22 Juni 2015

JANGHON MA HABISUHON SIAN DEBATA

1 Rajaraja 5: 9-14

JANGHON MA HABISUHON SIAN DEBATA

1.         Di bulan na salpu topet 1 Rajaraja 3: 5-15 nunga dihatai songon dia do Raja Salomo mandapot habisuhon sian Tuhan Debata. Saonari, di bagasan turpuk on 1 Rajaraja 5: 9-14 Tarbarita do Raja Salomo songon sahalak Raja na bisuk, jala mangihuthon buku on ndang adong na umbisuk sian ibana sian angka naung salpu i, nang na naeng tubu muse. Raja Salomo godang mambahen angka poda manang ajaran habisuhon nadigurithon di Kitab Poda/ Amsal. Raja Salomo godang mambahen angka ende pujipujian na digurithon di Psalmen/ Mazmur. Sada habisuhon ni Raja Salomo ima di tingki manimbangi dua halak parompuan na manggulut dakdanak posoposo (3: 16-28), na asing muse songon dia ibana patupahon kerjasama dohot Raja Tirus ima Raja Hiram di kerjasama nasida taringot tu hau ares sian Libanon laho padirihon Bagas Joro ni Debata. Gabe tarsar ma barita habisuhon ni si Salomo, pola do angka Raja sian negeri na asing ro tu ibana laho marsiajar habisuhon songon Ratu Syeba na naeng mamereng langsung habisuhon ni Raja Salomo.

 

2.         Manjanghon Habisuhon sian Debata (Ay. 9-11) Sada basabasa ni Debata na tung mansai arga ima Habisuhon. Dipangido Raja Salomo do na ummarga jala na rumingkot ima roha na pantas (LAI: hati yang faham, IBRANI Leb Nathan: hati yang mau mengerti). Dipangido ibana asa marbisuk laho manguluhon Bangso Israel, asa diboto manirang na denggan sian na roa. Laos dipasahat Tuhan Debata ma tutu songon napinangidona i “habisuhon dohot roha panimbangon mansai godang dohot parbinotoan godang, tudoshon horsik na di topi ni laut godangna”. Gabe sada hasurungan ni Raja Salomo sian angka halak Misir dohot na asing na dibandinghon si Etan, halak Esrahi dohot si Heman dohot si Kalkol, dohot si Darda, angka anak ni si Mahol, gabe sar baritana tu saluhut bangso parbegu humaliang (ay. 11), ala mual ni hapistaran ni si Salomo ima Tuhan Debata. Godang do tutu na gabe sumber ni parbinotoan (ilmu, pengetahuan) di portibi on, alai habisuhon ni Raja Salomo marharoroan sian Tuhan Debata, ido umbahen gabe ndang adong na boi manandingi habisuhon ni ibana.

3.         Mamangke Habisuhon laho Pasangap Debata (Ay. 12-13). Kebijakan-kebijakan na pinatupa ni si Salomo ima laho pasonanghon Tuhan Debata marhite na naeng pajangjonghon Bagas Joro, ujungna gabe dapotan pasupasu ibana lobi sian na pinangidona. Parasingan ni Raja Salomo sian angka na asing ima ngolu na marpusat tu Tuhan Debata, gabe halomoan ni Tuhan I ma ibana. Taruli ibana di hokma habisuhon, habisuhon na sian ilahi dohot tebuna hapistaran di bagasan utok. Di ayat 12 pola do didok: dihatahon ibana tolu ribu umpama, ia torop ni endena saribu lima. Godang na I angka karya sastra na pinatupa ni Raja Salomo, na terinspirasi sian angka benda manang alam nabinereng ni ibana baik pahanpahanan, dna. Alai ganup halak na porsea I pe ingkon berengonna do godang basabasa ni Tuhan Debata marhite: talenta, hamaloan, gogo, arta sinadongan, partingkian na boi tapangke laho mandok mauliate dohot pasangaphon Tuhan Debata di bagasan ngolunta. Ganup halak naeng mamereng panjouon ni Debata marhite hadirionna ganup: Alai marga na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i. (1 Petrus 2: 9).

4.         Dampak ni Parbinotoan (Ay. 14). Marhite habisuhon ni Raja Salomo, gabe tarbarita ma goarna Jadi marroan ma halak sian saluhut bangso naeng umbege habisuhon ni si Salomo, sian saluhut angka raja di tano on, angka na umbege barita ni habisukonna. Ido umbahen tung mansai arga tutu habisuhon I, di buku Poda na sai torus mangondolhon asa mangalului parbinotoan. Boi dapot angka parbinotoan sian angka parsingkolaan, poda/ nasehat ni angka na tuatua manang na berpengalaman, marhite angka pangajari dohot buku, dohot harapan asa dipangke ma hapistaran dohot habisuhon I gabe halomoan ni Debata dohot fungsi na denggan. Unang lam tamba ni angka perkembangan zaman gabe muncul angka na so porsea adong Tuhan I (Ateis), lam godang angka parbinotoan lam godang angka hajahaton, penipuan, haributon di portibi on. Alai marsiajar sian Raja Salomo patuduhon lam tamba hapistaran, ingkon lam jonok do tu Tuhan Debata, patupahon damai sejahtera, mamboan dampak positif gabe parsiajaran ni angka raja na asing. AMEN

16 April 2015

Mengapa Cetusan Pencerahan?




Cetusan pencerahan terinspirasi dari kata pencerahan. Sedangkan saya tertarik dengan kata yang mengandung makna filosofis yaitu Aufklarung adalah kata Jerman yang berpadanan dengan kata Inggris Enlightenment yang berarti Pencerahan dalam Bahasa Indonesia, dan dalam bahasa Batak di sebut Panorangion. Dengan maksud kiranya dapat memberikan secercah cahaya dalam kegelapan, sebutir pencerahan dalam kehidupan.

09 April 2015

Huaso ni Debata na Pangoluhon

1 Rajaraja 17: 17-24

Huaso ni Debata na Pangoluhon

Patujolo

Elia ima sahalak panurirang sian Tisbi, daerah Gilead. Godang do tarsurat taringot tu angka halongangan na pinatupa ni Debata marhite si Elia. Ditangihon Debata Jahowa do tangiangna songon na paingothon Raja Ahab na manomba baal didok si Elia do na so jadi ro udan, jala masa do i. Na mangihut, Disuru Debata do ibana borhat tu huta Sarpat laho manopot sahalak na mabalu. Jala masa do tong halongangan di tingki si Elia mangido sagusagu (roti), dialusi na mabalu i ma holan itak sampohul na ma tinggal jala ipe di ibana dohot anakna na ma i, alai marhite si Elia dilehon Jahowa do marlopit ganda muse, gabe ndang olo suda itak na di bagasan hudon dohot miak di bagasan guriguri.

Hatorangan

1.                  Pengalaman laho mananda huaso ni Tuhan Debata. Pardalanan ni ngolu gabe partingkian do i laho mananda jala mamuji Tuhan Debata songon pengalaman ni si Elia na rade pasahathon angka tona ni Debata, rade di angka konsekuensina (pangaleleon ni Raja Ahab) suang songoni di angka haulion ni panurirang ni Debata na dipasingkop Tuhan Debata do saluhut na ringkot na mandok donganan ni Tuhan Debata do ibana manang tudia pe mangalangka. Ai disarihon Debata do ibana marhite sahalak na mabalu di Sarpat. Sabalikna masa do parsahiton tu anak ni parompuan i pola do tos hosana. Jala boi do sada pergumulan ni parompuan i, dijangkon ibana do halak na sinuru ni Debata, alai masa pergumulan na dokdok tu ibana. Tarsongon di ayat 2 pola do didok tu si Elia: “Aha parsaoranku tu ho, ale halak ni Debata? Rupa ro do ho tu ahu laho pasingothon dosangku dohot mambunu anakki?”. Ingkon tahasabamhon do rohanta laho mangantusi sangkap ni Debata, ia pardalanan ni ngolu na tabo dohot na susa dipangke do laho patorashon haporseaonta.

2.      Ndang adong na so tarpatupa Debata

Dipasahat parompuan i do parsorionna tu si Elia, suangsongoni nang si Elia pasahathon tu Debata. Sintong do tindakannasida, joujou tu Debata Jahowa ndada pintor panik manang mangalualu tu haportibion on. Pasahat diri tu Debata jala mangido asi ni rohaNa, molo nunga pasahat diri tu Jahowa, tung aha pe na masa gabe adong pos ni roha. Haporseaon dohot panghirimon dihamamalum ni sahit gabe sada dalan laho mangobati sahit i, huhut porsea tu tangiang pangidoan tu Debata ditamba dohot angka upaya laho malum sian parsahiton. Tahaporseai do ndang adong na so tarpatupa Debata, alai ingkon tarjalo hita do ingkon sangkap ni Debata do na saut. Songon Tuhan Jesus na pangoluhon si Lazarus, tarsurat do si Elia na pangoluhon sahalak dakdanak naung mate. Laos jotjot do dipangke panurirang Elia sian padan na robi laho manggombarhon Tuhan Jesus di padan na imbaru.

3.      Gabe Porsea. Dung mulak mangolu anak ni parompuan i, gabe timbul ma pangokuan diibana: “Nuaeng pe asa huboto halak ni Debata do ho, jala hasintongan do hata ni Jahowa na ruar sian pamanganmu”. Na porsea do hita tu Debata marhite Tuhan Jesus Kristus, ala nunga ditaluhon Ibana hamatean, jala haporseaonta ipe ndada songon si Thomas na ingkon memereng bukti manang songon halak Parisi na ingkon mangido tanda, alai tahatindangkon do pengalaman-pengalaman rohani ni parngoluonta gabe patoguhon haporseaonta. Ra adong be do pengalaman ni ngolunta na gabe bahan panindangion di huaso ni Debata. Ngolu ni halak na porsea laos ido gabe panindangionna di pambahenan ni Debata.

Amen

01 April 2015

Haporseaon Na Paluahon

Epistel Minggu

09 Oktober 2022

Nats

2 Rajaraja 5: 1-14

Topik/ Tema/ Judul

Haporseaon Na Paluahon

 

1)      Hatorangan ni turpuk Buku Rajaraja marisi taringot tu angka raja, dibagasan turpuk on dipaboa adong sahalak partogi ni parangan (panglima) ni raja Ram (Aram) na margoar  si Naeman, tarbarita do ibana sahalak pahlawan ni harajaon Ram, halomoan ni raja do ibana ala jotjot mamboan hamonangan, alai marsahit puruon (kusta) do ibana. Parmulaan ni hamamalumna sian puruon i, ditingki sahalak pangurupi ni pardihutana ima dakdanak boru sian Israel na ditaban. Didok dakdanak boru i do: “Aut ni di adopan ni panurirang na di Samaria tuanki, sai na paluaonna do ibana sian puruna i”. Dung i borhat ma si Naeman permisi tu rajana, jala satolop do raja i huhut manongos surat tu raja Israel asa pamalumomna sahit puru ni si Naeman. Dung i borhat ma si Naeman huhut mamboan sampulu talenta perak dohot onom ribu sekkel sere dohot sampulu salinan pangkean na marhadohoan.

Dung dijaha raja sian Israel surat i, diribahi ma paheanna huhut mandok hata ia ibana ndang Debata na boi pamatehon dohot pangoluhon umbahen na ingkon suruon ni raja Ram ibana pamalumhon si Naeman. Dibege si Elisa do i, jala didok asa ro si Naeman manopot ibana. Disuru si Elisa ma suruanna (si Gehazi) mandok tu si Naeman asa maridi pitu hali di bagasan batang aek Jordan, asa sumuang sibukna jala ias. Dimulana marungutungut do ibana didok ibana adong do sunge na dumenggan songon sunge Abana dohot Parpar, angka na di Damaskus boasa pola ingkon tu sunge Jordan. Tuani do tong dipapos angka naposona i rohana asa diulahon ma songon na ni dok ni panurirang Elisa i. dunghon diulahon ibana songon na nidok ni panurirang i gabe malum ma tutu.

2)    Patuduhon Huaso ni Debata. Maksud ni turpuk on laho patuduhon huasa ni Debata na tung mansai balga jala ndang tarbatas. Sian angka halak na berperan di bagasan turpuk on; marhite dakdanak boru Israel na ditaban nakking naeng pabotohonon ni ibana do adong do panurirang nasida, ima naposo ni Debata na gabe parhitean ni hamalumon. Sahalak na tartaban do ibana, alai tongtong do rade rohana laho mambaritahon huaso ni Debata na dihaporseai ibana. Laos gabe panghirimon na imbaru do i tu halak na dirajumi lea, boi do patupahon angka hal na denggan muse. Huaso ni Debata na masa marhite angka peristiwa na balga dohot marhite angka pardalanan ni ngolu. Dipatuduhon Debata do asi ni rohana ndada holan tu bangso Israel na pinillitNa i alai dohot do tu sude bangso, houm, jala manang ise pe na porsea.

3)    Dipamalum sian puru. Masa do halongangan ia dung diulahon si Naeman na ni dok ni panurirang ima na maridi pitu hali di sunge Jordan. Dimulana sogo do rohana ala ndang songon na piningkiran ni ibana, ai dirimpu hian ro si Elisa manjama ibana huhut manjou goar ni Jahowa, Debatana, dihirim ibana songon peristiwa na luar biasa / balga, hape holan maridi tu aek Jordan do disuru, huhut marungut adong dope sunge na umuli martimbanghon sunge Jordan ala ndang diboto ibana ia Debata boi patupahon na masa nang marhite ragam dalan termasuk dalan na so tarpingkiran ni jolma.

4)    Haporseaon Na Pamalumhon. Godang do angka halongangan na tarsurat di bagasan Bibel na mardomu tu hamalumon ni sahit. Alai boi masa hamalumon ni sahitnasida ala adong haporseaon dohot pangoloion. Gabe lam tangkas ma huaso ni Debata masa di angka di angka na manghirim dipasupasuna tarlumobi tu angka na porsea i. Haporseaon i mangarahon hita asa pasahat diri tu Debata, dung i mangula ma huaso ni Debata di bagasan dirinta. Dimulana borat do roha ni si Naeman, alai diulahon ibana hata i ala naeng malum ibana. Dibahen Debata do dalan laho pamalumhon marhite marragam cara manang media laho paboahon tuk do tangan ni Debata laho pamalumhon.