SADA BIBEL NAMPUNANA SANDIRI
Ucok
anak kalas sada SD na baru masuk tu sikola. Ibana ingkon tinggal di asrama do
ala dao do parsingkolaan sian huta nasida.
Nunga sahat ibana di
asrama ni sikola na di ari Sabtu. Senin bot ari nai, dang boi tarpodom ibana. Sai
marhusari do rohana ada dang adong Bibelna. Sai busisaon ma ibana di podomanna.
Nantuari
di sikola minggu, didokhon guruna do, “Sude hamu dakdanak nami nampuna Bibel
martuduma timbo-timbo!.” Sude dakdanak mangangkat Bibel nasida be. Holan si
Ucok ma na so adong Bibel na.
Nangkin
manogot, ari parjolo masuk sikola, angka dakdanak masuk kalas nasida.
“Ganup
ari ingkon dimulai do dohot manjaha Bibel jala sude dakdanak ingkon mamboan
bibelna sandiri.” ninna guruna.
Sai
diingot ibana ma i bahenna sai busisaon ibana di podomanna i. Aha do na ingkon
ulahononna? Dangadong Bibelna jala dangadong hepengna laho manuhor. Tompu ma ro
pamingkirion. Dung i dipatigor ibana ma parpeakna, jala mengkel supik sandiri
ibana. Gabe boi ma ibana modom.
Marsogot
nai, si Warneck dohot Horas, dongan sa kamar di asrama ni si Ucok, marlojong tu
uluan ni asrama. Tung mabiar do nasida idaon.
“Mago
si Ucok,” ninna si Warneck. “Nunga hulului hami manang tudia.”
“Nunga
dilului hamu tu sude asrama dohot tu inganan paridian?” sungkun-sungkun ina
asrama i.
“Olo
inong, nunga hulului hami manang tudia,” ninna si Horas.
Dohot
ma ina asrama i mangalului si Ucok, hape dang dapot. Laho ma inang i tu panjaga
asrama na asing.
“Adong
nangkin diida hamu si Ucok mulak?” Disungkun inanta i.
“Daong,”
ninna panjaga asrama i. “dangadong namangido mulak.”
“Na
so tarida do si Ucok na baru masuk i ?” ninna uluan ni sikola i topet dibege
ibana panghataion i. “Na mulak do ra i tu hutana, ala huida nasogot hira
pungkul lima adong do motor (mobil) maradi di harbangan ni sikola i, alai lului
hamu ma jolo. ”ninna ma tu ina asrama dohot panjaga asrama i.
Sahali nai dilului
nasida ma di humaliang ni asrama i, alai tongtong do dang jumpang si Ucok.
Panjaga asrama i manjou
ama Marulam, panapu di sikola i. “Didokhon uluan ni sikola i nangkin, nasogotan
hirahira pungkul lima nangkin, adong do motor maradi di harbangan ni sikola. Ra
nunga mulak si Ucok, murid kalas sada i, tu hutana mangihut tu motor i, ihuthon
ma ibana muse pangke motor paduahon jala lului ma ibana!.”ninna panjaga asrama
i laos manuru ama Marulam.
Laho ma ama Marulam tu
motor paduahon. Adong do tolu jom ibana di bagasan pardalanan sahat tu sirpang laho
tu huta ni si Ucok. Sian i mardalan pat dope ama Marulam hira-hira sada
kilometer nai tu jabu ni si Ucok. Toho ma tutu, dapotna ma si Ucok di jabuna.
Si Ucok manompang motor alai ndang manggarar ongkos jala mardalan pat ma muse
tu jabuna.
“Ucok, boasa lari ho?”
sungkun ni ama Marulam, “Ai, ndang sikola ho?”
“Ndang lari au,” ninna
si Ucok. “Mulak au naeng mangalap Bibel do.”
“Alai boasa ndang
didokhon ho manang tu ise paboa namulak ho?” sungkun ni ama Marulam.
“Daong!” ninna si Ucok
tompu. “Ro dope au tibu, na porlu do di au Bibel.” Ninna ma muse mangalusi
dohot lambok.
“Dang boi boanonmu
Bibel sian jabu on, anaha.” ninna ama Marulam. “Boha annon natorasmu dohot
angka hahamu? Nasida pe porlu do Bibel. Ndang boi buatonmu Bibel nasasadaon.”
Gabe gale ma roha ni si
Ucok. “Olo tahe” ninna di bagasan rohana. Boi do ibana mulak tu sikola nang pe
so mamboan sada Bibel? Murhing do bohina jala ndang tabo panghilalaanna.
“Ucok, mulak ma hita tu
sikola, pos do rohangku ina asrama boi mangurupi ho mandapothon sada Bibel.”
Marsogot nai, ama Marulam
dohot Ucok mulak ma tu asrama sikola jala mangadopi panjaga asrama.
“Boasa lari ho, Ucok?”
disungkun panjaga asrama i. “Harop do roha nami, mian nian roham tinggal di
asrama on.” Diantusi si Ucok do panghataion i, ndang boi ibana mulak anggo so
dipaboa parjolo. Gabe ninna ibana ma mangalusi: “Sala do au disi, ndang adong
rohaku laho lari. Mulak pe au laho mangalap Bibel do.”
“Didia ma Bibel i,
Ucok?” sungkun ni panjaga asrama.
“Ndang adong,” ninna si
Ucok dohot gale, “Holan sada do Bibel nami, i pe pangkeon ni halak bapa dohot
oma do i dohot angka hahaku. Urupi ma ahu, boha do asa adong Bibelhu?”
“Jumpangi ma ina
asrama, Ucok,” ninna panjaga asrama i. “Hupingkiri hami pe hatami. Annon dung
mulak sikola, tahatai pe i muse ate.” Hobas ma ibana laho mangadopi ina asrama.
Mangido maaf ma ibana ala nunga busisaon sude dibahen ibana jolma na adong
disi. Sadari i sai hira na ganjang hian do tarhilala.
Ujungna dijou ina
asrama dohot uluan ni sikola ma ibana.
“Ucok, olo do hami
mangurupi ho” ninna ina asrama, dung i naeng dibuat ma Bibel sian lamari.
“Dang Bibel leanon nami”.
Tompu ma mangkuling uluan ni sikola i.
Dung i diuduti ibana ma
muse mandok: “Alai boi do hami mangalehon karejo tu ho. Nuaeng musim udan, gabe
gok oma ma dalan i jala manutupi dalan. Molo olo do ho mangurupi ama Marulam
paiashon dohot manitip oma i asa dalan tu sikola dohot asrama lobi tu dengganna
dope. Jala muse bidang do alaman ni sikola on, hape holan ama Marulam do
pasaehon. Hulehon hami pe dua pulu ribu rupia di bagasan satonga jom, marhite
hepeng naung pinapungumi gabe boi ma ho manuhor Bibel. Boha, olo do ho
mangulahon i?”
“Bah, olo amang,
huulahon pe. Di huta pe olo do diboan au tu ladang.” ninna Si Ucok dohot las ni
roha.
“Andorang so adong
Bibelmu pangke ma jolo Bibel na sian asrama on.” Tamba ni hata ni uluan ni
sikola i.
Dung pigapiga minggu
ibana sikola huhut mangurupi, gabe adong ma hepengna godang so sadia, jala
nunga sae laho manuhor Bibel i. Dang holan sae be tahe, gariada adong dope lobi
hepengna i.
Gabe adong ma ulaon ni
si Ucok dung mulak sikola, angkup ni i gabe mian ma rohana jala lam tamba ma
lomo di rohana tu asrama dohot sikola i. Manogot sahat tu arian, sikola do
ibana. Dung mulak sikola masuk ma tu asrama laho mangan tugo dohot maradi
satongkin. Molo dung jumpang pungkul tolu dohot ma ibana mangurupi ama Marulam
laho paiashon sikola i. Molo dung jumpang borngin marsiajar ma ibana, panghorhon
ni halalas ni rohana dohot mangarajumi godang ni pangurupion dohot pasupasu na
jinalona.
