Partangiangan Syukuran Ulang Tahun-Bahasa Batak

 

Acara Syukuran Ulang Tahun

Di Bagas ni Kel. xxx

 

01. Tangiang Na Hohom

 

02. Marende BE No. 111: 1-2 PATIMBUL BE MA SANGAP

Patimbul be ma sangap ni Jahowa Debatanta.

Dok ma mauliate i tu Debata, Amanta.

Ai pardangolan i sude, nang saluhut na jorbut pe dialo Debatanta.

Tongtong sombaonnami Ho mamuji salelengna,

Dibaen na digomgomi Ho, HuriaMu sudena.

Na so tardodo gogoM i, sai ingkon saut do rohaM i; on pe martua hami.

 

03. VOTUM – INTROITUS – TANGIANG:

(L=Liturgis, H=Huria, K=Keluarga)

L  :  Marhitehite Goar ni Debata Ama, dohot anakNa Tuhan Jesus Kristus dohot Tondi Parbadia, na manompa langit dohot tano on. Amen. Huida Tuhan i hundul di atas habangsa na timbo jala na marmulia, jala angka rambu ni paheanNa manggohi bagas joro.

H  :  Jongjong di atas surusuran Serapim, jala masijouan ma nasida songon on:

L  :  Na badia, na badia, na badia do Jahowa Sebaot, gok hamuliaonNa liat portibi on.

Martangiang ma hita: Ale Debata Ama, Anak dohot Tondi Parbadia! Na mandok mauliate ma hami tu Ho, ala ditompa, dipalua jala diparbadiai Ho hami hinorhon ni asi dohot holong ni rohaM na godang i.

H  :  Sai ramoti ma hami di bagasan parmaraan dohot pangunjunan, apuli hami uju marsak,

L  :  pahehe hami uju tinggang jala togutogu hami di hasusuda ni bohalnami tu harajaonMu na di banua ginjang i, asa disi pujionnami Ho marhitehite roha dohot hata na imbaru. Amen.

 

04.       MANJAHA TURPUK EPISTEL:

L      : Tajaha ma turpuk Epistel di partangiangan on, i ma na tarsurat di 1 Musa 1: 1-2, 26-28,

Di mula ni mulana ditompa Debata langit dohot tano on.

H     : Dung i tarulang ma tano i gabe halongonan jala holom di atas lung i, dung i mangareapreap ma Tondi ni Debata di atas ni angka aek.

L      : Dung i mangkuling muse ma Debata: Tole ma, itatompa ma jolma, tumiru rupanta, tudos tu pangalahonta, asa dirajai dengke angka na di laut, dohot pidong angka na martongatonga langit, dohot angka dorbia, ro di sandok tano on nang sude gulokgulok, angka na manjirir di atas tano on.

H     : Jadi ditompa Debata ma jolma i tumiru rupana, rupana ditiruanhon Debata laho manompa ibana, baoa dohot boruboru nasida ditompa.

L      : Dung i dipasupasu Debata ma nasida, ninna Debata ma tu nasida: Marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on. Amen

 

05. Marende BE No. 113 : 2-3 DEBATA SITOLUSADA

Sai ingani ma rohangku, sai parbadiai ma au,

Asa tong tutu hatangku, unang be margabus au.

Sasude na roa pe, tanggal sian au muse

Ho dipuji, o Tuhanku, hata dohot pambaenanku.

Tatap ma sude donganku, nasa bangso Batak i

Saluhutna sisolhothu nang na so tinanda i.

Taiti ma sudena i tu hataM na denggan i.

Asa dohot i malua sian begu dohot dosa.

 

06. Jamita/ Renungan :

 

07. Marende BE. No. 697 : 1 MOLO HO DO HUIHUTHON

Molo Ho do huihuthon dame sonang rohangki,

sai horas jala martua nasa na hinophopMi.

Ho tongtong ihuthononku, Jesus na palua au.

Ho sambing do oloanku ala nii martua au.

 

08. Tangiang Sian Sahalak Na Ro

 

09. Marende BE. No. 115: 1-2 TUHAN DEBATA

Tuhan Debata, sai ramoti ma,

daging dohot tondinami, i do pangidoannami.

Sai pahipas be hami on sude.

Sai parbadia i, sai tongtong rajai,

ale Tondi Parbadia, Rohanami asa ria,

mangoloi hataM, hombar to rohaM!.

 

10. Liturgi Mandok Mauliate

L      : Ale Jahowa sigomgom hami, mansai sangap do goarMu di liat portibi on, dipatimbul Ho do hamuliaonMu ro di atas ni angka langit.

H     : Gari sian pamangan ni angka dakdanak dohot posoposo dijadihon Ho do paranganMu, ala ni angka na mangalo Ho, asa paonjaphon musu dohot sitahi sudolsudol.

L      : Tama ingotonta jala hatindanghononta angka denggan ni basaNa.

H     : Tung asi ni rohaNa do boi hita marhahipason, jala martambatamba do angka pasupasuNa.

K     : Hupanghilalahon hami do dilehon Tuhan ragam ni angka pasupasuNa tarlumobi di bagasan tingki on dilehon Tuhanta do ganjang ni umur tu xxxxxx.

L      : Denggan situtu do mamuji Jahowa huhut mandok mauliate di bagasan las ni roha.

H     : Mauliate ma di Tuhanta, sai lam martamba ma nang angka asi ni rohaNa.

L      : Mauliate ma Tuhan di angka pasupasuMi, sai gohi ma las ni rohanami tu joloan on, na hupangido hami marhitehite Tuhan Jesus Kristus. Amen

 

11. Marende BE. No. 114 : 1 … ALE JAHOWA DEBATA

(PASAHATHON PELEAN)

Ale Jahowa Debata! Sai tatap hami on

Ai masiboan dosana be do hami tu joloM.

Asi rohaM di hami be, sai sesa dosa i sude,

Marhite Jesus AnakMi, na mate di hau silang i,

Di Golgata, di dolok Golgata.

O Jesus, haholongan i sai tatap hami on!

Ho pangondingannami i, ondingi hami on.

Sai unang mago hami be, ai na tinobusMi sude.

Taluhon ma sibolis i, ai na jorbut parulan ni,

Pangolu be ma hami on sude.

===Musik===

Ho, Tondi Parbadia i! Sai tatap hami on!

Lopokkon haholongonMi tu rohanami on!

Pasada rohanami be, patiur tondinami pe

Lao mangihuthon dasdasMi, manghasiholi sondang ni.

Parholong i, pardenggan basa i.

 

12. Tangiang Pelean - Tangiang Ale Amanami - Pasupasu - Amen

 

Psalmen 72: 1-11 Raja Siboan Dame

 

Nats	Psalmen 72: 1-11
Topik	Raja Siboan Dame

 

I. Patujolo

Buku Psalmen i ma sada buku na mansai arga di tradisi dohot Pamujion ni halak Israel (1 Kro. 15: 16-22; Psalm. 149:1—150: 6), mansai jotjot do buku Psalmen on, dipangke gabe tuntunan manang ojahan jala di angka ulaon parugamoon na dipangke halak israel. Psalmen on ima nasinurat ni Raja Salomo, sada sian 73 psalmen nabinahenna. Psalmen 72 on, i ma tangiang taringot tu sahalak raja na hinalomohon ni angka na ginonggomanna di bagasan panghirimon asa gabe raja siboan hadameon di sude ngolu ni na ginonggamanna. Ala ni do molo tabereng ia judul ni buku Psalmen 72 on i ma Raja Hadameon. Tangiang on marharoroan sian Raja Salomo dung dipabangkit ibana gabe raja dung salpu harajaon ni amongna si Daud (1 Raja 1: 30). Salomo.

 

II. Hatorangan

Ay. 1-4: Tangiang pangidoan ni parpsalmen on asa dilehon Jahowa angka na ringkot di sahalak raja, sipatupa uhum na tigor (ay. 1) asa gabe maruli parlinggoman ni uhum angka na dangol  (ay. 2),  asa marparbuehon hadameon  (ay. 3) dohot asa tingkos uhum tu na dangol jala ropuhanna do sibahen gogo na manegai uhum (ay. 4). Namarlapatan do on sahalak raja na mangalehon roha laho padimundimunhon angka na ginonggomanna tarlumobi ma i sian horong na metmet, na pogos na mungkin hatiha i dang godang mandapot perhatian baliksa manghilalahon penindasan sian angka horong panggonggomi dohot na mora. Marhitehite hasintongan patingkosonna uhum tu angka na dangol di tano on. Jadi hadameon ma upa ni hatigoran, jala pangkorhon ni hatigoran hademakon. Sandok naeng ma nian sahalak raja ingkon na tau mangaradoti uhum dohot hatigoran ni Jahowa. Asa marhite na songon i jumpang ma angka na manumpak tu hadameon dohot las ni roha.

Ay. 5-8: Dungi diuduti ma muse pasahathon tangiang pangidoan tu Debata taringot tu hadirion nanirajaanna. Molo siradoti uhum ni jahowa raja i, gabe martumbur na mamboan hadameon tu nahumaliang Kehadiran ni raja dohot angka haputusan manang kebijakan na mansai denggan na manghorhon kesejukan dohot kedamaian na boi patubuhon manang pahinsatton parngoluon si ganup ari na boi dipanghilalahon ganup halak. Alai ndada holan manguluhon bangso I tu hadumaon alai na utama mamboan bangso I asa terarah tu Debata.

Ay. 9-11: Raja na mangaradoti uhum dohot hatigoran ni Debata, dang holan tarbarita di na humaliang na ni rajaanna alai sahat ro di luat na asing. On ma na masa, dung i disuru raja Hiram, sian Tirus (Tarsis) ma angka naposona manopot si Salomo, ala naung binegena naung miniahan ibana bahen raja singkat ni amana. Jala di tongos hau Ares dohot hau sampinur laho pajongjonghon Bagas Joro ni Jahowa. Sahat do tong baritana tu bangso Seba dohot Etiopia. Bangso parbegu gabe mananda Debata siala habisuhon ni raja i.

 

III. Sipahusorhusoron

1) Mangido Paniroion ni Debata. Tarbarita do Raja Salomo sahalak raja na bisuk jala raja na umbisuk sian sude angka raja na asing. Raja Salomo sahalak na unik sian angka raja na asing, godang harajaan na timbul siala hamonangan marporang manang sian politik, na marlapatan mandapot huaso marhite na mangasahon gogo, hamoraon dohot angka cara na asing. Alai Raja Salomo tiur do marpanatap tu Debata ido umbahen jumolo ibana mangido habisuhon andorang manguluhon songon sahalak raja. Molo rap dohot Debata adong pandonganionNa jala dihaporseai do pasti ingkon monang jala denggan.

2) Mamangke Uhum dohot Denggan. Tuhan Debata manghalomohon hadameon dohot hatigoran; jala jotjot do hata i dikutip laho mandok molo Tuhan Debata marsangkap laho mambahen uhum na boi mambahen bangso i gabe denggan, adil, taratur, jala maduma songoni ma dihirim nian asa uhum dipatupa dohot denggan. Pada dasarna denggan do uhum dohot tujuan ni uhum dipatupa, alai jotjot do masa papeol uhum na mambahen na deba gabe ‘korban’. Ido umbahen disosohon Tuhan Debata asa dipadalan ma uhum dohot denggan. Molo denggan do uhum dipatupa, dua pihak na marsalisi boi do gabe rap monang manang berimbang.

3) Raja Hadameon. Sasintong na saluhut taringot tu Raja Hadameon na adong di turpukta on, martudutudu do tu haroro ni Tuhanta Jesus Kristus Raja tu portion, mamboan hadameon, hatigoran nang haluaon.  Holan di bagasan Ibana do adong haluaon. Ai saluhut raja na di portibion terbatas, jala na boi muba do songon raja Salomo. Alai anggo harajaon ni Tuhanta Jesus Kristus na manongtong do ro di saleleng ni lelengna. Jala di ujungna asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama. Antong nunga ro be Rajanta,  Raja Hadameon i taungkap ma rohanta lao manjangkon haroroNa i. Na ro do Ibana tu portibi on laho mangalehon haluaon do tu angka jolma jala padamehon nasa jolma dohot Debata.