Hagogoon ni Barita Nauli

 

Nats	Rom 1: 16-17
Topik	Hagogoon ni Barita Nauli

I. Patujolo

Apostel Paulus; naposo ni Debata na pararathon Barita Nauli marhite angka pardalanan langsung tu angka luat suangsongoni dohot marhite surat termasuk dohot na adong di bagasan turpuk on ima surat tu huria Rom (Roma) na digurithon hirahira taon 56 M. Apostel Paulus mangondolhon asi ni roha ni Debata, haporseaon dohot visi misi na gogo laho patandahon Harajaon ni Debata tu angka na so porsea dohot patoguhon haporseaon ni angka naung mananda Tuhan Jesus Kristus. Ditujuhon ibana do barita Nauli tu tu angka luat na metmet dohot bangso na bolon songon Rom ala di Huta i torop angka halak Kristen pangaranto sian halak Jahudi dohot Gorik (Junani) dohot angka na asing.

 

II. Hatorangan

Ay. 16: Di bagasan turpuk on, jempek alai godang laho mangondolhon hagogoon ni barita nauli. Dipaboa do taringot tu ajaran na mendasar dohot praktek marhite panindangion ni haporseaonna na so pola mangetong be di angka hasusaan isarana hailaon dohot haporsuhon alani Kristus. Diongkui ibana do naung jumolo sahat Barita haluaon tu halak Jahudi dung i dohot halak Gorik. Didok apostel i songoni siala Huria Rom ima huria na marragam bangso dohot suku nasida, suang songoni dohot ulaon nang keadaan ekonomi nasida. Diarahon nasida asa ndang be marroha diri sambing, alai gabe mulai ma manghangoluhon haporseaonna tu Tuhan Jesus. Ditogihon apostel Paulus do huria Rom asa mangolu hombar tu ruhut-ruhut ni haKristenon na marpamusatan tu Jesus Kristus. Marhite barita pangulaon ni Jesus dohot hamamateNa di hau na pinarsilang laho manobus halak pardosa asa dapotan haluaon, ala haluaon ndang boi disirang sian karya ni Kristus. Huhut pasahathon barita taringot tu Tuhan Jesus na gabe sada jaminan haheheon tu saluhut na porsea di ari sogot. Barita nauli na gabe hagogoon ni Debata laho paluahon jolma, silehonlehon ni Debata do i laho manogunogu halak pardosa, huhut pauliulihon parsaoran tu Debata.

            Ay. 17: Nunga tangkas barita na uli ima hagogoon na sian Debata jala sada dalan na nilehon ni Debata asa tatanda Debata marhitehite Tuhan Jesus, jala godang do angka nauli pangkorhon ni barita nauli isarana lam taboto ma asi ni roha ni Debata, dalan hatigoranNa jala lam togu ma dohot haporseaonta. Haporseaon ima salah satu kunci laho manjalo dohot mangantusi hatigoran ni Debata, alani do umbahen tung mansai ringkot haporseaon dibagasan ngolu halak na manjangkon haluaon sian Debata. Di ayat 17 on didok “...na sian haporseaon tu haporseaon... (yang bertolak dari iman dan memimpin kepada iman”. Haporseaon do sada ojahan na ringkot mangihut Tuhan Jesus, jala laos haporseaon i do muse manogunogu jolma mangulahon Hata ni Debata. haporseaon na mangolu i jumpang holan dibagasan dohot marhitehite Tuhan Jesus, ndang adong na tuk patupahon haluaon tu dirina sandiri ia so dipintori Debata.

 

III. Sipahusorhusoron

1)                  Mamparhaseang Barita Nauli. Di ginjang nunga dipaboa taringot tu angka hagunaan ni barita Nauli na mambahen jolma gabe mananda Tuhan Jesus dohot angka hagunaan na asing, sialani i ulaon / tugas sijamothononhon ni halak na manjalo barita ima mamparhaseang barita nauli. Nunga jumolo hita ditorangi dohot disirai Hata ni Debata asa boi tongtong hita gabe na niasian ni Debata. Dihirim apostel Paulus asa unang magopo haporseaon ni halak di Rom. Panandaion nasida di Tuhan Jesus ndada holan ‘sekedar ugamo’ alai naeng ma sahat tu na manghangoluhon haporseaonna tu Tuhan Jesus jala asa unang marisuang Hata ni Debata i.

Arga do Haporseaon. Godang do poda sihangoluhononhon di halak Kristen isarana asi ni roha ni Debata, holong tu jolma, panghirimon, haluaon, alai haporseaon ndang boi tarsirang sian angka i siala haporseaon diporluhon ganup tingki di na mangihuthon Tuhan Debata songon irama na porlu di sada ende. Sialani i ma ganup angka na tarjou di bagasan Tuhan Jesus ingkon porsea jala mangulahon haporseaonna. Ganup halak ingkon mangarawat haporseaonna tu Debata, siala marhite na mangarawat haporseaonna i do adong haimbaruon di bagasan ngolu, roha na manongtong di bagasan Tuhan, haporseaon gabe marparbuehon ulaon na denggan, jala haporseaon mambahen hita dipintori Tuhan Jesus.