipatupa ni Raja Daud, bahkan gabe Raja Salomo do muse na diloas ni Debata laho padirihon Bagas ni Debata. Haunduhon, peribadatan ni Raja Salomo tu Debata marhite na pasahathon saribu pelean situtungon di di dolok Gibeon gabe mambahen lomo ni roha ni Debata, umbahen na diloas ibana mandok pangidoanna na ingkon saut patupaon ni Debata.

 

3.      Mangido Habisuhon sian Debata (Ay. 9) Domu tu tawaran ni Debata tu Raja Salomo tongtong do ibana marserep ni roha mandok pangidoanna, diongkuhon ibana do saluhutna I ala asi ni roha dohot basabasa ni Tuhan Debata sambing do; siala bajar dope ibana, adong dope Putra Mahkota ima si Adonia hape nunga dipabangkit Debata ibana gabe raja singkat ni Raja Daud. Dipingkiri ibana do aha na ringkot laho manguluhon Bangso Israel na bolon jala torop i. Dipangido Raja Salomo do na ummarga jala na rumingkot ima roha na pantas (LAI: hati yang faham, IBRANI Leb Nathan: hati yang mau mengerti). Dipangido ibana asa marbisuk laho manguluhon Bangso Israel, asa diboto manirang na denggan sian na roa. Dipangido Raja Salomo do habisuhon/ hikmat I sandiri sian Debata parmulaan ni parbinotoan. Dung i lomo ma roha ni Jahowa, ala songon i pangidoan ni si Salomo. Habisuhon I do mualna, bonana, manang masinna. Molo marbisuk ibana tontu sian I ma dapotanna angka na ringkot muse. Dilehon Debata ma pangidoan ni Raja Salomo, bahkan lobi sian dilehon dope ganjang ni umur, hamoraon, hamuliaon, kesuksesan dohot kejayaan manguluhon bangso Israel jala ndang adong be halak na marbisuk na tudos tu si Salomo. Pangidoan na arga na pinangido ni Raja Salomo ima asa mamboto mangulahon hatigoran dohot lomo ni roha ni Debata. Jadi tangkas tujuan ni halak na marbisuk, ndada holan hamaloan, alai gabe mamboto angka na naeng sipatupaonna, tarlumobi boi mambahen halomoan ni Debata songon Raja Salomo.

 

Mangido na Rumingkot sian Tuhan Debata (ay. 14-15) Rata-rata pangidoan ni jolma ima hamoraon, hagabeon, hasangapon, hahipason, ganjang ni umur, dohot angka na asing na mardomu tu kebutuhan ni ngolu ni jolma. Alai Raja Salomo patuduhon gabe bonus do diibana I dung dipangido ibana roha na pantas. Dipasahat Tuhan Debata do pasupasuna tu Raja Salomo na serep marroha, na ringgas martangiang, jala mangutamahon Tuhan Debata. Gabe tiruan nian di halak na porsea, asa saut bagabaga ni Debata: molo sai tong marparange di angka dalanNa laho mangaradoti angka patik dohot Hata ni Debata, dungi tumpahan ni Debata Jahowa ma. Songon ni dok ni Mateus 6: 33 “sai jumolo ma lului hamu harajaon ni Debata dung I tambahononNa ma angka ondeng”. Marhite tangiang tapasahat do pangidoanta tu Debata, alai di Maksud/Lapatan ni “Tangiang Ale Amanami” ingkon tapasaut do tongtong lomo ni roha ni Debata. Tutu do ingkon pangidoanta tu Debata ima angka na ringkot di bagasan parngoluanta siganup ari. Alai halak na porsea ingkon tongtong do mangidohon asa saut ma lomo ni roha, sangkap, ulaon ni Debata di bagasan ngoluna. Marhite na mangalehon dirina gabe ulaon na marguna tarlumobi di adopan ni Debata suang songoni tu donganna jolma. AMEN