Psalmen 28: 1-2 Martangiang dohot Tangi tu Debata

 

Nats	Psalmen 28: 1-2
Topik	Martangiang dohot Tangi tu Debata

 

I. Patujolo

Surat Psalmen digoari do tehillim dibagasan bahasa Heber na marlapatan ende manang puji-pujian. Jala surat Psalmen on ima puji-pujian, tangiang na dipapungu, dung i dipamasuk ma tu Bibel. Angka tangiang na di surat psalmen on adong do na bersifat pribadi dohot bersifat nasional. Na bersifat pribadi ima manggombarhon roha ni sasahalak (boi do ala marlasniroha nang songoni habot ni roha), molo na asing manggombarhon haporluon dohot roha ni bangso ni Israel. Psalmen on ima hata ungkapon haporseaon tu Debata ala manjalo pangurupion na sian Tuhan Debata. Isi ni bindu on ima taringot tangiang ni Raja David mangido haluaon tu Debata. Mansai uli do buku on, jumpang hita ma songon dia do ngolu ni parpsalmen ma marsaor dohot Debata di bagasan harosuon.

 

II. Hatorangan

Ay. 1: Turpuk on ima sada tangiang mangido haluaon sian si David na dipatupa gabe ende manang psalmen. Raja David mangatasi parsoalanna marhite na mangalului inganan na tingkos gabe pangalualuan ima Tuhan Debata Jahowa tarida ma i sian di na nidokna “Tu Ho do ahu joujou ale Jahowa, partanobatoanhu”. Pandohan on pabotohon songon dia do hasusaan na diadopi parpsalmen di ngoluna dohot semangat na manongtong dipasahat tu Debata marhitehite tangiangna. Sude partangiang tontu manghirim do di alus ni angka tangiang tarmasuk si David di na mandok: “unang sai sip Ho manundali ahu, asa unang ahu molo tung laos sip Ho manundali ahu, doshon halak na manuruk tanoman”. Hata i marlapatan molo so ditangihon Tuhan Jahowa, ndang adong agia aha hita di adopan ni Debata. Parpsalmen mangokui hagogoon ni Debata ia ngoluna targantung tu Debata. Taruji do muse haporseaon di tingki paimahon alus ni tangiang i. Somalna adong dua respon/sikap ni jolma taringot tu tangiang; na sada gabe lam mandele molo so gira saut pangidoanna, alai na paduahon gabe lam marsigogo mangido tu Debata.

                Ay. 2: Parpsalmen mambuat sikap na paduahon ima lam marsitutu martangiang tu Debata. Adong manang piga tanda parsitutuon ni raja David ima martangiang, marsomba situtu, jala torus manoarahon: “sai tangihon ma soara ni sombasombangku, molo mangangguhi ahu tu Ho, molo hupaherbang tanganhu tu bilut ni habadiaonMu”. Dipasahat ibana dirina tu Debata di bagasan roha na bulus, ndang holan satonga roha manang sekedar. Di bagasan tangiang ni parpsalmen huhut do ibana manangihon Tuhan Debata ima mangalului jala mangulahon lomo ni roha ni Tuhan Debata jala adong perenungan ni parpsalmen taringot tu dirina dohot hubunganna tu Tuhan Debata.

 

III. Sipahusorhusoron

1) Martangiang. Tahaporseai do margogo do tangiang, nang pe sipata tangiang ndang masuk tu logika/ pikiranta martimbangkon kondisi na adong. Parpsalmen nunga mangalehon sitiruon ima habuluson ni rohana marpanghirimon sian Tuhan Debata. Martangiang ndada holan ulaon na liturgis alai dohot do panindangion ni haporseaon. Porsea ma hita di angka tangiangta, ai alusan ni Tuhan Debata do nang tangiang i. Tabandinghon dohot halak na martangiang di hamalumon ni sahit, alai ndang porsea ibana gabe malum siala sai maralo tu logika pingkiranna. Unang ma nian tangiang i diambat haraguraguon ni haporseaonna taringot tu parmasa ni pangidoan di bagasan tangiang i. Songon goar ni sada minggu ima Rogate na marlapatan martangiang manosohon hita asa manongtong martangiang. Alai ingkon tapeop do tangiang ndang holan bagian pasahathon pangidoan tu Debata, alai boha do hita manangihon hataNa. Molo tung pe sahat tu saonari sadeba mamangke hata tamiang na marlapatan mamelehon / mempersembahkan alai sian sandok rohana ma mamelehon diri tu Tuhan Debata ndang be tu hasipelebeguon (J. Warneck, Kamus Batak Toba-Indonesia, 1905).

2) Manongtong marhaporseaon. Marhite psalmen on, ima songon pengalaman ni Raja David taringot panghilalanna di tingki merasa ibana ditinggalhon Debata. Di sada partingkian manghilala ibana sai hera dang ditangihon Debata tangiangna jala sai holan na sip do Debata. Tung borat situtu do hape molo dang ditangihon jolma soaranta na joujou, lam ma molo Debata na so manangihon. Adong do Sebagian jolma mandok dang ringkot be na martangiang dohot disertai alasan dang dialusi Debata tangiangna. On ma sada pandangan na mambahen jolma gabe mago di angka panghirimon, gabe dang mamereng be di angka na naeng masa tu joloan ni ari. Alai ianggo parpsalmen tung tangkas do pangantusionna paboa haluaon i sian Debata do harorona. Didok do asa martangiang dibagasan roha na mandok mauliate jala mamuji pasangaphon Debata. Ala holan Debata do boi dipangasahon di ngolu ni halak na porsea. Diajari do hita marhite psalmen on asa unang mansohot hita na martangiang jala manongtong marhaporseaon. Sada kepastian do paboa ditangihon Debata do tangiangta lumobi ma ala nunga joujou hita tu Ibana.

Psalmen (Mazmur) 22: 26-32 Margogo do Haporseaon

 

Nats	Psalmen (Mazmur) 22: 26-32
Topik	Margogo do Haporseaon

 

I. Patujolo

Marragam do bentuk sastra ni buku Psalmen; adong marrumanghon ende, tangiang, syair dohot na asing alai na tangkas psalmen timbul sian ungkap ni roha ni parpsalmen laho mamuji Tuhan Debata na borhat sian pengalaman naung dihilala parpsalmen i. Songon si David na mangandunghon parniahapanna, laos diuduti muse dohot ende pujipujian siala dipatimbul Tuhan Debata muse ibana. Pengalaman haporseaon ni si David gabe parsiajaran haporseaon dohot tu hita jala songon i do tong pengalaman haporseaonta na boi gabe parsiajaran haporseaon tu halak na asing. Sude pardalanan ni ngolu boi do pataridahon adong huaso ni Debata na mangula di bagasan ni na masa i.

 

II. Hatorangan

Ay. 26-27: Parpsalmen naung manghilalahon denggan basa ni Debata laos diuduti ma muse dohot manghatindanghon Debata do na paluahon Ibana jala Debata do na patimbulhon ibana. Tuhan Debata na tama sipujion alani asi ni rohaNa. Haporseaon ni parpsalmen tu Tuhan mambahen ibana marpanghirimon tu Debata jala laos ditangihon do anggukanggukna. Lam togu ma tong haporseaonna di tingki ro pangapulion sian Debata na mambahen parpsalmen ungkap roha jala marlas ni roha di na laho pasahathon angka bagabagana tu Debata. Haporseaon na gok tu Debata mambahen saut halongangan tu bagasan ngoluna. Ido barita las ni roha tu angka na porsea; diparrohahon Tuhan Debata do angka na porsea di Ibana.

Ay. 28-30: Panindangion haporseaon mampangkorhon tu dua arah ima: pangokuan haporseaonta tu Debata taringot tu habalgaonNa dohot asi ni rohaNa dohot pangokuan haporseaonta na marpangkorhon tu portibi on. Haporseaon ni sasahalak boi do gabe ditiru halak na asing jala mangararat ma haporseaon. Parpsalmen paposhon roha ni angka na porsea tu Debata, ia halak na porsea tu Debata ndang gabe kecewa alai gabe marlas ni roha isarana ndang tagamon hurangan gariada butongan; marlas ni roha ma angka na usosuo di Debata jala na mamujimuji Ibana. Hagogoon ni halak na porsea ima haporseaonta na mambahen taruli angka halak na asing, suang songoni nang haporseaon ni angka halak na asing mambahen hita taruli di angka asi ni roha ni Debata.

 

 

Ay. 31- 32: Marhite ende pujipujian, panindangion haporseaon gabe ditanda portibi on ma Tuhan Debata. Angka halak sipelebegu, angka na so mananda Tuhan gabe dohot mamuji Tuhan Debata. Ndang adong ulaon ni Debata na marisuang nang pe sipata ndang pola balga berengon.

 

III. Sipahusorhusoron

1) Panindangion ni Haporseaon. Ganup angka na marugamo nunga masuk tu horong ni na marhaporseaon. Alai haporseaon na dimaksud ingkon tangkas jala sangkan ma nian haporseaonna tu Tuhan Debata Jahowa. Haporseaon na adong di ganup jolma unang ma sian na terpaksa manang gabe ikut-ikutan, alai borhat sian hasadaron diri mardomu tu parsaoranna dohot Tuhan Debata. Sialani i ma haporseaonta na adong dirinta (secara pribadi) manang haporseaon ni sandok halak Kristen (secara umum) ingkon dipaheba, dihirpasi, dipauli, dipahembang, dihangoluhon dohot angka istilah na asing. Songon parpsalmen na torus manungguli haporseaonna na borhat sian parngoluonna.

2) Margogo do Haporseaon. Raja David patuduhon jala paposhon roha ia margogo do haporseaon i. Di tingki ro parungkilon i, dipasahat do tu Tuhan Debata jala dialusi Tuhan Debata do tangiangna. Porsea ma hita di angka tangiangta, ai alusan ni Tuhan Debata do nang tangiang i. Tabandinghon dohot halak na martangiang di hamalumon ni sahit, alai ndang porsea ibana gabe malum siala sai maralo tu logika pingkiranna. Unang ma nian tangiang i diambat haraguraguon ni haporseaonna taringot tu parmasa ni pangidoan di bagasan tangiang i.

3) Puji ma Tuhan Debata. Tarjou do sude jolma laho mamuji pasangaphon Debata, tarlumobi ma diangka naung manghilalahon denggan basa dohot asi ni roha ni Debata. Tapuji ma ibana marhite tangiang, ende pujipujian, panindangon haporseaon, dohot secara khusus muse marhite ngolunta na marragam (profesi, kategorial, tohonan, dna). Lam tabereng, tarimangi jala tahatindanghon ma angka denggan ni basaNa. Marhite pamujionta tu Debata anggiat lam parsidohot ma halak na asing gabe mamuji Debata. Lam marsangap ma Tuhan Debata marhite na girgir hita manogihon angka keluarga, sisolhot, donganta na holang sian Tuhan Debata asa rap hita mamuji goarNa.